3. дхаммадиннасуттам̣

1049. екам̣ самайам̣ бхагава̄ ба̄ра̄н̣асийам̣ вихарати исипатане мигада̄йе. атха кхо дхаммадинно упа̄сако пан̃чахи упа̄сакасатехи саддхим̣ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо дхаммадинно упа̄сако бхагавантам̣ етадавоча – ‘‘овадату но, бханте, бхагава̄; ануса̄сату но, бханте, бхагава̄ йам̣ амха̄кам̣ асса дӣгхараттам̣ хита̄йа сукха̄йа̄’’ти.

‘‘тасма̄тиха во, дхаммадиннам̣, евам̣ сиккхитаббам̣ – ‘йе те суттанта̄ татха̄гатабха̄сита̄ гамбхӣра̄ гамбхӣраттха̄ локуттара̄ сун̃н̃атапат̣исам̣йутта̄ те ка̄лена ка̄лам̣ упасампаджджа вихарисса̄ма̄’ти. еван̃хи во, дхаммадинна, сиккхитабба’’нти. ‘‘на кхо нетам̣, бханте, сукарам̣ амхехи путтасамба̄дхасайанам̣ аджджха̄васантехи ка̄сикачанданам̣ паччанубхонтехи ма̄ла̄гандхавилепанам̣ дха̄райантехи джа̄тарӯпараджатам̣ са̄дийантехи – йе те суттанта̄ татха̄гатабха̄сита̄ гамбхӣра̄ гамбхӣраттха̄ локуттара̄ сун̃н̃атапат̣исам̣йутта̄ те ка̄лена ка̄лам̣ упасампаджджа вихаритум̣. тесам̣ но, бханте, бхагава̄ амха̄кам̣ пан̃часу сиккха̄падесу т̣хита̄нам̣ уттаридхаммам̣ десетӯ’’ти.

‘‘тасма̄тиха во, дхаммадинна, евам̣ сиккхитаббам̣ – ‘буддхе авеччаппаса̄дена саманна̄гата̄ бхависса̄ма – итипи со бхагава̄…пе… саттха̄ деваманусса̄нам̣ буддхо бхагава̄ти. дхамме…пе… сан̇гхе…пе… арийакантехи сӣлехи саманна̄гата̄ бхависса̄ма акхан̣д̣ехи…пе… сама̄дхисам̣ваттаникехӣ’ти. еван̃хи во, дхаммадинна, сиккхитабба’’нти.

‘‘йа̄нима̄ни, бханте, бхагавата̄ чатта̄ри сота̄паттийан̇га̄ни десита̄ни, сам̣виджджанте те дхамма̄ амхесу, майан̃ча тесу дхаммесу сандисса̄ма. майан̃хи бханте, буддхе авеччаппаса̄дена саманна̄гата̄ – итипи со бхагава̄…пе… саттха̄ деваманусса̄нам̣ буддхо бхагава̄ти. дхамме…пе… сан̇гхе…пе… арийакантехи сӣлехи саманна̄гата̄ акхан̣д̣ехи…пе… сама̄дхисам̣ваттаникехӣ’’ти. ‘‘ла̄бха̄ во, дхаммадинна, суладдхам̣ во, дхаммадинна! сота̄паттипхалам̣ тумхехи бйа̄ката’’нти. татийам̣.