8. упава̄н̣асандит̣т̣хикасуттам̣

70. атха кхо а̄йасма̄ упава̄н̣о йена бхагава̄ тенупасан̇ками…пе… екамантам̣ нисинно кхо а̄йасма̄ упава̄н̣о бхагавантам̣ етадавоча – ‘‘‘сандит̣т̣хико дхаммо, сандит̣т̣хико дхаммо’ти, бханте, вуччати. китта̄вата̄ ну кхо, бханте, сандит̣т̣хико дхаммо хоти, ака̄лико ехипассико опанеййико паччаттам̣ ведитаббо вин̃н̃ӯхӣ’’ти?

‘‘идха пана, упава̄н̣а, бхиккху чаккхуна̄ рӯпам̣ дисва̄ рӯпаппат̣исам̣ведӣ ча хоти рӯпара̄гаппат̣исам̣ведӣ ча. сантан̃ча аджджхаттам̣ рӯпесу ра̄гам̣ ‘аттхи ме аджджхаттам̣ рӯпесу ра̄го’ти паджа̄на̄ти. йам̣ там̣, упава̄н̣а, бхиккху чаккхуна̄ рӯпам̣ дисва̄ рӯпаппат̣исам̣ведӣ ча хоти рӯпара̄гаппат̣исам̣ведӣ ча. сантан̃ча аджджхаттам̣ рӯпесу ра̄гам̣ ‘аттхи ме аджджхаттам̣ рӯпесу ра̄го’ти паджа̄на̄ти. евампи кхо, упава̄н̣а, сандит̣т̣хико дхаммо хоти ака̄лико ехипассико опанеййико паччаттам̣ ведитаббо вин̃н̃ӯхӣ’’ти…пе….

‘‘пуна чапарам̣, упава̄н̣а, бхиккху дживха̄йа расам̣ са̄йитва̄ расаппат̣исам̣ведӣ ча хоти расара̄гаппат̣исам̣ведӣ ча. сантан̃ча аджджхаттам̣ расесу ра̄гам̣ ‘аттхи ме аджджхаттам̣ расесу ра̄го’ти паджа̄на̄ти. йам̣ там̣, упава̄н̣а, бхиккху дживха̄йа расам̣ са̄йитва̄ расаппат̣исам̣ведӣ ча хоти расара̄гаппат̣исам̣ведӣ ча. сантан̃ча аджджхаттам̣ расесу ра̄гам̣ ‘аттхи ме аджджхаттам̣ расесу ра̄го’ти паджа̄на̄ти. евампи кхо, упава̄н̣а, сандит̣т̣хико дхаммо хоти ака̄лико ехипассико опанеййико паччаттам̣ ведитаббо вин̃н̃ӯхӣ’’ти…пе….

‘‘пуна чапарам̣, упава̄н̣а, бхиккху манаса̄ дхаммам̣ вин̃н̃а̄йа дхаммаппат̣исам̣ведӣ ча хоти дхаммара̄гаппат̣исам̣ведӣ ча. сантан̃ча аджджхаттам̣ дхаммесу ра̄гам̣ ‘аттхи ме аджджхаттам̣ дхаммесу ра̄го’ти паджа̄на̄ти. йам̣ там̣, упава̄н̣а, бхиккху манаса̄ дхаммам̣ вин̃н̃а̄йа дхаммаппат̣исам̣ведӣ ча хоти дхаммара̄гаппат̣исам̣ведӣ ча. сантан̃ча аджджхаттам̣ дхаммесу ра̄гам̣ ‘аттхи ме аджджхаттам̣ дхаммесу ра̄го’ти паджа̄на̄ти. евампи кхо, упава̄н̣а, сандит̣т̣хико дхаммо хоти…пе… паччаттам̣ ведитаббо вин̃н̃ӯхӣ’’ти…пе….

‘‘идха пана, упава̄н̣а, бхиккху чаккхуна̄ рӯпам̣ дисва̄ рӯпаппат̣исам̣ведӣ ча хоти, но ча рӯпара̄гаппат̣исам̣ведӣ. асантан̃ча аджджхаттам̣ рӯпесу ра̄гам̣ ‘наттхи ме аджджхаттам̣ рӯпесу ра̄го’ти паджа̄на̄ти. йам̣ там̣, упава̄н̣а, бхиккху чаккхуна̄ рӯпам̣ дисва̄ рӯпаппат̣исам̣ведӣхи кхо хоти, но ча рӯпара̄гаппат̣исам̣ведӣ. асантан̃ча аджджхаттам̣ рӯпесу ра̄гам̣ ‘наттхи ме аджджхаттам̣ рӯпесу ра̄го’ти паджа̄на̄ти. евампи кхо, упава̄н̣а, сандит̣т̣хико дхаммо хоти, ака̄лико ехипассико опанеййико паччаттам̣ ведитаббо вин̃н̃ӯхӣ’’ти…пе….

‘‘пуна чапарам̣, упава̄н̣а, бхиккху дживха̄йа расам̣ са̄йитва̄ расаппат̣исам̣ведӣхи кхо хоти, но ча расара̄гаппат̣исам̣ведӣ. асантан̃ча аджджхаттам̣ расесу ра̄гам̣ ‘наттхи ме аджджхаттам̣ расесу ра̄го’ти паджа̄на̄ти…пе….

‘‘пуна чапарам̣, упава̄н̣а, бхиккху манаса̄ дхаммам̣ вин̃н̃а̄йа дхаммаппат̣исам̣ведӣхи кхо хоти, но ча дхаммара̄гаппат̣исам̣ведӣ. асантан̃ча аджджхаттам̣ дхаммесу ра̄гам̣ ‘наттхи ме аджджхаттам̣ дхаммесу ра̄го’ти паджа̄на̄ти. йам̣ там̣, упава̄н̣а, бхиккху манаса̄ дхаммам̣ вин̃н̃а̄йа дхаммаппат̣исам̣ведӣхи кхо хоти, но ча дхаммара̄гаппат̣исам̣ведӣ. асантан̃ча аджджхаттам̣ дхаммесу ра̄гам̣ ‘наттхи ме аджджхаттам̣ дхаммесу ра̄го’ти паджа̄на̄ти. евампи кхо, упава̄н̣а, сандит̣т̣хико дхаммо хоти, ака̄лико ехипассико опанеййико паччаттам̣ ведитаббо вин̃н̃ӯхӣ’’ти. ат̣т̣хамам̣.