1. адантаагуттасуттам̣

94. са̄ваттхинида̄нам̣. ‘‘чхайиме, бхиккхаве, пхасса̄йатана̄ аданта̄ агутта̄ араккхита̄ асам̣вута̄ дуккха̄дхива̄ха̄ хонти. катаме чха? чаккху, бхиккхаве, пхасса̄йатанам̣ адантам̣ агуттам̣ араккхитам̣ асам̣вутам̣ дуккха̄дхива̄хам̣ хоти…пе… дживха̄, бхиккхаве, пхасса̄йатанам̣ адантам̣ агуттам̣ араккхитам̣ асам̣вутам̣ дуккха̄дхива̄хам̣ хоти…пе… мано, бхиккхаве, пхасса̄йатанам̣ адантам̣ агуттам̣ араккхитам̣ асам̣вутам̣ дуккха̄дхива̄хам̣ хоти. име кхо, бхиккхаве, чха пхасса̄йатана̄ аданта̄ агутта̄ араккхита̄ асам̣вута̄ дуккха̄дхива̄ха̄ хонти’’.

‘‘чхайиме, бхиккхаве, пхасса̄йатана̄ суданта̄ сугутта̄ сураккхита̄ сусам̣вута̄ сукха̄дхива̄ха̄ хонти. катаме чха? чаккху, бхиккхаве, пхасса̄йатанам̣ судантам̣ сугуттам̣ сураккхитам̣ сусам̣вутам̣ сукха̄дхива̄хам̣ хоти…пе… дживха̄, бхиккхаве, пхасса̄йатанам̣ судантам̣ сугуттам̣ сураккхитам̣ сусам̣вутам̣ сукха̄дхива̄хам̣ хоти…пе… мано, бхиккхаве, пхасса̄йатанам̣ судантам̣ сугуттам̣ сураккхитам̣ сусам̣вутам̣ сукха̄дхива̄хам̣ хоти. име кхо, бхиккхаве, чха пхасса̄йатана̄ суданта̄ сугутта̄ сураккхита̄ сусам̣вута̄ сукха̄дхива̄ха̄ хонтӣ’’ти. идамавоча бхагава̄…пе… етадавоча саттха̄ –

‘‘сал̣ева [чхал̣ева (ка.)] пхасса̄йатана̄ни бхиккхаво,

асам̣вуто йаттха дуккхам̣ нигаччхати;

тесан̃ча йе сам̣варан̣ам̣ аведисум̣,

саддха̄дутийа̄ вихаранта̄навассута̄.

‘‘дисва̄на рӯпа̄ни манорама̄ни,

атхопи дисва̄на аманорама̄ни;

манораме ра̄гапатхам̣ винодайе,

на ча̄ппийам̣ мети манам̣ падосайе.

‘‘саддан̃ча сутва̄ дубхайам̣ пийа̄ппийам̣,

пийамхи садде на самуччхито сийа̄;

атхоппийе досагатам̣ винодайе,

на ча̄ппийам̣ мети манам̣ падосайе.

‘‘гандхан̃ча гхатва̄ сурабхим̣ манорамам̣,

атхопи гхатва̄ асучим̣ акантийам̣;

акантийасмим̣ пат̣игхам̣ винодайе,

чханда̄нунӣто на ча кантийе сийа̄.

‘‘расан̃ча бхотва̄на аса̄дитан̃ча са̄дум̣,

атхопи бхотва̄на аса̄думекада̄;

са̄дум̣ расам̣ на̄джджхоса̄йа бхун̃дже,

виродхама̄са̄дусу нопадам̣сайе.

‘‘пхассена пхут̣т̣хо на сукхена мадждже [маджджхе (сйа̄. кам̣. пӣ.)],

дуккхена пхут̣т̣хопи на сампаведхе;

пхассадвайам̣ сукхадуккхе упеккхе,

ана̄нуруддхо авируддха кеначи.

‘‘папан̃часан̃н̃а̄ итарӣтара̄ нара̄,

папан̃чайанта̄ упайанти сан̃н̃ино;

маномайам̣ гехаситан̃ча саббам̣,

пануджджа неккхаммаситам̣ ирӣйати.

‘‘евам̣ мано чхассу йада̄ субха̄вито,

пхут̣т̣хасса читтам̣ на викампате квачи;

те ра̄гадосе абхибхуййа бхиккхаво,

бхаваттха [бхаватха (сӣ. сйа̄. кам̣.)] джа̄тимаран̣асса па̄рага̄’’ти. пат̣хамам̣;