10. дутийасаман̣абра̄хман̣асуттам̣

500. ‘‘йе хи кечи, бхиккхаве, саман̣а̄ ва̄ бра̄хман̣а̄ ва̄ чаккхундрийам̣ наппаджа̄нанти, чаккхундрийасамудайам̣ наппаджа̄нанти, чаккхундрийаниродхам̣ наппаджа̄нанти, чаккхундрийаниродхага̄миним̣ пат̣ипадам̣ наппаджа̄нанти; сотиндрийам̣…пе… гха̄ниндрийам̣…пе… дживхиндрийам̣…пе… ка̄йиндрийам̣…пе… маниндрийам̣ наппаджа̄нанти, маниндрийасамудайам̣ наппаджа̄нанти, маниндрийаниродхам̣ наппаджа̄нанти, маниндрийаниродхага̄миним̣ пат̣ипадам̣ наппаджа̄нанти. на ме те, бхиккхаве…пе… сайам̣ абхин̃н̃а̄ саччхикатва̄ упасампаджджа вихаранти.

‘‘йе ча кхо кечи, бхиккхаве, саман̣а̄ ва̄ бра̄хман̣а̄ ва̄ чаккхундрийам̣ паджа̄нанти, чаккхундрийасамудайам̣ паджа̄нанти, чаккхундрийаниродхам̣ паджа̄нанти, чаккхундрийаниродхага̄миним̣ пат̣ипадам̣ паджа̄нанти, сотиндрийам̣…пе… гха̄ниндрийам̣…пе… дживхиндрийам̣…пе… ка̄йиндрийам̣…пе… маниндрийам̣ паджа̄нанти, маниндрийасамудайам̣ паджа̄нанти, маниндрийаниродхам̣ паджа̄нанти, маниндрийаниродхага̄миним̣ пат̣ипадам̣ паджа̄нанти, те кхо ме, бхиккхаве, саман̣а̄ ва̄ бра̄хман̣а̄ ва̄ саман̣есу чева саман̣асаммата̄ бра̄хман̣есу ча бра̄хман̣асаммата̄, те ча пана̄йасманто са̄ман̃н̃аттхан̃ча брахман̃н̃аттхан̃ча дит̣т̣хева дхамме сайам̣ абхин̃н̃а̄ саччхикатва̄ упасампаджджа вихарантӣ’’ти. дасамам̣.

чхал̣индрийавагго татийо.

тассудда̄нам̣ –

пунаббхаво джӣвитан̃н̃а̄йа, екабӣджӣ ча суддхакам̣;

сото арахасамбуддхо, две ча саман̣абра̄хман̣а̄ти.