7. пат̣хамаеджа̄суттам̣

90. ‘‘еджа̄, бхиккхаве, рого, еджа̄ ган̣д̣о, еджа̄ саллам̣. тасма̄тиха, бхиккхаве, татха̄гато анеджо вихарати вӣтасалло. тасма̄тиха, бхиккхаве, бхиккху чепи а̄кан̇кхеййа ‘анеджо вихареййам̣ [вихареййа (сӣ. пӣ. ка.)] вӣтасалло’ти, чаккхум̣ на ман̃н̃еййа, чаккхусмим̣ на ман̃н̃еййа, чаккхуто на ман̃н̃еййа, чаккху мети на ман̃н̃еййа; рӯпе на ман̃н̃еййа, рӯпесу на ман̃н̃еййа, рӯпато на ман̃н̃еййа, рӯпа̄ мети на ман̃н̃еййа; чаккхувин̃н̃а̄н̣ам̣ на ман̃н̃еййа, чаккхувин̃н̃а̄н̣асмим̣ на ман̃н̃еййа, чаккхувин̃н̃а̄н̣ато на ман̃н̃еййа, чаккхувин̃н̃а̄н̣ам̣ мети на ман̃н̃еййа; чаккхусампхассам̣ на ман̃н̃еййа, чаккхусампхассасмим̣ на ман̃н̃еййа, чаккхусампхассато на ман̃н̃еййа, чаккхусампхассо мети на ман̃н̃еййа. йампидам̣ чаккхусампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи на ман̃н̃еййа, тасмимпи на ман̃н̃еййа, татопи на ман̃н̃еййа, там̣ мети на ман̃н̃еййа.

‘‘сотам̣ на ман̃н̃еййа…пе… гха̄нам̣ на ман̃н̃еййа…пе… дживхам̣ на ман̃н̃еййа, дживха̄йа на ман̃н̃еййа, дживха̄то на ман̃н̃еййа, дживха̄ мети на ман̃н̃еййа; расе на ман̃н̃еййа…пе… дживха̄вин̃н̃а̄н̣ам̣ на ман̃н̃еййа…пе… дживха̄сампхассам̣ на ман̃н̃еййа…пе… йампидам̣ дживха̄сампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи на ман̃н̃еййа, тасмимпи на ман̃н̃еййа, татопи на ман̃н̃еййа, там̣ мети на ман̃н̃еййа.

‘‘ка̄йам̣ на ман̃н̃еййа…пе… манам̣ на ман̃н̃еййа, манасмим̣ на ман̃н̃еййа, манато на ман̃н̃еййа, мано мети на ман̃н̃еййа; дхамме на ман̃н̃еййа…пе… мано вин̃н̃а̄н̣ам̣…пе… маносампхассам̣…пе… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи на ман̃н̃еййа, тасмимпи на ман̃н̃еййа, татопи на ман̃н̃еййа, там̣ мети на ман̃н̃еййа; саббам̣ на ман̃н̃еййа, саббасмим̣ на ман̃н̃еййа, саббато на ман̃н̃еййа, саббам̣ мети на ман̃н̃еййа.

‘‘со евам̣ аман̃н̃ама̄но на кин̃чипи локе упа̄дийати. анупа̄дийам̣ на паритассати. апаритассам̣ паччаттан̃н̃ева паринибба̄йати. ‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣ на̄парам̣ иттхатта̄йа̄’ти паджа̄на̄тӣ’’ти. саттамам̣.