11. татийачхапхасса̄йатанасуттам̣

73. ‘‘йо хи кочи, бхиккхаве, бхиккху чханнам̣ пхасса̄йатана̄нам̣ самудайан̃ча аттхан̇гаман̃ча асса̄дан̃ча а̄дӣнаван̃ча ниссаран̣ан̃ча йатха̄бхӯтам̣ наппаджа̄на̄ти. авуситам̣ тена брахмачарийам̣, а̄рака̄ со имасма̄ дхаммавинайа̄’’ти.

евам̣ вутте, ан̃н̃атаро бхиккху бхагавантам̣ етадавоча – ‘‘еттха̄хам̣, бханте, анассасам̣ панассасам̣. ахан̃хи, бханте, чханнам̣ пхасса̄йатана̄нам̣ самудайан̃ча аттхан̇гаман̃ча асса̄дан̃ча а̄дӣнаван̃ча ниссаран̣ан̃ча йатха̄бхӯтам̣ наппаджа̄на̄мӣ’’ти.

‘‘там̣ ким̣ ман̃н̃аси, бхиккху, чаккху ниччам̣ ва̄ аниччам̣ ва̄’’ти?

‘‘аниччам̣, бханте’’.

‘‘йам̣ пана̄ниччам̣ дуккхам̣ ва̄ там̣ сукхам̣ ва̄’’ти?

‘‘дуккхам̣, бханте’’.

‘‘йам̣ пана̄ниччам̣ дуккхам̣ випарин̣а̄мадхаммам̣, каллам̣ ну там̣ саманупасситум̣ – ‘етам̣ мама, есохамасми, есо ме атта̄’’’ти?

‘‘но хетам̣, бханте’’.

‘‘сотам̣… гха̄нам̣… дживха̄… ка̄йо… мано ниччо ва̄ аниччо ва̄’’ти?

‘‘аниччо, бханте’’.

‘‘йам̣ пана̄ниччам̣ дуккхам̣ ва̄ там̣ сукхам̣ ва̄’’ти?

‘‘дуккхам̣, бханте’’.

‘‘но хетам̣, бханте’’.

‘‘евам̣ пассам̣, бхиккху, сутава̄ арийаса̄вако чаккхусмимпи ниббиндати, сотасмимпи ниббиндати, гха̄насмимпи ниббиндати, дживха̄йапи ниббиндати, ка̄йасмимпи ниббиндати, манасмимпи ниббиндати. ниббиндам̣ вираджджати; вира̄га̄ вимуччати; вимуттасмим̣ вимуттамити н̃а̄н̣ам̣ хоти. ‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’ти паджа̄на̄тӣ’’ти. ека̄дасамам̣.

мигаджа̄лавагго саттамо.

тассудда̄нам̣ –

мигаджа̄лена две вутта̄, чатта̄ро ча самиддхина̄;

упасено упава̄н̣о, чхапхасса̄йатаника̄ тайоти.