10. нандакаличчхависуттам̣

1026. екам̣ самайам̣ бхагава̄ веса̄лийам̣ вихарати маха̄ване кӯт̣а̄га̄раса̄ла̄йам̣. атха кхо нандако личчхавимаха̄матто йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо нандакам̣ личчхавимаха̄маттам̣ бхагава̄ етадавоча –

‘‘чатӯхи кхо, нандака, дхаммехи саманна̄гато арийаса̄вако сота̄панно хоти авинипа̄тадхаммо нийато самбодхипара̄йан̣о. катамехи чатӯхи? идха, нандака, арийаса̄вако буддхе авеччаппаса̄дена саманна̄гато хоти – итипи со бхагава̄…пе… саттха̄ деваманусса̄нам̣ буддхо бхагава̄ти. дхамме…пе… сан̇гхе…пе… арийакантехи сӣлехи саманна̄гато хоти акхан̣д̣ехи…пе… сама̄дхисам̣ваттаникехи. имехи кхо, нандака, чатӯхи дхаммехи саманна̄гато арийаса̄вако сота̄панно хоти авинипа̄тадхаммо нийато самбодхипара̄йан̣о.

‘‘имехи ча пана, нандака, чатӯхи дхаммехи саманна̄гато арийаса̄вако а̄йуна̄ сам̣йутто хоти диббенапи ма̄нусенапи; ван̣н̣ена сам̣йутто хоти диббенапи ма̄нусенапи; сукхена сам̣йутто хоти диббенапи ма̄нусенапи; йасена сам̣йутто хоти диббенапи ма̄нусенапи; а̄дхипатеййена сам̣йутто хоти диббенапи ма̄нусенапи. там̣ кхо пана̄хам̣, нандака, на̄н̃н̃асса саман̣асса ва̄ бра̄хман̣асса ва̄ сутва̄ вада̄ми. апи ча йадева майа̄ са̄мам̣ н̃а̄там̣ са̄мам̣ дит̣т̣хам̣ са̄мам̣ видитам̣, тадева̄хам̣ вада̄мӣ’’ти.

евам̣ вутте ан̃н̃атаро пурисо нандакам̣ личчхавимаха̄маттам̣ етадавоча – ‘‘наха̄нака̄ло, бханте’’ти. ‘‘алам̣ да̄ни, бхан̣е, етена ба̄хирена наха̄нена. аламидам̣ аджджхаттам̣ наха̄нам̣ бхависсати, йадидам̣ – бхагавати паса̄до’’ти. дасамам̣.

саран̣а̄нивагго татийо.

тассудда̄нам̣ –

маха̄на̄мена две вутта̄, годха̄ ча саран̣а̄ дуве;

дуве ана̄тхапин̣д̣ика̄, дуве верабхайена ча;

личчхавӣ дасамо вутто, вагго тена павуччатӣти.