6-8. каппасутта̄диван̣н̣ана̄

156-158. чхат̣т̣хе сам̣ват̣т̣анам̣ винассанам̣ сам̣ват̣т̣о, сам̣ват̣т̣ато уддхам̣ татха̄ т̣ха̄йӣ сам̣ват̣т̣ат̣т̣ха̄йӣ. виват̣т̣анам̣ ниббаттанам̣, вад̣д̣ханам̣ ва̄ виват̣т̣о. ‘‘теджосам̣ват̣т̣о, а̄посам̣ват̣т̣о, ва̄йосам̣ват̣т̣оти евам̣ сам̣ват̣т̣асӣма̄нуккамена сам̣ват̣т̣есу ваттаббесу татха̄ аватва̄ а̄посам̣ват̣т̣о, теджосам̣ват̣т̣о, ва̄йосам̣ват̣т̣оти вачанам̣ сам̣ват̣т̣амаха̄бхӯтадесана̄нупуббийа̄’’ти кечи. ‘‘бха̄вӣсам̣ват̣т̣а̄нупуббийа̄’’ти апаре. а̄пена сам̣ват̣т̣о а̄посам̣ват̣т̣о. сам̣ват̣т̣асӣма̄ти сам̣ват̣т̣анамарийа̄да̄. сам̣ват̣т̣атӣти винассати. сада̄ти саббака̄лам̣, тӣсупи сам̣ват̣т̣ака̄лесӯти аттхо. екам̣ буддхаккхеттам̣ винассатӣти еттха буддхаккхеттам̣ на̄ма тивидхам̣ хоти джа̄тиккхеттам̣, а̄н̣а̄ккхеттам̣, висайаккхеттан̃ча.

таттха джа̄тиккхеттам̣ дасасахассачаккава̄л̣апарийантам̣ хоти, татха̄гатасса пат̣исандхиггахан̣а̄дӣсу кампати. а̄н̣а̄ккхеттам̣ кот̣исатасахассачаккава̄л̣апарийантам̣, йаттха ратанасуттам̣ (кху. па̄. 6.1 а̄дайо; су. ни. 224 а̄дайо) кхандхапариттам̣ (а. ни. 4.67; чӯл̣ава. 251) дхаджаггапариттам̣ (сам̣. ни. 1.249) а̄т̣а̄на̄т̣ийапариттам̣ (дӣ. ни. 3.277-278) морапариттанти (джа̄. 1.2.17-18) имесам̣ паритта̄нам̣ а̄нубха̄во ваттати. висайаккхеттам̣ ананта̄парима̄н̣ам̣, йам̣ ‘‘йа̄вата̄ ва̄ пана̄кан̇кхеййа̄’’ти (а. ни. 3.81) вуттам̣. таттха йам̣ йам̣ татха̄гато а̄кан̇кхати, там̣ там̣ джа̄на̄ти. еваметесу тӣсу буддхаккхеттесу екам̣ а̄н̣а̄ккхеттам̣ винассати, тасмим̣ пана винассанте джа̄тиккхеттам̣ винат̣т̣хамева хоти, винассантан̃ча екатова винассати, сан̣т̣хахантан̃ча екатова сан̣т̣хахати. сесаметтха висуддхимаггасам̣ван̣н̣ана̄су (висуддхи. маха̄т̣ӣ. 2.404) вуттанайенева гахетаббам̣. саттамат̣т̣хама̄ни утта̄наттха̄нева.

каппасутта̄диван̣н̣ана̄ нит̣т̣хита̄.