8. самуггха̄таса̄руппасуттам̣

30. ‘‘саббаман̃н̃итасамуггха̄таса̄руппам̣ во, бхиккхаве, пат̣ипадам̣ десесса̄ми. там̣ сун̣а̄тха, са̄дхукам̣ манаси каротха; бха̄сисса̄мӣти. катама̄ ча са̄, бхиккхаве, саббаман̃н̃итасамуггха̄таса̄руппа̄ пат̣ипада̄? идха, бхиккхаве, бхиккху чаккхум̣ на ман̃н̃ати, чаккхусмим̣ на ман̃н̃ати, чаккхуто на ман̃н̃ати, чаккхум̣ мети на ман̃н̃ати. рӯпе на ман̃н̃ати, рӯпесу на ман̃н̃ати, рӯпато на ман̃н̃ати, рӯпа̄ мети на ман̃н̃ати. чаккхувин̃н̃а̄н̣ам̣ на ман̃н̃ати, чаккхувин̃н̃а̄н̣асмим̣ на ман̃н̃ати, чаккхувин̃н̃а̄н̣ато на ман̃н̃ати, чаккхувин̃н̃а̄н̣ам̣ мети на ман̃н̃ати. чаккхусампхассам̣ на ман̃н̃ати, чаккхусампхассасмим̣ на ман̃н̃ати, чаккхусампхассато на ман̃н̃ати, чаккхусампхассо мети на ман̃н̃ати. йампидам̣ чаккхусампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи на ман̃н̃ати, тасмимпи на ман̃н̃ати, татопи на ман̃н̃ати, там̣ мети на ман̃н̃ати…пе… дживхам̣ на ман̃н̃ати, дживха̄йа на ман̃н̃ати, дживха̄то на ман̃н̃ати, дживха̄ мети на ман̃н̃ати. расе на ман̃н̃ати, расесу на ман̃н̃ати, расато на ман̃н̃ати, раса̄ мети на ман̃н̃ати. дживха̄вин̃н̃а̄н̣ам̣ на ман̃н̃ати, дживха̄вин̃н̃а̄н̣асмим̣ на ман̃н̃ати, дживха̄вин̃н̃а̄н̣ато на ман̃н̃ати, дживха̄вин̃н̃а̄н̣ам̣ мети на ман̃н̃ати. дживха̄сампхассам̣ на ман̃н̃ати, дживха̄сампхассасмим̣ на ман̃н̃ати, дживха̄сампхассато на ман̃н̃ати, дживха̄сампхассо мети на ман̃н̃ати. йампидам̣ дживха̄сампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи на ман̃н̃ати, тасмимпи на ман̃н̃ати, татопи на ман̃н̃ати, там̣ мети на ман̃н̃ати…пе… манам̣ на ман̃н̃ати, манасмим̣ на ман̃н̃ати, манато на ман̃н̃ати, мано мети на ман̃н̃ати. дхамме на ман̃н̃ати, дхаммесу на ман̃н̃ати, дхаммато на ман̃н̃ати, дхамма̄ мети на ман̃н̃ати. мановин̃н̃а̄н̣ам̣ на ман̃н̃ати, мановин̃н̃а̄н̣асмим̣ на ман̃н̃ати, мановин̃н̃а̄н̣ато на ман̃н̃ати, мановин̃н̃а̄н̣ам̣ мети на ман̃н̃ати. маносампхассам̣ на ман̃н̃ати, маносампхассасмим̣ на ман̃н̃ати, маносампхассато на ман̃н̃ати, маносампхассо мети на ман̃н̃ати. йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи на ман̃н̃ати, тасмимпи на ман̃н̃ати, татопи на ман̃н̃ати, там̣ мети на ман̃н̃ати. саббам̣ на ман̃н̃ати, саббасмим̣ на ман̃н̃ати, саббато на ман̃н̃ати, саббам̣ мети на ман̃н̃ати. со евам̣ аман̃н̃ама̄но на ча кин̃чи локе упа̄дийати. анупа̄дийам̣ на паритассати. апаритассам̣ паччаттан̃н̃ева паринибба̄йати. ‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’ти паджа̄на̄ти. айам̣ кхо са̄, бхиккхаве, саббаман̃н̃итасамуггха̄таса̄руппа̄ пат̣ипада̄’’ти. ат̣т̣хамам̣.