2. ӯмибхайасуттаван̣н̣ана̄

122. дутийе кодхӯпа̄йа̄сассетам̣ адхивачананти еттха куджджханат̣т̣хена кодхо, свева читтасса ка̄йасса ча атиппамадданаматхануппа̄данехи дал̣хаа̄йа̄сат̣т̣хена упа̄йа̄со. анекава̄рам̣ паваттитва̄ аттана̄ самаветам̣ саттам̣ аджджхоттхаритва̄ сӣсам̣ уккхипитум̣ адатва̄ ӯмисадисата̄ дат̣т̣хабба̄. йатха̄ хи ба̄хирам̣ удакам̣ отин̣н̣о ӯмӣсу осӣдитва̄ марати, евам̣ имасмим̣ са̄сане кодхӯпа̄йа̄се осӣдитва̄ виббхамати, тасма̄ кодхӯпа̄йа̄со ‘‘ӯмибхайа’’нти вутто. одарикаттассетам̣ адхивачананти йатха̄ хи ба̄хирам̣ удакам̣ отин̣н̣о кумбхӣлена кха̄дито марати, евам̣ имасмим̣ са̄сане одарикаттена одарикабха̄вена а̄мисагедхена миччха̄джӣвена джӣвикакаппанена на̄ситасӣла̄дигун̣ата̄йа кха̄дитадхаммасарӣро виббхамати, тасма̄ одарикаттам̣ ‘‘кумбхӣлабхайа’’нти вуттам̣.

анупат̣т̣хита̄йа сатийа̄ти ка̄йагатам̣ сатим̣ анут̣т̣ха̄петва̄. асам̣вутехӣти апихитехи. пан̃чаннетам̣ ка̄магун̣а̄нам̣ адхивачананти йатха̄ хи ба̄хирам̣ удакам̣ отин̣н̣о а̄ват̣т̣е нимуджджитва̄ марати, евам̣ имасмим̣ са̄сане паббаджито пан̃чака̄магун̣а̄ват̣т̣е нимуджджитва̄ виббхамати. ка̄мара̄га̄бхибхӯто хи сатто ито ча етто, етто ча итоти евам̣ мана̄пийарӯпа̄дивисайасан̇кха̄те а̄ват̣т̣е атта̄нам̣ сам̣са̄ретва̄ йатха̄ тато бахибхӯте неккхамме читтампи на уппа̄дети, евам̣ а̄ват̣т̣етва̄ бйасана̄па̄данена ка̄магун̣а̄нам̣ а̄ват̣т̣асадисата̄ дат̣т̣хабба̄.

ануддхам̣сетӣти киламети вилолати. ра̄га̄нуддхам̣ситена̄ти ра̄гена ануддхам̣ситена. ма̄туга̄массетам̣ адхивачананти. йатха̄ хи ба̄хирам̣ удакам̣ отин̣н̣о чан̣д̣амаччхам̣ а̄гамма ладдхаппаха̄ро марати, евам̣ имасмим̣ са̄сане ма̄туга̄мам̣ а̄раббха уппаннака̄мара̄го виббхамати, тасма̄ ма̄туга̄мо ‘‘сусука̄бхайа’’нти вутто. ма̄туга̄мо хи йонисоманасика̄рарахитам̣ адхӣрапурисам̣ иттхикуттабхӯтехи аттано ха̄сабха̄вавила̄сехи абхибхуййа гахетва̄ дхӣраджа̄тикампи аттано рӯпа̄дӣхи сампалобханавасена анавасесам̣ аттано упака̄радхамме сӣла̄дике сампа̄детум̣ асаматтхам̣ каронто анайабйасанам̣ па̄пети.

има̄ни пана чатта̄ри бхайа̄ни бха̄йитва̄ йатха̄ удакам̣ анорохантасса удакам̣ нисса̄йа удакапипа̄са̄винайанам̣ сарӣрасуддхипарил̣а̄хӯпасамо ка̄йаутугга̄ха̄пананти, евама̄ди а̄нисам̣со наттхи, евамевам̣ има̄ни чатта̄ри бхайа̄ни бха̄йитва̄ са̄сане апаббаджантассапи имам̣ са̄санам̣ нисса̄йа сан̇кхепато ват̣т̣адуккхӯпасамо, виттха̄рато пана сӣла̄нисам̣са̄дивасена анекавидхо а̄нисам̣со наттхи. йатха̄ пана има̄ни чатта̄ри бхайа̄ни абха̄йитва̄ удакам̣ орохантасса вуттаппака̄ро а̄нисам̣со хоти, евам̣ има̄ни абха̄йитва̄ са̄сане паббаджантассапи вуттаппака̄ро а̄нисам̣со хоти. маха̄дхаммараккхитаттхеро пана̄ха ‘‘чатта̄ри бхайа̄ни бха̄йитва̄ удакам̣ анотаранто сотам̣ чхиндитва̄ паратӣрам̣ па̄пун̣итум̣ на саккоти, абха̄йитва̄ отаранто саккоти, евамевам̣ бха̄йитва̄ са̄сане апаббаджантопи тан̣ха̄сотам̣ чхиндитва̄ нибба̄напа̄рам̣ дат̣т̣хум̣ на саккоти, абха̄йитва̄ паббаджанто саккотӣ’’ти.

ӯмибхайасуттаван̣н̣ана̄ нит̣т̣хита̄.