9. пат̣хамачхапхасса̄йатанасуттам̣

71. ‘‘йо хи кочи, бхиккхаве, бхиккху чханнам̣ пхасса̄йатана̄нам̣ самудайан̃ча аттхан̇гаман̃ча асса̄дан̃ча а̄дӣнаван̃ча ниссаран̣ан̃ча йатха̄бхӯтам̣ наппаджа̄на̄ти. авуситам̣ тена брахмачарийам̣, а̄рака̄ со имасма̄ дхаммавинайа̄’’ти.

евам̣ вутте, ан̃н̃атаро бхиккху бхагавантам̣ етадавоча – ‘‘еттха̄хам̣, бханте, анассасам̣ [анассасим̣ (сӣ.), анасса̄сам̣ (сйа̄. кам̣.), анасса̄сим̣ (пӣ.)]. ахан̃хи, бханте, чханнам̣ пхасса̄йатана̄нам̣ самудайан̃ча аттхан̇гаман̃ча асса̄дан̃ча а̄дӣнаван̃ча ниссаран̣ан̃ча йатха̄бхӯтам̣ наппаджа̄на̄мӣ’’ти.

‘‘там̣ ким̣ ман̃н̃аси, бхиккху, чаккхум̣ ‘етам̣ мама, есохамасми, есо ме атта̄’ти саманупассасӣ’’ти?

‘‘но хетам̣, бханте’’.

‘‘са̄дху, бхиккху, еттха ча те, бхиккху, чаккху ‘нетам̣ мама, несохамасми, на месо атта̄’ти еваметам̣ йатха̄бхӯтам̣ саммаппан̃н̃а̄йа судит̣т̣хам̣ бхависсати. есеванто дуккхасса…пе… дживхам̣ ‘етам̣ мама, есохамасми, есо ме атта̄’ти саманупассасӣ’’ти?

‘‘но хетам̣, бханте’’.

‘‘са̄дху, бхиккху, еттха ча те, бхиккху, дживха̄ ‘нетам̣ мама, несохамасми, на месо атта̄’ти еваметам̣ йатха̄бхӯтам̣ саммаппан̃н̃а̄йа судит̣т̣хам̣ бхависсати. есеванто дуккхасса…пе… манам̣ ‘етам̣ мама, есохамасми, есо ме атта̄’ти саманупассасӣ’’ти?

‘‘но хетам̣, бханте’’.

‘‘са̄дху, бхиккху, еттха ча те, бхиккху, мано ‘нетам̣ мама, несохамасми, на месо атта̄’ти еваметам̣ йатха̄бхӯтам̣ саммаппан̃н̃а̄йа судит̣т̣хам̣ бхависсати. есеванто дуккхасса̄’’ти. навамам̣.