10. на̄гитасуттаван̣н̣ана̄

30. дасаме учча̄саддамаха̄садда̄ти уддхам̣ уггататта̄ уччо паттхат̣о маханто виниббхиджджитва̄ гахетум̣ асаккун̣еййо саддо етесанти учча̄саддамаха̄садда̄. вачӣгхосопи хи бахӯхи екаджджхам̣ паваттито аттхато саддато ча дуравабодхо кевалам̣ маха̄ниггхосо ева хутва̄ сотапатхама̄гаччхати. маччхавилопети маччха̄нам̣ вилумпитва̄ вийа гахан̣е, маччха̄нам̣ ва̄ вилумпане. кеват̣т̣а̄нан̃хи маччхапаччхит̣хапитат̣т̣ха̄не маха̄джано саннипатитва̄ ‘‘идха ан̃н̃ам̣ екам̣ маччхам̣ дехи, екам̣ маччхапха̄лам̣ дехӣ’’ти, ‘‘етасса те маха̄ динно, майхам̣ кхуддако’’ти евам̣ учча̄саддам̣ маха̄саддам̣ каронти. маччхаггахан̣аттхам̣ джа̄ле паккхиттепи тасмим̣ т̣ха̄не кеват̣т̣а̄ чева ан̃н̃е ча ‘‘павит̣т̣хо гахито’’ти маха̄саддам̣ каронти. там̣ сандха̄йетам̣ вуттам̣. асучисукханти ка̄йа̄сучисаннисситатта̄ килеса̄сучисаннисситатта̄ ча асучисаннисситасукхам̣. неккхаммасукхасса̄ти ка̄мато никкхамантасса сукхасса. павивекасукхасса̄ти ган̣асан̇ган̣икато килесасан̇ган̣икато ча вигатасса сукхасса. упасамасукхасса̄ти ра̄га̄дивӯпасама̄вахасса сукхасса. самбодхасукханти маггасан̇кха̄тасса самбодхасса нит̣т̣хаппаттаттха̄йа сукхам̣. сесам̣ сувин̃н̃еййамева.

на̄гитасуттаван̣н̣ана̄ нит̣т̣хита̄.

пан̃чан̇гикаваггаван̣н̣ана̄ нит̣т̣хита̄.