12. дхаммикасуттаван̣н̣ана̄

54. два̄дасаме джа̄тибхӯмийанти еттха джананам̣ джа̄ти, джа̄тийа̄ бхӯми джа̄тибхӯми, джа̄тат̣т̣ха̄нам̣. там̣ кхо панетам̣ нева косаламаха̄ра̄джа̄дӣнам̣, на чан̇кибра̄хман̣а̄дӣнам̣, на саккасуйа̄масантусита̄дӣнам̣, на асӣтимаха̄са̄вака̄нам̣, на ан̃н̃есам̣ сатта̄нам̣ ‘‘джа̄тибхӯмӣ’’ти вуччати. йасса пана джа̄тадивасе дасасахассӣ локадха̄ту екаддхаджама̄ла̄виппакин̣н̣акусумава̄сачун̣н̣аган̣асугандха̄ саббапа̄липхулламива нанданаванам̣ вирочама̄на̄ падуминипан̣н̣е удакабинду вийа акампиттха, джаччандха̄дӣнан̃ча рӯпадассана̄дӣни анека̄ни па̄т̣иха̄рийа̄ни паваттим̣су. тасса саббан̃н̃убодхисаттасса джа̄тат̣т̣ха̄нам̣, са̄тисайасса пана джанакакапилаваттхусанниссайо ‘‘джа̄тибхӯмӣ’’ти вуччати. джа̄тибхӯмака̄ упа̄сака̄ти джа̄тибхӯмива̄сино упа̄сака̄. сантанетва̄ саббасо танетва̄ паттхаритва̄ т̣хитамӯла̄ни мӯласанта̄нака̄ни. та̄ни пана аттхато мӯла̄нийева̄ти а̄ха ‘‘мӯласанта̄нака̄нанти мӯла̄на’’нти.

джа̄тадивасе а̄вудха̄нам̣ джотитатта̄, ран̃н̃о апаримитасса ча саттака̄йасса анаттхато парипа̄ланасаматтхата̄йа ча ‘‘джотипа̄ло’’ти ладдхана̄матта̄ вуттам̣ ‘‘на̄мена джотипа̄ло’’ти. говиндоти говиндийа̄бхисекена абхиситто, говиндасса т̣ха̄не т̣хапана̄бхисекена абхиситтоти аттхо. там̣ кира тасса бра̄хман̣асса кулапарампара̄гатам̣ т̣ха̄нантарам̣. тена̄ха ‘‘т̣ха̄нена маха̄говиндо’’ти. гавам̣ пан̃н̃ан̃ча виндати пат̣илабхатӣти говиндо, маханто говиндоти маха̄говиндо. готи хи пан̃н̃а̄йетам̣ адхивачанам̣ ‘‘гаччхати аттхе буджджхатӣ’’ти катва̄. маха̄говиндо ча амха̄кам̣ бодхисаттойева. со кира дисампатисса на̄ма ран̃н̃о пурохитасса говиндабра̄хман̣асса путто хутва̄ аттано питусса ча ран̃н̃о ча аччайена тасса путто рен̣у, саха̄йа̄ часса саттабхӯ, брахмадатто, вессабхӯ, бхарато, две дхатарат̣т̣ха̄ти име сатта ра̄джа̄но йатха̄ ан̃н̃аман̃н̃ам̣ на виваданти. евам̣ радждже патит̣т̣ха̄петва̄ тесам̣ аттхадхамме ануса̄санте джамбудӣпатале саббесам̣ ра̄джа̄ва ран̃н̃ам̣, брахма̄ва бра̄хман̣а̄нам̣, девова гахапатика̄нам̣ саккато гарукато ма̄нито пӯджито апачито уттамага̄рават̣т̣ха̄нам̣ ахоси. тена вуттам̣ ‘‘рен̣уа̄дӣнам̣ саттаннам̣ ра̄джӯнам̣ пурохито’’ти. имева сатта бха̄радха̄ра̄ маха̄ра̄джа̄но. вуттан̃хетам̣ –

‘‘саттабхӯ брахмадатто ча, вессабхӯ бхарато саха;

рен̣у две ча дхатарат̣т̣ха̄, тада̄сум̣ сатта бха̄радха̄’’ти. (дӣ. ни. ат̣т̣ха. 2.308);

ран̃н̃о дит̣т̣хадхаммикасампара̄йикаттха̄нам̣ пуро видха̄нато пуре сам̣видха̄нато пурохито. кодха̄магандхена̄ти кодхасан̇кха̄тена пӯтигандхена. карун̣а̄ асса аттхӣти карун̣анти сапуббабха̄гакарун̣аджджха̄нам̣ вуттанти а̄ха ‘‘карун̣а̄йа ча карун̣а̄пуббабха̄ге ча т̣хита̄’’ти. йака̄ро сандхивасена а̄гатоти а̄ха ‘‘йетети ете’’ти. арахаттато пат̣т̣ха̄йа саттамоти сакада̄га̄мӣ. сакада̄га̄мим̣ упа̄да̄йа̄ти сакада̄га̄мибха̄вам̣ пат̣ичча. сакада̄га̄мисса хи пан̃чиндрийа̄ни сакада̄га̄мибха̄вам̣ пат̣ичча мудӯни на̄ма хонти. сесаметтха сувин̃н̃еййамева.

дхаммикасуттаван̣н̣ана̄ нит̣т̣хита̄.

дхаммикаваггаван̣н̣ана̄ нит̣т̣хита̄.

пат̣хамапан̣н̣а̄сакам̣ нит̣т̣хитам̣.