4. пуббакот̣т̣хакасуттам̣

514. евам̣ ме сутам̣ – екам̣ самайам̣ бхагава̄ са̄ваттхийам̣ вихарати пуббакот̣т̣хаке. татра кхо бхагава̄ а̄йасмантам̣ са̄рипуттам̣ а̄мантеси – ‘‘саддахаси [саддаха̄си (сӣ. пӣ.)] твам̣, са̄рипутта – саддхиндрийам̣ бха̄витам̣ бахулӣкатам̣ аматогадхам̣ хоти аматапара̄йан̣ам̣ аматапарийоса̄нам̣…пе… пан̃н̃индрийам̣ бха̄витам̣ бахулӣкатам̣ аматогадхам̣ хоти аматапара̄йан̣ам̣ аматапарийоса̄на’’нти?

‘‘на кхва̄хам̣ еттха, бханте, бхагавато саддха̄йа гаччха̄ми – саддхиндрийам̣…пе… пан̃н̃индрийам̣ бха̄витам̣ бахулӣкатам̣ аматогадхам̣ хоти аматапара̄йан̣ам̣ аматапарийоса̄нам̣. йесан̃хетам̣, бханте, ан̃н̃а̄там̣ асса адит̣т̣хам̣ авидитам̣ асаччхикатам̣ апхасситам̣ [апасситам̣ (сӣ. сйа̄. кам̣. ка.), апхуситам̣ (пӣ.)] пан̃н̃а̄йа, те таттха паресам̣ саддха̄йа гаччхеййум̣ – саддхиндрийам̣…пе… пан̃н̃индрийам̣ бха̄витам̣ бахулӣкатам̣ аматогадхам̣ хоти аматапара̄йан̣ам̣ аматапарийоса̄нам̣. йесан̃ча кхо етам̣, бханте, н̃а̄там̣ дит̣т̣хам̣ видитам̣ саччхикатам̣ пхасситам̣ пан̃н̃а̄йа, никкан̇кха̄ те таттха ниббичикиччха̄ – саддхиндрийам̣…пе… пан̃н̃индрийам̣ бха̄витам̣ бахулӣкатам̣ аматогадхам̣ хоти аматапара̄йан̣ам̣ аматапарийоса̄нам̣. майхан̃ча кхо етам̣, бханте, н̃а̄там̣ дит̣т̣хам̣ видитам̣ саччхикатам̣ пхасситам̣ пан̃н̃а̄йа. никкан̇кхава̄хам̣ таттха ниббичикиччхо саддхиндрийам̣…пе… пан̃н̃индрийам̣ бха̄витам̣ бахулӣкатам̣ аматогадхам̣ хоти аматапара̄йан̣ам̣ аматапарийоса̄на’’нти.

‘‘са̄дху са̄дху, са̄рипутта! йесан̃хетам̣, са̄рипутта, ан̃н̃а̄там̣ асса адит̣т̣хам̣ авидитам̣ асаччхикатам̣ апхасситам̣ пан̃н̃а̄йа, те таттха паресам̣ саддха̄йа гаччхеййум̣ – саддхиндрийам̣ бха̄витам̣ бахулӣкатам̣ аматогадхам̣ хоти аматапара̄йан̣ам̣ аматапарийоса̄нам̣…пе… пан̃н̃индрийам̣ бха̄витам̣ бахулӣкатам̣ аматогадхам̣ хоти аматапара̄йан̣ам̣ аматапарийоса̄нам̣. йесан̃ча кхо етам̣, са̄рипутта, н̃а̄там̣ дит̣т̣хам̣ видитам̣ саччхикатам̣ пхасситам̣ пан̃н̃а̄йа, никкан̇кха̄ те таттха ниббичикиччха̄ – саддхиндрийам̣ бха̄витам̣ бахулӣкатам̣ аматогадхам̣ хоти аматапара̄йан̣ам̣ аматапарийоса̄нам̣…пе… пан̃н̃индрийам̣ бха̄витам̣ бахулӣкатам̣ аматогадхам̣ хоти аматапара̄йан̣ам̣ аматапарийоса̄на’’нти. чатуттхам̣.