2. сам̣йоджанапаха̄насуттам̣

54. ‘‘катхам̣ ну кхо, бханте, джа̄нато, катхам̣ пассато, сам̣йоджана̄ пахӣйантӣ’’ти? ‘‘чаккхум̣ кхо, бхиккху, аниччато джа̄нато пассато сам̣йоджана̄ пахӣйанти. рӯпе… чаккхувин̃н̃а̄н̣ам̣… чаккхусампхассам̣… йампидам̣ чаккхусампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи аниччато джа̄нато пассато сам̣йоджана̄ пахӣйанти. сотам̣… гха̄нам̣… дживхам̣… ка̄йам̣… манам̣… дхамме… мановин̃н̃а̄н̣ам̣… маносампхассам̣… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи аниччато джа̄нато пассато сам̣йоджана̄ пахӣйанти. евам̣ кхо, бхиккху, джа̄нато евам̣ пассато сам̣йоджана̄ пахӣйантӣ’’ти. дутийам̣.