1. авиджджа̄паха̄насуттам̣

53. са̄ваттхинида̄нам̣. атха кхо ан̃н̃атаро бхиккху йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо со бхиккху бхагавантам̣ етадавоча – ‘‘катхам̣ ну кхо, бханте, джа̄нато катхам̣ пассато авиджджа̄ пахӣйати, виджджа̄ уппаджджатӣ’’ти?

‘‘чаккхум̣ кхо, бхиккху, аниччато джа̄нато пассато авиджджа̄ пахӣйати, виджджа̄ уппаджджати. рӯпе аниччато джа̄нато пассато авиджджа̄ пахӣйати, виджджа̄ уппаджджати. чаккхувин̃н̃а̄н̣ам̣… чаккхусампхассам̣… йампидам̣ чаккхусампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи аниччато джа̄нато пассато авиджджа̄ пахӣйати, виджджа̄ уппаджджати. сотам̣… гха̄нам̣… дживхам̣… ка̄йам̣… манам̣ аниччато джа̄нато пассато авиджджа̄ пахӣйати, виджджа̄ уппаджджати. дхамме … мановин̃н̃а̄н̣ам̣… маносампхассам̣… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи аниччато джа̄нато пассато авиджджа̄ пахӣйати, виджджа̄ уппаджджати. евам̣ кхо, бхиккху, джа̄нато евам̣ пассато авиджджа̄ пахӣйати, виджджа̄ уппаджджатӣ’’ти. пат̣хамам̣.