2. дутийамаха̄на̄масуттам̣

1018. евам̣ ме сутам̣ – екам̣ самайам̣ бхагава̄ саккесу вихарати капилаваттхусмим̣ нигродха̄ра̄ме. атха кхо маха̄на̄мо сакко йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо маха̄на̄мо сакко бхагавантам̣ етадавоча – ‘‘идам̣, бханте, капилаваттху иддхан̃чева пхӣтан̃ча ба̄худжан̃н̃ам̣ а̄кин̣н̣амануссам̣ самба̄дхабйӯхам̣. со кхва̄хам̣, бханте, бхагавантам̣ ва̄ пайирупа̄ситва̄ манобха̄ванӣйе ва̄ бхиккхӯ са̄йанхасамайам̣ капилаваттхум̣ пависанто; бхантенапи хаттхина̄ сама̄гаччха̄ми; бхантенапи ассена сама̄гаччха̄ми; бхантенапи ратхена сама̄гаччха̄ми; бханте, напи сакат̣ена сама̄гаччха̄ми; бханте, напи пурисена сама̄гаччха̄ми. тасса майхам̣, бханте, тасмим̣ самайе муссатева бхагавантам̣ а̄раббха сати, муссати дхаммам̣ а̄раббха сати, муссати сан̇гхам̣ а̄раббха сати. тасса майхам̣, бханте, евам̣ хоти – ‘имамхи ча̄хам̣ самайе ка̄лам̣ кареййам̣, ка̄ майхам̣ гати, ко абхисампара̄йо’’’ти?

‘‘ма̄ бха̄йи, маха̄на̄ма, ма̄ бха̄йи, маха̄на̄ма! апа̄пакам̣ те маран̣ам̣ бхависсати апа̄пика̄ ка̄лам̣кирийа̄. чатӯхи кхо, маха̄на̄ма, дхаммехи саманна̄гато арийаса̄вако нибба̄нанинно хоти нибба̄напон̣о нибба̄напаббха̄ро. катамехи чатӯхи? идха, маха̄на̄ма, арийаса̄вако буддхе авеччаппаса̄дена саманна̄гато хоти – итипи со бхагава̄…пе… саттха̄ деваманусса̄нам̣ буддхо бхагава̄ти. дхамме…пе… сан̇гхе …пе… арийакантехи сӣлехи саманна̄гато хоти акхан̣д̣ехи…пе… сама̄дхисам̣ваттаникехи.

‘‘сеййатха̄пи, маха̄на̄ма, руккхо па̄чӣнанинно па̄чӣнапон̣о па̄чӣнапаббха̄ро, со мӯлаччхинно катамена папатеййа̄’’ти? ‘‘йена, бханте, нинно йена пон̣о йена паббха̄ро’’ти. ‘‘евамева кхо, маха̄на̄ма, имехи чатӯхи дхаммехи саманна̄гато арийаса̄вако нибба̄нанинно хоти нибба̄напон̣о нибба̄напаббха̄ро’’ти. дутийам̣.