10. ниддасаваттхусуттаван̣н̣ана̄
20. дасаме ниддасаваттхӯнӣти а̄дисаддалопена̄йам̣ ниддесоти а̄ха ‘‘ниддаса̄диваттхӯнӣ’’ти. наттхи ида̄ни имасса даса̄ти ниддасо. пан̃хоти н̃а̄тум̣ иччхито аттхо. пуна дасавассо на хотӣти тесам̣ матиматтаметанти дассетум̣ ‘‘со кира̄’’ти кирасаддаггахан̣ам̣. ниддасоти четам̣ вачанаматтам̣. тасса ниббӣса̄дибха̄васса вийа ниннава̄дибха̄васса ча иччхитатта̄ти дассетум̣ ‘‘на кевалан̃ча̄’’тиа̄ди вуттам̣. га̄ме вичарантоти га̄ме пин̣д̣а̄йа чаранто. на идам̣ титтхийа̄нам̣ адхивачанам̣ тесу таннимиттасса абха̄ва̄, са̄санепи секхассапи на идам̣ адхивачанам̣, киман̇гам̣ пана путхуджджанасса. йасса панетам̣ адхивачанам̣ йена ча ка̄ран̣ена, там̣ дассетум̣ ‘‘кхӣн̣а̄савассета’’нтиа̄ди вуттам̣. аппат̣исандхикабха̄во хисса паччаккхато ка̄ран̣ам̣. парампара̄йа итара̄ни йа̄ни па̄л̣ийам̣ а̄гата̄ним̣.
сиккха̄йа саммадева а̄да̄нам̣ сиккха̄сама̄да̄нам̣. там̣ панасса̄ па̄рипӯрийа̄ ведитаббанти а̄ха ‘‘сиккха̄ттайапӯран̣е’’ти. сиккха̄йа ва̄ саммадева а̄дито пат̣т̣ха̄йа раккхан̣ам̣ сиккха̄сама̄да̄нам̣. тан̃ча аттхато пӯран̣ена париччхиннам̣ араккхан̣е саббена саббам̣ абха̄вато, раккхан̣е ча парипӯран̣ато. балаваччхандоти дал̣хаччхандо. а̄йатинти анантара̄на̄гатадиваса̄дика̄ло адхиппето, на ана̄гатабхавоти а̄ха ‘‘ана̄гате пунадиваса̄дӣсупӣ’’ти. сиккхам̣ парипӯрентасса таттха нибаддхабхаттита̄ авигатапемата̄. тебхӯмакадхамма̄нам̣ аничча̄дивасена саммадева ниджджха̄нам̣ дхамманиса̄мана̄ти а̄ха ‘‘випассана̄йетам̣ адхивачана’’нти. тан̣ха̄винайети бхан̇га̄нупассана̄н̃а̄н̣а̄нубха̄васиддхе тан̣ха̄виккхамбхане. екӣбха̄вети ган̣асан̇ган̣ика̄килесасан̇ган̣ика̄вигамасиддхе вивекава̄се. вӣрийа̄рамбхети саммаппадха̄насса пагган̣хане. там̣ пана саббасо вӣрийасса парибрӯханам̣ хотӣти а̄ха ‘‘ка̄йикачетасикасса вӣрийасса пӯран̣е’’ти. сатийан̃чева нипакабха̄ве ча̄ти сатока̄рита̄йа чева сампаджа̄нака̄рита̄йа ча. сатисампаджан̃н̃абаленева хи вӣрийа̄рамбхо иджджхати. дит̣т̣хипат̣иведхети маггасамма̄дит̣т̣хийа̄ пат̣ивиджджхане. тена̄ха ‘‘маггадассане’’ти.
ниддасаваттхусуттаван̣н̣ана̄ нит̣т̣хита̄.
анусайаваггаван̣н̣ана̄ нит̣т̣хита̄.