3. са̄кетасуттам̣

513. евам̣ ме сутам̣ – екам̣ самайам̣ бхагава̄ са̄кете вихарати ан̃джанаване мигада̄йе. татра кхо бхагава̄ бхиккхӯ а̄мантеси – ‘‘аттхи ну кхо, бхиккхаве, парийа̄йо йам̣ парийа̄йам̣ а̄гамма йа̄ни пан̃чиндрийа̄ни та̄ни пан̃ча бала̄ни хонти, йа̄ни пан̃ча бала̄ни та̄ни пан̃чиндрийа̄ни хонтӣ’’ти?

‘‘бхагавам̣мӯлака̄ но, бханте, дхамма̄ бхагавам̣неттика̄ бхагавам̣пат̣исаран̣а̄. са̄дху вата, бханте, бхагавантам̣йева пат̣ибха̄ту етасса бха̄ситасса аттхо. бхагавато сутва̄ бхиккхӯ дха̄рессантӣ’’ти. ‘‘аттхи, бхиккхаве, парийа̄йо йам̣ парийа̄йам̣ а̄гамма йа̄ни пан̃чиндрийа̄ни та̄ни пан̃ча бала̄ни хонти, йа̄ни пан̃ча бала̄ни та̄ни пан̃чиндрийа̄ни хонти’’.

‘‘катамо ча, бхиккхаве, парийа̄йо йам̣ парийа̄йам̣ а̄гамма йа̄ни пан̃чиндрийа̄ни та̄ни пан̃ча бала̄ни хонти, йа̄ни пан̃ча бала̄ни та̄ни пан̃чиндрийа̄ни хонти? йам̣, бхиккхаве, саддхиндрийам̣ там̣ саддха̄балам̣, йам̣ саддха̄балам̣ там̣ саддхиндрийам̣; йам̣ вӣрийиндрийам̣ там̣ вӣрийабалам̣, йам̣ вӣрийабалам̣ там̣ вӣрийиндрийам̣; йам̣ сатиндрийам̣ там̣ сатибалам̣, йам̣ сатибалам̣ там̣ сатиндрийам̣; йам̣ сама̄дхиндрийам̣ там̣ сама̄дхибалам̣, йам̣ сама̄дхибалам̣ там̣ сама̄дхиндрийам̣; йам̣ пан̃н̃индрийам̣ там̣ пан̃н̃а̄балам̣, йам̣ пан̃н̃а̄балам̣ там̣ пан̃н̃индрийам̣. сеййатха̄пи, бхиккхаве, надӣ па̄чӣнанинна̄ па̄чӣнапон̣а̄ па̄чӣнапаббха̄ра̄, тасса маджджхе дӣпо. аттхи, бхиккхаве, парийа̄йо йам̣ парийа̄йам̣ а̄гамма тасса̄ надийа̄ еко сото твева сан̇кхйам̣ гаччхати [сан̇кхам̣ (сӣ. сйа̄. кам̣.)]. аттхи пана, бхиккхаве, парийа̄йо йам̣ парийа̄йам̣ а̄гамма тасса̄ надийа̄ две сота̄ни твева сан̇кхйам̣ гаччханти.

‘‘катамо ча, бхиккхаве, парийа̄йо йам̣ парийа̄йам̣ а̄гамма тасса̄ надийа̄ еко сото твева сан̇кхйам̣ гаччхати? йан̃ча, бхиккхаве, тасса дӣпасса пуриманте [пураттхиманте (сӣ. сйа̄. кам̣. пӣ.)] удакам̣, йан̃ча паччхиманте удакам̣ – айам̣ кхо, бхиккхаве, парийа̄йо йам̣ парийа̄йам̣ а̄гамма тасса̄ надийа̄ еко сото твева сан̇кхйам̣ гаччхати.

‘‘катамо ча, бхиккхаве, парийа̄йо йам̣ парийа̄йам̣ а̄гамма тасса̄ надийа̄ две сота̄ни твева сан̇кхйам̣ гаччханти? йан̃ча, бхиккхаве, тасса дӣпасса уттаранте удакам̣, йан̃ча даккхин̣анте удакам̣ – айам̣ кхо, бхиккхаве, парийа̄йо йам̣ парийа̄йам̣ а̄гамма тасса̄ надийа̄ две сота̄ни твева сан̇кхйам̣ гаччханти. евамева кхо, бхиккхаве, йам̣ саддхиндрийам̣ там̣ саддха̄балам̣, йам̣ саддха̄балам̣ там̣ саддхиндрийам̣; йам̣ вӣрийиндрийам̣ там̣ вӣрийабалам̣, йам̣ вӣрийабалам̣ там̣ вӣрийиндрийам̣; йам̣ сатиндрийам̣ там̣ сатибалам̣, йам̣ сатибалам̣ там̣ сатиндрийам̣; йам̣ сама̄дхиндрийам̣ там̣ сама̄дхибалам̣, йам̣ сама̄дхибалам̣ там̣ сама̄дхиндрийам̣; йам̣ пан̃н̃индрийам̣ там̣ пан̃н̃а̄балам̣, йам̣ пан̃н̃а̄балам̣ там̣ пан̃н̃индрийам̣. пан̃чаннам̣, бхиккхаве, индрийа̄нам̣ бха̄витатта̄ бахулӣкататта̄ бхиккху а̄сава̄нам̣ кхайа̄ ана̄савам̣ четовимуттим̣ пан̃н̃а̄вимуттим̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа вихаратӣ’’ти. татийам̣.