10. ануттарийасуттаван̣н̣ана̄

30. дасаме нихӣнанти ла̄макам̣, килит̣т̣хам̣ ва̄. га̄мава̄сика̄нанти ба̄ла̄нам̣. путхуджджана̄нам̣ иданти потхуджджаникам̣. тена̄ха ‘‘путхуджджана̄нам̣ сантака’’нти, путхуджджанехи севитаббатта̄ тесам̣ сантаканти вуттам̣ хоти. анарийанти на ниддосам̣. ниддосат̣т̣хо хи арийат̣т̣хо. тена̄ха ‘‘на уттамам̣ на парисуддха’’нти. арийехи ва̄ на севитаббанти анарийам̣. анаттхасам̣хитанти дит̣т̣хадхаммикасампара̄йика̄дививидхавипула̄наттхасахитам̣. та̄дисан̃ча аттхасаннисситам̣ на хотӣти а̄ха ‘‘на аттхасанниссита’’нти. на ват̣т̣е ниббинданаттха̄йа̄ти чатусаччакаммат̣т̣ха̄на̄бха̄вато. асати пана ват̣т̣е ниббида̄йа вира̄га̄дӣнам̣ асамбхавойева̄ти а̄ха ‘‘на вира̄га̄йа̄’’тиа̄ди.

ануттамам̣ ануттарийанти а̄ха ‘‘етам̣ ануттара’’нти. хаттхисминти нимиттаттхе бхумманти а̄ха ‘‘хаттхинимиттам̣ сиккхитабба’’нти. хаттхивисайатта̄ хаттхисаннисситатта̄ ча хаттхисиппам̣ ‘‘хаттхӣ’’ти гахетва̄ ‘‘хаттхисмимпи сиккхатӣ’’ти вуттам̣. тасма̄ хаттхисиппе сиккхатӣти еваметтха аттхо дат̣т̣хаббо. сесападесупи есева найо.

лин̇габйаттайена вибхаттибйаттайена па̄ричарийети вуттанти а̄ха ‘‘па̄ричарийа̄йа паччупат̣т̣хита̄’’ти. сесаметтха сувин̃н̃еййамева.

ануттарийасуттаван̣н̣ана̄ нит̣т̣хита̄.

ануттарийаваггаван̣н̣ана̄ нит̣т̣хита̄.