10. дутийачхапхасса̄йатанасуттам̣

72. ‘‘йо хи кочи, бхиккхаве, бхиккху чханнам̣ пхасса̄йатана̄нам̣ самудайан̃ча аттхан̇гаман̃ча асса̄дан̃ча а̄дӣнаван̃ча ниссаран̣ан̃ча йатха̄бхӯтам̣ наппаджа̄на̄ти. авуситам̣ тена брахмачарийам̣, а̄рака̄ со имасма̄ дхаммавинайа̄’’ти.

евам̣ вутте, ан̃н̃атаро бхиккху бхагавантам̣ етадавоча – ‘‘еттха̄хам̣, бханте, анассасам̣ панассасам̣. ахан̃хи, бханте, чханнам̣ пхасса̄йатана̄нам̣ самудайан̃ча аттхан̇гаман̃ча асса̄дан̃ча а̄дӣнаван̃ча ниссаран̣ан̃ча йатха̄бхӯтам̣ наппаджа̄на̄мӣ’’ти.

‘‘там̣ ким̣ ман̃н̃аси, бхиккху, чаккхум̣ ‘нетам̣ мама, несохамасми, на месо атта̄’ти саманупассасӣ’’ти?

‘‘евам̣, бханте’’.

‘‘са̄дху, бхиккху, еттха ча те, бхиккху, чаккху ‘нетам̣ мама, несохамасми на месо атта̄’ти еваметам̣ йатха̄бхӯтам̣ саммаппан̃н̃а̄йа судит̣т̣хам̣ бхависсати. евам̣ те етам̣ пат̣хамам̣ пхасса̄йатанам̣ пахӣнам̣ бхависсати а̄йатим̣ апунаббхава̄йа…пе….

‘‘дживхам̣ ‘нетам̣ мама, несохамасми, на месо атта̄’ти саманупассасӣ’’ти?

‘‘евам̣, бханте’’.

‘‘са̄дху, бхиккху, еттха ча те, бхиккху, дживха̄ ‘нетам̣ мама, несохамасми на месо атта̄’ти еваметам̣ йатха̄бхӯтам̣ саммаппан̃н̃а̄йа судит̣т̣хам̣ бхависсати. евам̣ те етам̣ чатуттхам̣ пхасса̄йатанам̣ пахӣнам̣ бхависсати а̄йатим̣ апунаббхава̄йа…пе….

‘‘манам̣ ‘нетам̣ мама, несохамасми, на месо атта̄’ти саманупассасӣ’’ти?

‘‘евам̣, бханте’’.

‘‘са̄дху, бхиккху, еттха ча те, бхиккху, мано ‘нетам̣ мама, несохамасми, на месо атта̄’ти еваметам̣ йатха̄бхӯтам̣ саммаппан̃н̃а̄йа судит̣т̣хам̣ бхависсати. евам̣ те етам̣ чхат̣т̣хам̣ пхасса̄йатанам̣ пахӣнам̣ бхависсати а̄йатим̣ апунаббхава̄йа̄’’ти. дасамам̣.