4. да̄накатха̄ван̣н̣ана̄

478. деййадхаммавасена чодетунти йади четасикова дхаммо да̄нам̣, ‘‘диййатӣти да̄на’’нти имина̄пи аттхена четасикассева да̄набха̄во а̄паджджатӣти чодетунти аттхо.

479. анит̣т̣хапхалантиа̄ди ачетасикасса дхаммасса да̄набха̄вадӣпанаттхам̣ вуттанти пхалада̄набха̄вадӣпанаттхам̣ на вуттанти аттхо дат̣т̣хаббо. анит̣т̣хапхалантиа̄дина̄ ачетасикасса дхаммасса пхалада̄нам̣ вуттам̣ вийа хоти, на да̄набха̄во, таннива̄ран̣аттхан̃четама̄ха̄ти. еван̃ча катва̄ анантарамева̄ха ‘‘на хи ачетасико анна̄дидхаммо а̄йатим̣ випа̄кам̣ детӣ’’ти. ит̣т̣хапхалабха̄ванийаманаттханти деййадхаммо вийа кеначи парийа̄йена анит̣т̣хапхалата̄ да̄насса наттхи, екантам̣ пана ит̣т̣хапхаламева̄ти нийаманаттханти аттхо.

итарена̄ти ‘‘диййатӣти да̄на’’нти имина̄ парийа̄йена. на пана екенаттхена̄ти ‘‘деййадхаммова да̄на’’нти имам̣ сакава̄дӣва̄дам̣ ниваттетум̣ ‘‘саддха̄ хирийа’’нтиа̄дикам̣ суттаса̄дханам̣ парава̄дӣва̄де йуджджати, ‘‘идхекаччо аннам̣ детӣ’’тиа̄дикан̃ча, ‘‘четасикова дхаммо да̄на’’нти имам̣ ниваттетум̣ ‘‘четасико дхаммо да̄на’’нти имам̣ пана са̄дхетум̣ ‘‘саддха̄ хирийа’’нтиа̄дикам̣ сакава̄дӣва̄де йуджджати, ‘‘идхекаччо аннам̣ детӣ’’тиа̄дикам̣ ва̄ ‘‘деййадхаммо да̄на’’нти са̄дхетунти евам̣ ниваттанаса̄дханаттхана̄наттам̣ сандха̄йа ‘‘на пана екенаттхена̄’’ти вуттанти дат̣т̣хаббам̣. таттха йатха̄ парава̄дӣва̄де ча суттаса̄дханаттхам̣ ‘‘на ваттаббам̣ четасико дхаммо да̄на’’нти пуччха̄йам̣ четасикова̄ти аттхо дат̣т̣хаббо, татха̄ ‘‘на ваттаббам̣ деййадхаммо да̄на’’нти пуччха̄йа ча деййадхаммова̄ти. деййадхаммо ит̣т̣хапхалоти ит̣т̣хапхала̄бха̄ваматтамева пат̣иккхиттанти еттха ‘‘ит̣т̣хапхалабха̄ваматтамева пат̣иккхитта’’нти па̄т̣хена бхавитаббанти. ‘‘ит̣т̣хапхала̄бха̄ваматтамева дисва̄ пат̣иккхитта’’нти ва̄ ваттаббам̣. сан̇карабха̄вамочанаттханти четасикасса да̄таббат̣т̣хена деййадхаммасса ча ит̣т̣хапхалат̣т̣хена да̄набха̄вамочанаттханти вуттам̣ хоти.

да̄накатха̄ван̣н̣ана̄ нит̣т̣хита̄.