7. аддхабхӯтасуттам̣

29. евам̣ ме сутам̣ – екам̣ самайам̣ бхагава̄ ра̄джагахе вихарати вел̣уване каландаканива̄пе. татра кхо бхагава̄ бхиккхӯ а̄мантеси – ‘‘саббам̣, бхиккхаве, аддхабхӯтам̣ [андхабхӯтам̣ (сӣ. сйа̄. кам̣.)]. кин̃ча, бхиккхаве, саббам̣ аддхабхӯтам̣? чаккху, бхиккхаве, аддхабхӯтам̣, рӯпа̄ аддхабхӯта̄, чаккхувин̃н̃а̄н̣ам̣ аддхабхӯтам̣, чаккхусампхассо аддхабхӯто, йампидам̣ чаккхусампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи аддхабхӯтам̣. кена аддхабхӯтам̣? ‘джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи аддхабхӯта’нти вада̄ми…пе… дживха̄ аддхабхӯта̄, раса̄ аддхабхӯта̄, дживха̄вин̃н̃а̄н̣ам̣ аддхабхӯтам̣, дживха̄сампхассо аддхабхӯто, йампидам̣ дживха̄сампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи аддхабхӯтам̣. кена аддхабхӯтам̣? ‘джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи аддхабхӯта’нти вада̄ми. ка̄йо аддхабхӯто…пе… мано аддхабхӯто, дхамма̄ аддхабхӯта̄, мановин̃н̃а̄н̣ам̣ аддхабхӯтам̣, маносампхассо аддхабхӯто, йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи аддхабхӯтам̣. кена аддхабхӯтам̣? ‘джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи аддхабхӯта’нти вада̄ми. евам̣ пассам̣, бхиккхаве, сутава̄ арийаса̄вако чаккхусмимпи ниббиндати, рӯпесупи ниббиндати, чаккхувин̃н̃а̄н̣епи ниббиндати, чаккхусампхассепи ниббиндати…пе… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тасмимпи ниббиндати. ниббиндам̣ вираджджати, вира̄га̄ вимуччати, вимуттасмим̣ ‘вимутта’мити н̃а̄н̣ам̣ хоти, ‘кхӣн̣а̄ джа̄ти вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’ти паджа̄на̄тӣ’’ти. саттамам̣.