8. гила̄навагго

1. пат̣хамагила̄насуттам̣

74. са̄ваттхинида̄нам̣. атха кхо ан̃н̃атаро бхиккху йена бхагава̄ тенупасан̇ками…пе… екамантам̣ нисинно кхо со бхиккху бхагавантам̣ етадавоча – ‘‘амукасмим̣, бханте, виха̄ре ан̃н̃атаро бхиккху наво аппан̃н̃а̄то а̄ба̄дхико дуккхито ба̄л̣хагила̄но. са̄дху, бханте, бхагава̄ йена со бхиккху тенупасан̇камату анукампам̣ упа̄да̄йа̄’’ти.

атха кхо бхагава̄ навава̄дан̃ча сутва̄ гила̄нава̄дан̃ча, ‘‘аппан̃н̃а̄то бхиккхӯ’’ти ити видитва̄ йена со бхиккху тенупасан̇ками. аддаса̄ кхо со бхиккху бхагавантам̣ дӯратова а̄гаччхантам̣. дисва̄на ман̃чаке самадхоси [саман̃чоси (сӣ.), саматеси (сйа̄. кам̣.), саман̃чопи (пӣ.)]. атха кхо бхагава̄ там̣ бхиккхум̣ етадавоча – ‘‘алам̣, бхиккху, ма̄ твам̣ ман̃чаке самадхоси. сантима̄ни а̄сана̄ни пан̃н̃атта̄ни, таттха̄хам̣ нисӣдисса̄мӣ’’ти. нисӣди бхагава̄ пан̃н̃атте а̄сане. нисаджджа кхо бхагава̄ там̣ бхиккхум̣ етадавоча – ‘‘каччи те, бхиккху, кхаманӣйам̣, каччи йа̄панӣйам̣, каччи дуккха̄ ведана̄ пат̣иккаманти но абхиккаманти, пат̣иккамоса̄нам̣ пан̃н̃а̄йати но абхиккамо’’ти?

‘‘на ме, бханте, кхаманӣйам̣, на йа̄панӣйам̣, ба̄л̣ха̄ ме дуккха̄ ведана̄ абхиккаманти но пат̣иккаманти, абхиккамоса̄нам̣ пан̃н̃а̄йати но пат̣иккамо’’ти.

‘‘каччи те, бхиккху, на кин̃чи куккуччам̣, на кочи виппат̣иса̄ро’’ти?

‘‘таггха ме, бханте, анаппакам̣ куккуччам̣, анаппако виппат̣иса̄ро’’ти.

‘‘каччи пана там̣ [твам̣ (сӣ.), те (сйа̄. кам̣. ка.)], бхиккху, атта̄ сӣлато упавадатӣ’’ти?

‘‘на кхо мам̣, бханте, атта̄ сӣлато упавадатӣ’’ти [но хетам̣ бханте (пӣ. ка.)].

‘‘но че кира те, бхиккху, атта̄ сӣлато упавадати, атха кин̃ча [атха кисмин̃ча (сӣ.), атха бхиккху кисмин̃ча (сйа̄. кам̣. пӣ. ка.)] те куккуччам̣ ко ча виппат̣иса̄ро’’ти?

‘‘на кхва̄хам̣, бханте, сӣлависуддхаттхам̣ бхагавата̄ дхаммам̣ деситам̣ а̄джа̄на̄мӣ’’ти.

‘‘но че кира твам̣, бхиккху, сӣлависуддхаттхам̣ майа̄ дхаммам̣ деситам̣ а̄джа̄на̄си, атха киматтхам̣ чарахи твам̣, бхиккху, майа̄ дхаммам̣ деситам̣ а̄джа̄на̄сӣ’’ти?

‘‘ра̄гавира̄гаттхам̣ кхва̄хам̣, бханте, бхагавата̄ дхаммам̣ деситам̣ а̄джа̄на̄мӣ’’ти.

‘‘са̄дху са̄дху, бхиккху! са̄дху кхо твам̣, бхиккху, ра̄гавира̄гаттхам̣ майа̄ дхаммам̣ деситам̣ а̄джа̄на̄си. ра̄гавира̄гаттхо хи, бхиккху, майа̄ дхаммо десито. там̣ ким̣ ман̃н̃аси бхиккху, чаккху ниччам̣ ва̄ аниччам̣ ва̄’’ти?

‘‘аниччам̣, бханте’’.

‘‘йам̣…пе… сотам̣… гха̄нам̣… дживха̄… ка̄йо… мано ниччо ва̄ аниччо ва̄’’ти?

‘‘аниччо, бханте’’.

‘‘йам̣ пана̄ниччам̣ дуккхам̣ ва̄ там̣ сукхам̣ ва̄’’ти?

‘‘дуккхам̣, бханте’’.

‘‘йам̣ пана̄ниччам̣ дуккхам̣ випарин̣а̄мадхаммам̣, каллам̣ ну там̣ саманупасситум̣ – ‘етам̣ мама, есохамасми, есо ме атта̄’’’ти?

‘‘но хетам̣, бханте’’.

‘‘евам̣ пассам̣, бхиккху, сутава̄ арийаса̄вако чаккхусмимпи ниббиндати, сотасмимпи ниббиндати…пе… манасмимпи ниббиндати. ниббиндам̣ вираджджати; вира̄га̄ вимуччати; вимуттасмим̣ вимуттамити н̃а̄н̣ам̣ хоти. ‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣ на̄парам̣ иттхатта̄йа̄’ти паджа̄на̄тӣ’’ти.

идамавоча бхагава̄. аттамано со бхиккху бхагавато бха̄ситам̣ абхинанди. имасмин̃ча пана веййа̄каран̣асмим̣ бхан̃н̃ама̄не тасса бхиккхуно вираджам̣ вӣтамалам̣ дхаммачаккхум̣ удапа̄ди – ‘‘йам̣ кин̃чи самудайадхаммам̣, саббам̣ там̣ ниродхадхамма’’нти. пат̣хамам̣.

2. дутийагила̄насуттам̣

75. атха кхо ан̃н̃атаро бхиккху…пе… бхагавантам̣ етадавоча – ‘‘амукасмим̣, бханте, виха̄ре ан̃н̃атаро бхиккху наво аппан̃н̃а̄то а̄ба̄дхико дуккхито ба̄л̣хагила̄но. са̄дху, бханте, бхагава̄ йена со бхиккху тенупасан̇камату анукампам̣ упа̄да̄йа̄’’ти.

атха кхо бхагава̄ навава̄дан̃ча сутва̄ гила̄нава̄дан̃ча, ‘‘аппан̃н̃а̄то бхиккхӯ’’ти ити видитва̄ йена со бхиккху тенупасан̇ками. аддаса̄ кхо со бхиккху бхагавантам̣ дӯратова а̄гаччхантам̣. дисва̄на ман̃чаке самадхоси. атха кхо бхагава̄ там̣ бхиккхум̣ етадавоча – ‘‘алам̣, бхиккху, ма̄ твам̣ ман̃чаке самадхоси. сантима̄ни а̄сана̄ни пан̃н̃атта̄ни, таттха̄хам̣ нисӣдисса̄мӣ’’ти. нисӣди бхагава̄ пан̃н̃атте а̄сане. нисаджджа кхо бхагава̄ там̣ бхиккхум̣ етадавоча – ‘‘каччи те, бхиккху, кхаманӣйам̣, каччи йа̄панӣйам̣, каччи дуккха̄ ведана̄ пат̣иккаманти но абхиккаманти, пат̣иккамоса̄нам̣ пан̃н̃а̄йати но абхиккамо’’ти?

‘‘на ме, бханте, кхаманӣйам̣, на йа̄панӣйам̣…пе… на кхо мам̣ [ме (саббаттха)], бханте, атта̄ сӣлато упавадатӣ’’ти.

‘‘но че кира те, бхиккху, атта̄ сӣлато упавадати, атха кин̃ча те куккуччам̣ ко ча виппат̣иса̄ро’’ти?

‘‘на кхва̄хам̣, бханте, сӣлависуддхаттхам̣ бхагавата̄ дхаммам̣ деситам̣ а̄джа̄на̄мӣ’’ти.

‘‘анупа̄да̄паринибба̄наттхам̣ кхва̄хам̣, бханте, бхагавата̄ дхаммам̣ деситам̣ а̄джа̄на̄мӣ’’ти.

‘‘са̄дху са̄дху, бхиккху! са̄дху кхо твам̣, бхиккху, анупа̄да̄паринибба̄наттхам̣ майа̄ дхаммам̣ деситам̣ а̄джа̄на̄си. анупа̄да̄паринибба̄наттхо хи, бхиккху, майа̄ дхаммо десито.

‘‘там̣ ким̣ ман̃н̃аси, бхиккху, чаккху ниччам̣ ва̄ аниччам̣ ва̄’’ти?

‘‘аниччам̣, бханте’’.

‘‘йам̣…пе… сотам̣… гха̄нам̣… дживха̄… ка̄йо… мано… мановин̃н̃а̄н̣ам̣… маносампхассо… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи ниччам̣ ва̄ аниччам̣ ва̄’’ти?

‘‘аниччам̣, бханте’’.

‘‘йам̣ пана̄ниччам̣ дуккхам̣ ва̄ там̣ сукхам̣ ва̄’’ти?

‘‘дуккхам̣, бханте’’.

‘‘но хетам̣, бханте’’.

‘‘евам̣ пассам̣, бхиккху, сутава̄ арийаса̄вако чаккхусмимпи ниббиндати…пе… манасмимпи… мановин̃н̃а̄н̣епи… маносампхассепи ниббиндати. йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тасмимпи ниббиндати. ниббиндам̣ вираджджати; вира̄га̄ вимуччати; вимуттасмим̣ вимуттамити н̃а̄н̣ам̣ хоти. ‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’ти паджа̄на̄тӣ’’ти.

идамавоча бхагава̄. аттамано со бхиккху бхагавато бха̄ситам̣ абхинанди. имасмин̃ча пана веййа̄каран̣асмим̣ бхан̃н̃ама̄не тасса бхиккхусса анупа̄да̄йа а̄савехи читтам̣ вимуччӣти [вимуччатӣти (саббаттха)]. дутийам̣.

3. ра̄дхааниччасуттам̣

76. атха кхо а̄йасма̄ ра̄дхо…пе… екамантам̣ нисинно кхо а̄йасма̄ ра̄дхо бхагавантам̣ етадавоча – ‘‘са̄дху ме, бханте, бхагава̄ сам̣кхиттена дхаммам̣ десету, йамахам̣ бхагавато дхаммам̣ сутва̄ еко вӯпакат̣т̣хо аппаматто а̄та̄пӣ пахитатто вихареййа’’нти. ‘‘йам̣ кхо, ра̄дха, аниччам̣ татра те чхандо паха̄таббо. кин̃ча, ра̄дха, аниччам̣ татра те чхандо паха̄таббо? чаккху аниччам̣, рӯпа̄ аничча̄, чаккхувин̃н̃а̄н̣ам̣… чаккхусампхассо… йампидам̣ чаккхусампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи аниччам̣. татра те чхандо паха̄таббо…пе… дживха̄… ка̄йо… мано аниччо. татра те чхандо паха̄таббо. дхамма̄… мановин̃н̃а̄н̣ам̣… маносампхассо… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи аниччам̣. татра те чхандо паха̄таббо. йам̣ кхо, ра̄дха, аниччам̣ татра те чхандо паха̄таббо’’ти. татийам̣.

4. ра̄дхадуккхасуттам̣

77. ‘‘йам̣ кхо, ра̄дха, дуккхам̣ татра те чхандо паха̄таббо. кин̃ча, ра̄дха, дуккхам̣? чаккху кхо, ра̄дха, дуккхам̣. татра те чхандо паха̄таббо. рӯпа̄… чаккхувин̃н̃а̄н̣ам̣… чаккхусампхассо… йампидам̣ чаккхусампхасса…пе… адуккхамасукхам̣ ва̄ тампи дуккхам̣. татра те чхандо паха̄таббо…пе… мано дуккхо… дхамма̄… мановин̃н̃а̄н̣ам̣… маносампхассо… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи дуккхам̣. татра те чхандо паха̄таббо. йам̣ кхо, ра̄дха, дуккхам̣ татра те чхандо паха̄таббо’’ти. чатуттхам̣.

5. ра̄дхаанаттасуттам̣

78. ‘‘йо кхо, ра̄дха, анатта̄ татра те чхандо паха̄таббо. ко ча, ра̄дха, анатта̄? чаккху кхо, ра̄дха, анатта̄. татра те чхандо паха̄таббо. рӯпа̄… чаккхувин̃н̃а̄н̣ам̣… чаккхусампхассо… йампидам̣ чаккхусампхассапаччайа̄…пе… мано анатта̄… дхамма̄… мановин̃н̃а̄н̣ам̣… маносампхассо… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи анатта̄. татра те чхандо паха̄таббо. йо кхо, ра̄дха, анатта̄ татра те чхандо паха̄таббо’’ти. пан̃чамам̣.

6. пат̣хамаавиджджа̄паха̄насуттам̣

79. атха кхо ан̃н̃атаро бхиккху йена бхагава̄ тенупасан̇ками…пе… екамантам̣ нисинно кхо со бхиккху бхагавантам̣ етадавоча – ‘‘аттхи ну кхо, бханте, еко дхаммо йасса паха̄на̄ бхиккхуно авиджджа̄ пахӣйати, виджджа̄ уппаджджатӣ’’ти?

‘‘аттхи кхо, бхиккху, еко дхаммо йасса паха̄на̄ бхиккхуно авиджджа̄ пахӣйати, виджджа̄ уппаджджатӣ’’ти.

‘‘катамо пана, бханте, еко дхаммо йасса паха̄на̄ бхиккхуно авиджджа̄ пахӣйати, виджджа̄ уппаджджатӣ’’ти?

‘‘авиджджа̄ кхо, бхиккху, еко дхаммо йасса паха̄на̄ бхиккхуно авиджджа̄ пахӣйати, виджджа̄ уппаджджатӣ’’ти.

‘‘катхам̣ пана, бханте, джа̄нато, катхам̣ пассато бхиккхуно авиджджа̄ пахӣйати, виджджа̄ уппаджджатӣ’’ти?

‘‘чаккхум̣ кхо, бхиккху, аниччато джа̄нато пассато бхиккхуно авиджджа̄ пахӣйати, виджджа̄ уппаджджати. рӯпе… чаккхувин̃н̃а̄н̣ам̣… чаккхусампхассам̣… йампидам̣, чаккхусампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи аниччато джа̄нато пассато бхиккхуно авиджджа̄ пахӣйати, виджджа̄ уппаджджати…пе… манам̣ аниччато джа̄нато пассато бхиккхуно авиджджа̄ пахӣйати, виджджа̄ уппаджджати. дхамме… мановин̃н̃а̄н̣ам̣… маносампхассам̣… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи аниччато джа̄нато пассато бхиккхуно авиджджа̄ пахӣйати, виджджа̄ уппаджджати. евам̣ кхо, бхиккху, джа̄нато евам̣ пассато бхиккхуно авиджджа̄ пахӣйати, виджджа̄ уппаджджатӣ’’ти. чхат̣т̣хам̣.

7. дутийаавиджджа̄паха̄насуттам̣

80. атха кхо ан̃н̃атаро бхиккху…пе… етадавоча – ‘‘аттхи ну кхо, бханте, еко дхаммо йасса паха̄на̄ бхиккхуно авиджджа̄ пахӣйати, виджджа̄ уппаджджатӣ’’ти?

‘‘аттхи кхо, бхиккху, еко дхаммо йасса паха̄на̄ бхиккхуно авиджджа̄ пахӣйати, виджджа̄ уппаджджатӣ’’ти.

‘‘катхам̣ пана, бханте, джа̄нато, катхам̣ пассато авиджджа̄ пахӣйати, виджджа̄ уппаджджатӣ’’ти?

‘‘идха, бхиккху, бхиккхуно сутам̣ хоти – ‘саббе дхамма̄ на̄лам̣ абхинивеса̄йа̄’ти. еван̃четам̣, бхиккху, бхиккхуно сутам̣ хоти – ‘саббе дхамма̄ на̄лам̣ абхинивеса̄йа̄’ти. со саббам̣ дхаммам̣ абхиджа̄на̄ти, саббам̣ дхаммам̣ абхин̃н̃а̄йа саббам̣ дхаммам̣ париджа̄на̄ти, саббам̣ дхаммам̣ парин̃н̃а̄йа саббанимитта̄ни ан̃н̃ато пассати, чаккхум̣ ан̃н̃ато пассати, рӯпе… чаккхувин̃н̃а̄н̣ам̣… чаккхусампхассам̣… йампидам̣ чаккхусампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи ан̃н̃ато пассати…пе… манам̣ ан̃н̃ато пассати, дхамме… мановин̃н̃а̄н̣ам̣… маносампхассам̣… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи ан̃н̃ато пассати. евам̣ кхо, бхиккху, джа̄нато евам̣ пассато бхиккхуно авиджджа̄ пахӣйати, виджджа̄ уппаджджатӣ’’ти. саттамам̣.

8. самбахулабхиккхусуттам̣

81. атха кхо самбахула̄ бхиккхӯ йена бхагава̄ тенупасан̇камим̣су…пе… екамантам̣ нисинна̄ кхо те бхиккхӯ бхагавантам̣ етадавочум̣ – ‘‘идха но, бханте, ан̃н̃атиттхийа̄ парибба̄джака̄ амхе евам̣ пуччханти – ‘киматтхийам̣, а̄вусо, саман̣е готаме брахмачарийам̣ вуссатӣ’ти? евам̣ пут̣т̣ха̄ майам̣, бханте, тесам̣ ан̃н̃атиттхийа̄нам̣ парибба̄джака̄нам̣ евам̣ бйа̄карома – ‘дуккхасса кхо, а̄вусо, парин̃н̃аттхам̣ бхагавати брахмачарийам̣ вуссатӣ’ти. каччи майам̣, бханте, евам̣ пут̣т̣ха̄ евам̣ бйа̄карама̄на̄ вуттава̄дино чева бхагавато хома, на ча бхагавантам̣ абхӯтена аббха̄чиккха̄ма, дхаммасса ча̄нудхаммам̣ бйа̄карома, на ча кочи сахадхаммико ва̄да̄нува̄до га̄райхам̣ т̣ха̄нам̣ а̄гаччхатӣ’’ти?

‘‘таггха тумхе, бхиккхаве, евам̣ пут̣т̣ха̄ евам̣ бйа̄карама̄на̄ вуттава̄дино чева ме хотха, на ча мам̣ абхӯтена аббха̄чиккхатха, дхаммасса ча̄нудхаммам̣ бйа̄каротха, на ча кочи сахадхаммико ва̄да̄нува̄до га̄райхам̣ т̣ха̄нам̣ а̄гаччхати. дуккхасса хи, бхиккхаве, парин̃н̃аттхам̣ майи брахмачарийам̣ вуссати. саче пана во, бхиккхаве, ан̃н̃атиттхийа̄ парибба̄джака̄ евам̣ пуччхеййум̣ – ‘катамам̣ пана там̣, а̄вусо, дуккхам̣, йасса парин̃н̃а̄йа саман̣е готаме брахмачарийам̣ вуссатӣ’ти? евам̣ пут̣т̣ха̄ тумхе, бхиккхаве, тесам̣ ан̃н̃атиттхийа̄нам̣ парибба̄джака̄нам̣ евам̣ бйа̄кареййа̄тха – ‘чаккху кхо, а̄вусо, дуккхам̣, тасса парин̃н̃а̄йа бхагавати брахмачарийам̣ вуссати. рӯпа̄…пе… йампидам̣ чаккхусампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи дуккхам̣. тасса парин̃н̃а̄йа бхагавати брахмачарийам̣ вуссати…пе… мано дуккхо…пе… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи дуккхам̣. тасса парин̃н̃а̄йа бхагавати брахмачарийам̣ вуссати. идам̣ кхо там̣, а̄вусо, дуккхам̣, тасса парин̃н̃а̄йа бхагавати брахмачарийам̣ вуссатӣ’ти. евам̣ пут̣т̣ха̄ тумхе, бхиккхаве, тесам̣ ан̃н̃атиттхийа̄нам̣ парибба̄джака̄нам̣ евам̣ бйа̄кареййа̄тха̄’’ти. ат̣т̣хамам̣.

9. локапан̃ха̄суттам̣

82. атха кхо ан̃н̃атаро бхиккху йена бхагава̄…пе… екамантам̣ нисинно кхо со бхиккху бхагавантам̣ етадавоча –

‘‘‘локо, локо’ти, бханте, вуччати. китта̄вата̄ ну кхо, бханте, локоти вуччатӣ’’ти? ‘‘‘луджджатӣ’ти кхо, бхиккху, тасма̄ локоти вуччати. кин̃ча луджджати? чаккху кхо, бхиккху, луджджати. рӯпа̄ луджджанти, чаккхувин̃н̃а̄н̣ам̣ луджджати, чаккхусампхассо луджджати, йампидам̣ чаккхусампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи луджджати…пе… дживха̄ луджджати…пе… мано луджджати, дхамма̄ луджджанти, мановин̃н̃а̄н̣ам̣ луджджати, маносампхассо луджджати, йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи луджджати. луджджатӣти кхо, бхиккху, тасма̄ локоти вуччатӣ’’ти. навамам̣.

10. пхаггунапан̃ха̄суттам̣

83. атха кхо а̄йасма̄ пхаггуно…пе… екамантам̣ нисинно кхо а̄йасма̄ пхаггуно бхагавантам̣ етадавоча –

‘‘аттхи ну кхо, бханте, там̣ чаккху, йена чаккхуна̄ атӣте буддхе париниббуте чхиннапапан̃че чхиннават̣уме парийа̄диннават̣т̣е саббадуккхавӣтиват̣т̣е пан̃н̃а̄пайама̄но пан̃н̃а̄пеййа…пе… аттхи ну кхо, бханте, са̄ дживха̄, йа̄йа дживха̄йа атӣте буддхе париниббуте чхиннапапан̃че чхиннават̣уме парийа̄диннават̣т̣е саббадуккхавӣтиват̣т̣е пан̃н̃а̄пайама̄но пан̃н̃а̄пеййа…пе… аттхи ну кхо со, бханте, мано, йена манена атӣте буддхе париниббуте чхиннапапан̃че чхиннават̣уме парийа̄диннават̣т̣е саббадуккхавӣтиват̣т̣е пан̃н̃а̄пайама̄но пан̃н̃а̄пеййа̄’’ти?

‘‘наттхи кхо там̣, пхаггуна, чаккху, йена чаккхуна̄ атӣте буддхе париниббуте чхиннапапан̃че чхиннават̣уме парийа̄диннават̣т̣е саббадуккхавӣтиват̣т̣е пан̃н̃а̄пайама̄но пан̃н̃а̄пеййа …пе… наттхи кхо са̄, пхаггуна, дживха̄, йа̄йа дживха̄йа атӣте буддхе париниббуте чхиннапапан̃че чхиннават̣уме парийа̄диннават̣т̣е саббадуккхавӣтиват̣т̣е пан̃н̃а̄пайама̄но пан̃н̃а̄пеййа…пе… наттхи кхо со, пхаггуна, мано, йена манена атӣте буддхе париниббуте чхиннапапан̃че чхиннават̣уме парийа̄диннават̣т̣е саббадуккхавӣтиват̣т̣е пан̃н̃а̄пайама̄но пан̃н̃а̄пеййа̄’’ти. дасамам̣.

гила̄навагго ат̣т̣хамо.

тассудда̄нам̣ –

гила̄нена дуве вутта̄, ра̄дхена апаре тайо;

авиджджа̄йа ча две вутта̄, бхиккху локо ча пхаггуноти.