10. верахачча̄нисуттам̣

133. екам̣ самайам̣ а̄йасма̄ уда̄йӣ ка̄ман̣д̣а̄йам̣ вихарати тодеййасса бра̄хман̣асса амбаване. атха кхо верахачча̄ниготта̄йа бра̄хман̣ийа̄ антева̄сӣ ма̄н̣авако йена̄йасма̄ уда̄йӣ тенупасан̇ками; упасан̇камитва̄ а̄йасмата̄ уда̄йина̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисиннам̣ кхо там̣ ма̄н̣авакам̣ а̄йасма̄ уда̄йӣ дхаммийа̄ катха̄йа сандассеси сама̄дапеси самуттеджеси сампахам̣сеси. атха кхо со ма̄н̣авако а̄йасмата̄ уда̄йина̄ дхаммийа̄ катха̄йа сандассито сама̄дапито самуттеджито сампахам̣сито ут̣т̣ха̄йа̄сана̄ йена верахачча̄ниготта̄ бра̄хман̣ӣ тенупасан̇ками; упасан̇камитва̄ верахачча̄ниготтам̣ бра̄хман̣им̣ етадавоча – ‘‘йаггхе, бхоти, джа̄неййа̄си [бхоти джа̄неййа (сӣ. пӣ. ка.), бхотӣ джа̄неййа (сйа̄. кам̣.)]! саман̣о уда̄йӣ дхаммам̣ десети а̄дикалйа̄н̣ам̣ маджджхекалйа̄н̣ам̣ парийоса̄накалйа̄н̣ам̣, са̄ттхам̣ сабйан̃джанам̣ кевалапарипун̣н̣ам̣ парисуддхам̣ брахмачарийам̣ пака̄сетӣ’’ти.

‘‘тена хи твам̣, ма̄н̣авака, мама вачанена саман̣ам̣ уда̄йим̣ нимантехи сва̄тана̄йа бхаттена̄’’ти. ‘‘евам̣ бхотӣ’’ти кхо со ма̄н̣авако верахачча̄ниготта̄йа бра̄хман̣ийа̄ пат̣иссутва̄ йена̄йасма̄ уда̄йӣ тенупасан̇ками; упасан̇камитва̄ а̄йасмантам̣ уда̄йим̣ етадавоча – ‘‘адхива̄сету кира, бхавам̣, уда̄йи, амха̄кам̣ а̄чарийабхарийа̄йа верахачча̄ниготта̄йа бра̄хман̣ийа̄ сва̄тана̄йа бхатта’’нти. адхива̄сеси кхо а̄йасма̄ уда̄йӣ тун̣хӣбха̄вена. атха кхо а̄йасма̄ уда̄йӣ тасса̄ раттийа̄ аччайена пуббан̣хасамайам̣ нива̄сетва̄ паттачӣварама̄да̄йа йена верахачча̄ниготта̄йа бра̄хман̣ийа̄ нивесанам̣ тенупасан̇ками; упасан̇камитва̄ пан̃н̃атте а̄сане нисӣди. атха кхо верахачча̄ниготта̄ бра̄хман̣ӣ а̄йасмантам̣ уда̄йим̣ пан̣ӣтена кха̄данӣйена бходжанӣйена сахаттха̄ сантаппеси сампава̄реси. атха кхо верахачча̄ниготта̄ бра̄хман̣ӣ а̄йасмантам̣ уда̄йим̣ бхутта̄вим̣ онӣтапаттапа̄н̣им̣ па̄дука̄ а̄рохитва̄ учче а̄сане нисӣдитва̄ сӣсам̣ огун̣т̣хитва̄ а̄йасмантам̣ уда̄йим̣ етадавоча – ‘‘бхан̣а, саман̣а, дхамма’’нти. ‘‘бхависсати, бхагини, самайо’’ти ватва̄ ут̣т̣ха̄йа̄сана̄ пакками [пакка̄ми (сйа̄. кам̣. пӣ.)].

дутийампи кхо со ма̄н̣авако йена̄йасма̄ уда̄йӣ тенупасан̇ками; упасан̇камитва̄ а̄йасмата̄ уда̄йина̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисиннам̣ кхо там̣ ма̄н̣авакам̣ а̄йасма̄ уда̄йӣ дхаммийа̄ катха̄йа сандассеси сама̄дапеси самуттеджеси сампахам̣сеси. дутийампи кхо со ма̄н̣авако а̄йасмата̄ уда̄йина̄ дхаммийа̄ катха̄йа сандассито сама̄дапито самуттеджито сампахам̣сито ут̣т̣ха̄йа̄сана̄ йена верахачча̄ниготта̄ бра̄хман̣ӣ тенупасан̇ками; упасан̇камитва̄ верахачча̄ниготтам̣ бра̄хман̣им̣ етадавоча – ‘‘йаггхе, бхоти, джа̄неййа̄си! саман̣о уда̄йӣ дхаммам̣ десети а̄дикалйа̄н̣ам̣ маджджхекалйа̄н̣ам̣ парийоса̄накалйа̄н̣ам̣, са̄ттхам̣ сабйан̃джанам̣ кевалапарипун̣н̣ам̣ парисуддхам̣ брахмачарийам̣ пака̄сетӣ’’ти.

‘‘евамевам̣ пана твам̣, ма̄н̣авака, саман̣асса уда̄йисса ван̣н̣ам̣ бха̄саси. саман̣о пануда̄йӣ ‘бхан̣а, саман̣а, дхамма’нти вутто сама̄но ‘бхависсати, бхагини, самайо’ти ватва̄ ут̣т̣ха̄йа̄сана̄ пакканто’’ти. ‘‘татха̄ хи пана твам̣, бхоти, па̄дука̄ а̄рохитва̄ учче а̄сане нисӣдитва̄ сӣсам̣ огун̣т̣хитва̄ етадавоча – ‘бхан̣а, саман̣а, дхамма’нти. дхаммагаруно хи те бхаванто дхаммага̄рава̄’’ти. ‘‘тена хи твам̣, ма̄н̣авака, мама вачанена саман̣ам̣ уда̄йим̣ нимантехи сва̄тана̄йа бхаттена̄’’ти. ‘‘евам̣, бхотӣ’’ти кхо со ма̄н̣авако верахачча̄ниготта̄йа бра̄хман̣ийа̄ пат̣иссутва̄ йена̄йасма̄ уда̄йӣ тенупасан̇ками; упасан̇камитва̄ а̄йасмантам̣ уда̄йим̣ етадавоча – ‘‘адхива̄сету кира бхавам̣ уда̄йӣ амха̄кам̣ а̄чарийабхарийа̄йа верахачча̄ниготта̄йа бра̄хман̣ийа̄ сва̄тана̄йа бхатта’’нти. адхива̄сеси кхо а̄йасма̄ уда̄йӣ тун̣хӣбха̄вена.

атха кхо а̄йасма̄ уда̄йӣ тасса̄ раттийа̄ аччайена пуббан̣хасамайам̣ нива̄сетва̄ паттачӣварама̄да̄йа йена верахачча̄ниготта̄йа бра̄хман̣ийа̄ нивесанам̣ тенупасан̇ками; упасан̇камитва̄ пан̃н̃атте а̄сане нисӣди. атха кхо верахачча̄ниготта̄ бра̄хман̣ӣ а̄йасмантам̣ уда̄йим̣ пан̣ӣтена кха̄данӣйена бходжанӣйена сахаттха̄ сантаппеси сампава̄реси. атха кхо верахачча̄ниготта̄ бра̄хман̣ӣ а̄йасмантам̣ уда̄йим̣ бхутта̄вим̣ онӣтапаттапа̄н̣им̣ па̄дука̄ орохитва̄ нӣче а̄сане нисӣдитва̄ сӣсам̣ виваритва̄ а̄йасмантам̣ уда̄йим̣ етадавоча – ‘‘кисмим̣ ну кхо, бханте, сати араханто сукхадуккхам̣ пан̃н̃апенти, кисмим̣ асати араханто сукхадуккхам̣ на пан̃н̃апентӣ’’ти?

‘‘чаккхусмим̣ кхо, бхагини, сати араханто сукхадуккхам̣ пан̃н̃апенти, чаккхусмим̣ асати араханто сукхадуккхам̣ на пан̃н̃апенти…пе… дживха̄йа сати араханто сукхадуккхам̣ пан̃н̃апенти, дживха̄йа асати араханто сукхадуккхам̣ на пан̃н̃апенти…пе…. манасмим̣ сати араханто сукхадуккхам̣ пан̃н̃апенти, манасмим̣ асати араханто сукхадуккхам̣ на пан̃н̃апентӣ’’ти.

евам̣ вутте, верахачча̄ниготта̄ бра̄хман̣ӣ а̄йасмантам̣ уда̄йим̣ етадавоча – ‘‘абхиккантам̣, бханте; абхиккантам̣, бханте! сеййатха̄пи, бханте, никкуджджитам̣ ва̄ уккуджджеййа, пат̣иччханнам̣ ва̄ вивареййа, мӯл̣хасса ва̄ маггам̣ а̄чиккхеййа, андхака̄ре ва̄ телападжджотам̣ дха̄реййа, чаккхуманто рӯпа̄ни даккхантӣти; евамевам̣ аййена уда̄йина̄ анекапарийа̄йена дхаммо пака̄сито. еса̄хам̣, аййа уда̄йи, там̣ бхагавантам̣ саран̣ам̣ гаччха̄ми, дхамман̃ча, бхиккхусан̇гхан̃ча. упа̄сикам̣ мам̣ аййо уда̄йӣ дха̄рету аджджатагге па̄н̣упетам̣ саран̣ам̣ гата’’нти. дасамам̣.

гахапативагго терасамо.

тассудда̄нам̣ –

веса̄лӣ ваджджи на̄л̣анда̄, бха̄радва̄джа сон̣о ча гхосито;

ха̄лиддико накулапита̄, лохиччо верахачча̄нӣти.