10. йуганаддхасуттаван̣н̣ана̄

170. дасаме саматхапуббан̇гамам̣ випассанам̣ бха̄ветӣти идам̣ саматхайа̄никасса васена вуттам̣. со хи пат̣хамам̣ упача̄расама̄дхим̣ ва̄ аппана̄сама̄дхим̣ ва̄ уппа̄дети, айам̣ саматхо. со тан̃ча там̣сампайутте ча дхамме аничча̄дӣхи випассати, айам̣ випассана̄, ити пат̣хамам̣ саматхо, паччха̄ випассана̄. тена вуччати ‘‘саматхапуббан̇гамам̣ випассанам̣ бха̄ветӣ’’ти. випассана̄пуббан̇гамам̣ саматхам̣ бха̄ветӣти идам̣ пана випассана̄йа̄никасса васена вуттам̣. со там̣ вуттаппака̄рам̣ саматхам̣ асампа̄детва̄ пан̃чупа̄да̄наккхандхе аничча̄дӣхи випассати. пат̣хамо локуттарамагго ниббаттатӣти сота̄паттимаггам̣ сандха̄йа вадати, локийамаггавасенева ва̄ имисса̄ па̄л̣ийа̄ аттхо ведитаббо. катхам̣? магго сан̃джа̄йати, пуббабха̄гийо локийамагго уппаджджати. а̄севати ниббида̄нупассана̄васена. бха̄вети муччитукамйата̄васена. бахулӣкароти пат̣исан̇кха̄нупассана̄васена. а̄севати ва̄ бхайатупат̣т̣ха̄на̄дин̃а̄н̣авасена. бха̄вети муччитукамйата̄дин̃а̄н̣авасена. бахулӣкароти вут̣т̣ха̄нага̄минивипассана̄васена. сам̣йоджана̄ни пахӣйанти. анусайа̄ бйантӣ хонтӣти маггаппат̣ипа̄т̣ийа̄ пахӣйанти бйантӣ хонти.

дхаммуддхаччавиггахитама̄насанти обха̄са̄дӣсу арийадхаммоти паваттам̣ уддхаччам̣ виккхепо дхаммуддхаччам̣, тена дхаммуддхаччена випассана̄вӣтхито уггаманена вирӯпам̣ гахитам̣ паваттийама̄нам̣ дхаммуддхаччавиггахитама̄насам̣. вуттан̃хетам̣ –

‘‘дхаммуддхаччавиггахитама̄насам̣ хоти, аниччато манаси кароти, обха̄со уппаджджати, обха̄со дхаммоти обха̄сам̣ а̄ваджджати, тато виккхепо уддхаччам̣, тена уддхаччена виггахитама̄насо аниччато упат̣т̣ха̄нам̣ йатха̄бхӯтам̣ наппаджа̄на̄ти. дуккхато…пе… анаттато упат̣т̣ха̄нам̣ йатха̄бхӯтам̣ наппаджа̄на̄ти. татха̄ аниччато манасикарото н̃а̄н̣ам̣ уппаджджати…пе… пӣти пассаддхи сукхам̣ адхимоккхо паггахо упат̣т̣ха̄нам̣ упеккха̄ никанти уппаджджати, никанти дхаммоти никантим̣ а̄ваджджати, тато виккхепо уддхаччам̣, тена уддхаччена виггахитама̄насо аниччато упат̣т̣ха̄нам̣ йатха̄бхӯтам̣ наппаджа̄на̄ти. дуккхато…пе… анаттато упат̣т̣ха̄нам̣ йатха̄бхӯтам̣ наппаджа̄на̄тӣ’’ти (пат̣и. ма. 2.6). сесаметтха утта̄намева.

йуганаддхасуттаван̣н̣ана̄ нит̣т̣хита̄.

пат̣ипада̄ваггаван̣н̣ана̄ нит̣т̣хита̄.