10. удакасуттам̣

103. ‘‘удако [уддако (сӣ. пӣ.)] судам̣, бхиккхаве, ра̄мапутто евам̣ ва̄чам̣ бха̄сати – ‘идам̣ джа̄ту ведагӯ, идам̣ джа̄ту саббаджӣ [саббаджи (пӣ.)], идам̣ джа̄ту апаликхатам̣ ган̣д̣амӯлам̣ паликхан̣и’нти. там̣ кхо панетам̣, бхиккхаве, удако ра̄мапутто аведагӯйева сама̄но ‘ведагӯсмӣ’ти бха̄сати, асаббаджӣйева сама̄но ‘саббаджӣсмӣ’ти бха̄сати, апаликхатам̣йева ган̣д̣амӯлам̣ паликхатам̣ ме ‘ган̣д̣амӯла’нти бха̄сати. идха кхо там̣, бхиккхаве, бхиккху самма̄ вадама̄но вадеййа – ‘идам̣ джа̄ту ведагӯ, идам̣ джа̄ту саббаджӣ, идам̣ джа̄ту апаликхатам̣ ган̣д̣амӯлам̣ паликхан̣и’’’нти.

‘‘катхан̃ча, бхиккхаве, ведагӯ хоти? йато кхо, бхиккхаве, бхиккху чханнам̣ пхасса̄йатана̄нам̣ самудайан̃ча аттхан̇гаман̃ча асса̄дан̃ча а̄дӣнаван̃ча ниссаран̣ан̃ча йатха̄бхӯтам̣ паджа̄на̄ти; евам̣ кхо, бхиккхаве, бхиккху ведагӯ хоти.

‘‘катхан̃ча, бхиккхаве, бхиккху саббаджӣ хоти? йато кхо, бхиккхаве, бхиккху чханнам̣ пхасса̄йатана̄нам̣ самудайан̃ча аттхан̇гаман̃ча асса̄дан̃ча а̄дӣнаван̃ча ниссаран̣ан̃ча йатха̄бхӯтам̣ видитва̄ анупа̄да̄вимутто хоти; евам̣ кхо, бхиккхаве, бхиккху саббаджӣ хоти.

‘‘катхан̃ча, бхиккхаве, бхиккхуно апаликхатам̣ ган̣д̣амӯлам̣ паликхатам̣ хоти? ган̣д̣оти кхо, бхиккхаве, имассетам̣ ча̄тумаха̄бхӯтикасса ка̄йасса адхивачанам̣ ма̄та̄петтикасамбхавасса оданакумма̄сӯпачайасса аниччуччха̄данапаримадданабхеданавиддхам̣санадхаммасса. ган̣д̣амӯланти кхо, бхиккхаве, тан̣ха̄йетам̣ адхивачанам̣. йато кхо, бхиккхаве, бхиккхуно тан̣ха̄ пахӣна̄ хоти уччхиннамӯла̄ та̄ла̄ваттхуката̄ анабха̄ван̇ката̄ а̄йатим̣ ануппа̄дадхамма̄; евам̣ кхо, бхиккхаве, бхиккхуно апаликхатам̣ ган̣д̣амӯлам̣ паликхатам̣ хоти.

‘‘удако судам̣, бхиккхаве, ра̄мапутто евам̣ ва̄чам̣ бха̄сати – ‘идам̣ джа̄ту ведагӯ, идам̣ джа̄ту саббаджӣ, идам̣ джа̄ту апаликхатам̣ ган̣д̣амӯлам̣ паликхан̣и’нти. там̣ кхо панетам̣, бхиккхаве, удако ра̄мапутто аведагӯйева сама̄но ‘ведагӯсмӣ’ти бха̄сати, асаббаджӣйева сама̄но ‘саббаджӣсмӣ’ти бха̄сати; апаликхатам̣йева ган̣д̣амӯлам̣ ‘паликхатам̣ ме ган̣д̣амӯла’нти бха̄сати. идха кхо там̣, бхиккхаве, бхиккху самма̄ вадама̄но вадеййа – ‘идам̣ джа̄ту ведагӯ, идам̣ джа̄ту саббаджӣ, идам̣ джа̄ту апаликхатам̣ ган̣д̣амӯлам̣ паликхан̣и’’’нти. дасамам̣.

сал̣авагго дасамо.

тассудда̄нам̣ –

две сам̣гайха̄ париха̄нам̣, пама̄давиха̄рӣ ча сам̣варо;

сама̄дхи пат̣исалла̄нам̣, две натумха̄кена уддакоти.

сал̣а̄йатанавагге дутийапан̣н̣а̄сако саматто.

тасса ваггудда̄нам̣ –

авиджджа̄ мигаджа̄лан̃ча, гила̄нам̣ чханнам̣ чатуттхакам̣;

сал̣аваггена пан̃н̃а̄сам̣, дутийо пан̣н̣а̄сако айанти.

пат̣хамасатакам̣.