11. аппама̄дасуттаван̣н̣ана̄

53. ека̄дасаме джан̇гала̄нанти еттха йо нипиччхало на анӯпо нирудаката̄йа тхаддхалӯкхо бхӯмиппадесо, со ‘‘джан̇гало’’ти вуччати. таббахулата̄йа пана идха саббо бхӯмиппадесо джан̇гало. тасмим̣ джан̇гале джа̄та̄ бхава̄ти ва̄ джан̇гала̄, тесам̣ джан̇гала̄нам̣. еван̃хи надичара̄нампи хаттхӣнам̣ сан̇гахо като хоти самодха̄табба̄нам̣ вийа самодха̄йака̄нампи идха джан̇галаггахан̣ена гахетаббато. патхавӣталача̄рӣнанти имина̄ джалача̄рино ча ниваттети адиссама̄напа̄датта̄. ‘‘па̄н̣а̄на’’нти са̄дха̄ран̣авачанампи ‘‘пададжа̄та̄нӣ’’ти саддантарасаннидха̄нена висесанивит̣т̣хамева хотӣти а̄ха ‘‘сапа̄дакапа̄н̣а̄на’’нти. ‘‘муттагата’’нтиа̄дӣсу (ма. ни. 2.119; а. ни. 9.11) гата-саддо вийа идха джа̄та-саддо анаттхантароти а̄ха ‘‘пададжа̄та̄нӣти пада̄нӣ’’ти. самодха̄нанти самавародхам̣, антогадхам̣ ва̄. тена̄ха ‘‘одха̄нам̣ упаниккхепам̣ гаччхантӣ’’ти. кӯт̣ан̇гама̄ти па̄римантена кӯт̣ам̣ упагаччханти. кӯт̣анинна̄ти кӯт̣аччхиддамагге пависанавасена кӯт̣е нинна̄. кӯт̣асамосаран̣а̄ти чхидде анупависанавасена ча а̄хачча аваттха̄нена ча кӯт̣е самодахитва̄ т̣хита̄. ван̣т̣е патама̄не сабба̄ни бхӯмийам̣ патантӣти а̄ха ‘‘ван̣т̣а̄нуваттака̄ни бхавантӣ’’ти.

аппама̄дасуттаван̣н̣ана̄ нит̣т̣хита̄.