5. кесамуттисуттаван̣н̣ана̄

66. пан̃чаме кесамуттам̣ нива̄со етесанти кесамуттийа̄ти а̄ха ‘‘кесамуттанигамава̄сино’’ти. ат̣т̣хавидхапа̄нака̄нӣти амбапа̄на̄диат̣т̣хавидха̄ни па̄на̄ни.

‘‘ма̄ ануссавена̄’’тиа̄дӣсу пана еко дахарака̄лато пат̣т̣ха̄йа евам̣ ануссаво аттхи, евам̣ чирака̄лаката̄йа ануссутийа̄ лаббхама̄нам̣ катхамидам̣ ан̃н̃атха̄ сийа̄, тасма̄ бхӯтаметанти ануссавена ган̣ха̄ти, татха̄ гахан̣ам̣ пат̣иккхипанто ‘‘ма̄ ануссавена̄’’ти а̄ха. ану ану саванам̣ ануссаво. апаро ‘‘амха̄кам̣ питупита̄маха̄дивуддха̄нам̣ упадесапарампара̄йа идама̄бхатам̣, евам̣ парампара̄бхатакатхам̣ на̄ма на ан̃н̃атха̄ сийа̄, тасма̄ бхӯтамета’’нти ган̣ха̄ти, там̣ пат̣иккхипанто ‘‘ма̄ парампара̄йа̄’’ти а̄ха. еко кеначи кисмин̃чи вуттаматте ‘‘евам̣ кира ета’’нти ган̣ха̄ти, там̣ ниседхенто ‘‘ма̄ итикира̄йа̄’’ти а̄ха. пит̣акам̣ гантхо сампадӣйати етасса̄ти пит̣акасампада̄нам̣, гантхасса угган̣ханако. тена пит̣акаугган̣ханакабха̄вена екаччо та̄дисам̣ гантхам̣ пагун̣ам̣ катва̄ тена там̣ саментам̣ самети, тасма̄ ‘‘бхӯтамета’’нти ган̣ха̄ти, там̣ сандха̄йеса пат̣иккхепо ‘‘ма̄ пит̣акасампада̄нена̄’’ти, аттано уггахагантхасампаттийа̄ ма̄ ган̣хиттха̄ти вуттам̣ хоти. саметанти сам̣гатам̣.

кочи кан̃чи витаккенто ‘‘евамева тена бхавитабба’’нти кевалам̣ аттано сан̇каппавасена ‘‘бхӯтамида’’нти ган̣ха̄ти, там̣ сандха̄йетам̣ вуттам̣ ‘‘ма̄ таккахетӯ’’ти. ан̃н̃о ‘‘има̄йа йуттийа̄ бхӯтамида’’нти кевалам̣ анума̄нато найагга̄хена ган̣ха̄ти, там̣ пат̣иккхипанто ‘‘ма̄ найахетӯ’’ти а̄ха. кассачи ‘‘еваметам̣ сийа̄’’ти парикаппентасса екам̣ ка̄ран̣ам̣ упат̣т̣ха̄ти, со ‘‘аттхета’’нти аттано парикаппита̄ка̄рена ган̣ха̄ти, там̣ пат̣иседхенто ‘‘ма̄ а̄ка̄рапаривитаккена̄’’ти а̄ха. апарасса чинтайато йатха̄парикаппитам̣ кан̃чи аттхам̣ ‘‘еваметам̣ на ан̃н̃атха̄’’ти абхинивисантасса ека̄ дит̣т̣хи уппаджджати. йа̄ йасса там̣ ка̄ран̣ам̣ ниджджха̄йантасса паччаккхам̣ вийа нирӯпетва̄ чинтентасса кхамати. со ‘‘аттхета’’нти дит̣т̣хиниджджха̄наккхантийа̄ ган̣ха̄ти, там̣ сандха̄йа̄ха ‘‘ма̄ дит̣т̣хиниджджха̄наккхантийа̄’’ти.

акусалаверасса̄ти па̄н̣а̄типа̄та̄дипан̃чавидхам̣ верам̣ сандха̄йа вадати. кодхо на̄ма четасо дуккханти а̄ха ‘‘кодхачиттасса абха̄вена̄’’ти. килесасса̄ти читтам̣ виба̄дхентасса упата̄пентасса уддхаччакуккучча̄дикилесасса. сесаметтха утта̄намева.

кесамуттисуттаван̣н̣ана̄ нит̣т̣хита̄.