8. дутийаеджа̄суттам̣

91. ‘‘еджа̄, бхиккхаве, рого, еджа̄ ган̣д̣о, еджа̄ саллам̣. тасма̄тиха, бхиккхаве, татха̄гато анеджо вихарати вӣтасалло. тасма̄тиха, бхиккхаве, бхиккху чепи а̄кан̇кхеййа ‘анеджо вихареййам̣ вӣтасалло’ти, чаккхум̣ на ман̃н̃еййа, чаккхусмим̣ на ман̃н̃еййа, чаккхуто на ман̃н̃еййа, чаккху мети на ман̃н̃еййа; рӯпе на ман̃н̃еййа… чаккхувин̃н̃а̄н̣ам̣… чаккхусампхассам̣… йампидам̣ чаккхусампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи на ман̃н̃еййа, тасмимпи на ман̃н̃еййа, татопи на ман̃н̃еййа, там̣ мети на ман̃н̃еййа. йан̃хи, бхиккхаве, ман̃н̃ати, йасмим̣ ман̃н̃ати, йато ман̃н̃ати, йам̣ мети ман̃н̃ати, тато там̣ хоти ан̃н̃атха̄. ан̃н̃атха̄бха̄вӣ бхавасатто локо бхавамева абхинандати…пе….

‘‘дживхам̣ на ман̃н̃еййа, дживха̄йа на ман̃н̃еййа, дживха̄то на ман̃н̃еййа, дживха̄ мети на ман̃н̃еййа; расе на ман̃н̃еййа… дживха̄вин̃н̃а̄н̣ам̣… дживха̄сампхассам̣… йампидам̣ дживха̄сампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи на ман̃н̃еййа, тасмимпи на ман̃н̃еййа, татопи на ман̃н̃еййа, там̣ мети на ман̃н̃еййа. йан̃хи, бхиккхаве, ман̃н̃ати, йасмим̣ ман̃н̃ати, йато ман̃н̃ати, йам̣ мети ман̃н̃ати, тато там̣ хоти ан̃н̃атха̄. ан̃н̃атха̄бха̄вӣ бхавасатто локо бхавамева абхинандати…пе….

‘‘манам̣ на ман̃н̃еййа, манасмим̣ на ман̃н̃еййа, манато на ман̃н̃еййа, мано мети на ман̃н̃еййа… мановин̃н̃а̄н̣ам̣… маносампхассам̣… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи на ман̃н̃еййа, тасмимпи на ман̃н̃еййа, татопи на ман̃н̃еййа, там̣ мети на ман̃н̃еййа. йан̃хи, бхиккхаве, ман̃н̃ати, йасмим̣ ман̃н̃ати, йато ман̃н̃ати, йам̣ мети ман̃н̃ати, тато там̣ хоти ан̃н̃атха̄. ан̃н̃атха̄бха̄вӣ бхавасатто локо бхавамева абхинандати.

‘‘йа̄вата̄, бхиккхаве, кхандхадха̄туа̄йатана̄ тампи на ман̃н̃еййа, тасмимпи на ман̃н̃еййа, татопи на ман̃н̃еййа, там̣ мети на ман̃н̃еййа. со евам̣ аман̃н̃ама̄но на кин̃чи локе упа̄дийати. анупа̄дийам̣ на паритассати. апаритассам̣ паччаттан̃н̃ева паринибба̄йати. ‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’ти паджа̄на̄тӣ’’ти. ат̣т̣хамам̣.