2. ма̄лукйапуттасуттам̣

95. атха кхо а̄йасма̄ ма̄лукйапутто [ма̄лун̇кйапутто (сӣ.)] йена бхагава̄ тенупасан̇ками…пе… екамантам̣ нисинно кхо а̄йасма̄ ма̄лукйапутто бхагавантам̣ етадавоча – ‘‘са̄дху ме, бханте, бхагава̄ сам̣кхиттена дхаммам̣ десету, йамахам̣ бхагавато дхаммам̣ сутва̄ еко вӯпакат̣т̣хо аппаматто а̄та̄пӣ пахитатто вихареййа’’нти.

‘‘еттха да̄ни, ма̄лукйапутта, ким̣ дахаре бхиккхӯ ваккха̄ма! йатра хи на̄ма твам̣, бхиккху, джин̣н̣о вуддхо махаллако аддхагато вайоануппатто сам̣кхиттена ова̄дам̣ йа̄часӣ’’ти.

‘‘кин̃ча̄па̄хам̣, бханте, джин̣н̣о вуддхо махаллако аддхагато вайоануппатто. десету ме, бханте, бхагава̄ сам̣кхиттена дхаммам̣, десету сугато сам̣кхиттена дхаммам̣, аппева на̄ма̄хам̣ бхагавато бха̄ситасса аттхам̣ а̄джа̄неййам̣. аппева на̄ма̄хам̣ бхагавато бха̄ситасса да̄йа̄до асса’’нти.

‘‘там̣ ким̣ ман̃н̃аси, ма̄лукйапутта, йе те чаккхувин̃н̃еййа̄ рӯпа̄ адит̣т̣ха̄ адит̣т̣хапубба̄, на ча пассаси, на ча те хоти пассеййанти? аттхи те таттха чхандо ва̄ ра̄го ва̄ пемам̣ ва̄’’ти? ‘‘но хетам̣, бханте’’.

‘‘йе те сотавин̃н̃еййа̄ садда̄ ассута̄ ассутапубба̄, на ча сун̣а̄си, на ча те хоти сун̣еййанти? аттхи те таттха чхандо ва̄ ра̄го ва̄ пемам̣ ва̄’’ти? ‘‘но хетам̣, бханте’’.

‘‘йе те гха̄навин̃н̃еййа̄ гандха̄ агха̄йита̄ агха̄йитапубба̄, на ча гха̄йаси, на ча те хоти гха̄йеййанти? аттхи те таттха чхандо ва̄ ра̄го ва̄ пемам̣ ва̄’’ти? ‘‘но хетам̣, бханте’’.

‘‘йе те дживха̄вин̃н̃еййа̄ раса̄ аса̄йита̄ аса̄йитапубба̄, на ча са̄йаси, на ча те хоти са̄йеййанти? аттхи те таттха чхандо ва̄ ра̄го ва̄ пемам̣ ва̄’’ти? ‘‘но хетам̣, бханте’’.

‘‘йе те ка̄йавин̃н̃еййа̄ пхот̣т̣хабба̄ асампхут̣т̣ха̄ асампхут̣т̣хапубба̄, на ча пхусаси, на ча те хоти пхусеййанти? аттхи те таттха чхандо ва̄ ра̄го ва̄ пемам̣ ва̄’’ти? ‘‘но хетам̣, бханте’’.

‘‘йе те мановин̃н̃еййа̄ дхамма̄ авин̃н̃а̄та̄ авин̃н̃а̄тапубба̄, на ча виджа̄на̄си, на ча те хоти виджа̄неййанти? аттхи те таттха чхандо ва̄ ра̄го ва̄ пемам̣ ва̄’’ти? ‘‘но хетам̣, бханте’’.

‘‘еттха ча те, ма̄лукйапутта, дит̣т̣хасутамутавин̃н̃а̄таббесу дхаммесу дит̣т̣хе дит̣т̣хаматтам̣ бхависсати, суте сутаматтам̣ бхависсати, муте мутаматтам̣ бхависсати, вин̃н̃а̄те вин̃н̃а̄таматтам̣ бхависсати. йато кхо те, ма̄лукйапутта, дит̣т̣хасутамутавин̃н̃а̄таббесу дхаммесу дит̣т̣хе дит̣т̣хаматтам̣ бхависсати, суте сутаматтам̣ бхависсати, муте мутаматтам̣ бхависсати, вин̃н̃а̄те вин̃н̃а̄таматтам̣ бхависсати; тато твам̣, ма̄лукйапутта, на тена. йато твам̣, ма̄лукйапутта, на тена; тато твам̣, ма̄лукйапутта, на таттха. йато твам̣, ма̄лукйапутта, на таттха; тато твам̣, ма̄лукйапутта, невидха, на хурам̣, на убхайамантарена. есеванто дуккхасса̄’’ти.

‘‘имасса кхва̄хам̣, бханте, бхагавата̄ сам̣кхиттена бха̄ситасса виттха̄рена аттхам̣ а̄джа̄на̄ми –

‘‘рӯпам̣ дисва̄ сати мут̣т̣ха̄, пийам̣ нимиттам̣ манаси карото;

са̄раттачитто ведети, тан̃ча аджджхоса [аджджхоса̄йа (сӣ.)] тит̣т̣хати.

‘‘тасса вад̣д̣ханти ведана̄, анека̄ рӯпасамбхава̄;

абхиджджха̄ ча вихеса̄ ча, читтамассӯпахан̃н̃ати;

евам̣ а̄чинато дуккхам̣, а̄ра̄ нибба̄намуччати.

‘‘саддам̣ сутва̄ сати мут̣т̣ха̄, пийам̣ нимиттам̣ манаси карото;

са̄раттачитто ведети, тан̃ча аджджхоса тит̣т̣хати.

‘‘тасса вад̣д̣ханти ведана̄, анека̄ саддасамбхава̄;

абхиджджха̄ ча вихеса̄ ча, читтамассӯпахан̃н̃ати;

евам̣ а̄чинато дуккхам̣, а̄ра̄ нибба̄намуччати.

‘‘гандхам̣ гхатва̄ сати мут̣т̣ха̄, пийам̣ нимиттам̣ манаси карото;

са̄раттачитто ведети, тан̃ча аджджхоса тит̣т̣хати.

‘‘тасса вад̣д̣ханти ведана̄, анека̄ гандхасамбхава̄;

абхиджджха̄ ча вихеса̄ ча, читтамассӯпахан̃н̃ати;

евам̣ а̄чинато дуккхам̣, а̄ра̄ нибба̄намуччати.

‘‘расам̣ бхотва̄ сати мут̣т̣ха̄, пийам̣ нимиттам̣ манаси карото;

са̄раттачитто ведети, тан̃ча аджджхоса тит̣т̣хати.

‘‘тасса вад̣д̣ханти ведана̄, анека̄ расасамбхава̄;

абхиджджха̄ ча вихеса̄ ча, читтамассӯпахан̃н̃ати;

евам̣ а̄чинато дуккхам̣, а̄ра̄ нибба̄намуччати.

‘‘пхассам̣ пхусса сати мут̣т̣ха̄, пийам̣ нимиттам̣ манаси карото;

са̄раттачитто ведети, тан̃ча аджджхоса тит̣т̣хати.

‘‘тасса вад̣д̣ханти ведана̄, анека̄ пхассасамбхава̄;

абхиджджха̄ ча вихеса̄ ча, читтамассӯпахан̃н̃ати;

евам̣ а̄чинато дуккхам̣, а̄ра̄ нибба̄намуччати.

‘‘дхаммам̣ н̃атва̄ сати мут̣т̣ха̄, пийам̣ нимиттам̣ манаси карото;

са̄раттачитто ведети, тан̃ча аджджхоса тит̣т̣хати.

‘‘тасса вад̣д̣ханти ведана̄, анека̄ дхаммасамбхава̄;

абхиджджха̄ ча вихеса̄ ча, читтамассӯпахан̃н̃ати;

евам̣ а̄чинато дуккхам̣, а̄ра̄ нибба̄намуччати.

‘‘на со раджджати рӯпесу, рӯпам̣ дисва̄ пат̣иссато;

вираттачитто ведети, тан̃ча на̄джджхоса тит̣т̣хати.

‘‘йатха̄сса пассато рӯпам̣, севато ча̄пи веданам̣;

кхӣйати нопачӣйати, евам̣ со чаратӣ сато;

евам̣ апачинато дуккхам̣, сантике нибба̄намуччати.

‘‘на со раджджати саддесу, саддам̣ сутва̄ пат̣иссато;

вираттачитто ведети, тан̃ча на̄джджхоса тит̣т̣хати.

‘‘йатха̄сса сун̣ато саддам̣, севато ча̄пи веданам̣;

кхӣйати нопачӣйати, евам̣ со чаратӣ сато;

евам̣ апачинато дуккхам̣, сантике нибба̄намуччати.

‘‘на со раджджати гандхесу, гандхам̣ гхатва̄ пат̣иссато;

вираттачитто ведети, тан̃ча на̄джджхоса тит̣т̣хати.

‘‘йатха̄сса гха̄йато гандхам̣, севато ча̄пи веданам̣;

кхӣйати нопачӣйати, евам̣ со чаратӣ сато;

евам̣ апачинато дуккхам̣, сантике нибба̄намуччати.

‘‘на со раджджати расесу, расам̣ бхотва̄ пат̣иссато;

вираттачитто ведети, тан̃ча на̄джджхоса тит̣т̣хати.

‘‘йатха̄сса са̄йато расам̣, севато ча̄пи веданам̣;

кхӣйати нопачӣйати, евам̣ со чаратӣ сато;

евам̣ апачинато дуккхам̣, сантике нибба̄намуччати.

‘‘на со раджджати пхассесу, пхассам̣ пхусса пат̣иссато;

вираттачитто ведети, тан̃ча на̄джджхоса тит̣т̣хати.

‘‘йатха̄сса пхусато пхассам̣, севато ча̄пи веданам̣;

кхӣйати нопачӣйати, евам̣ со чаратӣ сато;

евам̣ апачинато дуккхам̣, сантике нибба̄намуччати.

‘‘на со раджджати дхаммесу, дхаммам̣ н̃атва̄ пат̣иссато;

вираттачитто ведети, тан̃ча на̄джджхоса тит̣т̣хати.

‘‘йатха̄сса джа̄нато дхаммам̣, севато ча̄пи веданам̣;

кхӣйати нопачӣйати, евам̣ со чаратӣ сато;

евам̣ апачинато дуккхам̣, сантике нибба̄намуччатӣ’’ти.

‘‘имасса кхва̄хам̣, бханте, бхагавата̄ сам̣кхиттена бха̄ситасса евам̣ виттха̄рена аттхам̣ а̄джа̄на̄мӣ’’ти. ‘‘са̄дху са̄дху, ма̄лукйапутта! са̄дху кхо твам̣, ма̄лукйапутта, майа̄ сам̣кхиттена бха̄ситасса виттха̄рена аттхам̣ а̄джа̄на̄си –

‘‘рӯпам̣ дисва̄ сати мут̣т̣ха̄, пийам̣ нимиттам̣ манаси карото;

са̄раттачитто ведети, тан̃ча аджджхоса тит̣т̣хати.

‘‘тасса вад̣д̣ханти ведана̄, анека̄ рӯпасамбхава̄;

абхиджджха̄ ча вихеса̄ ча, читтамассӯпахан̃н̃ати;

евам̣ а̄чинато дуккхам̣, а̄ра̄ нибба̄намуччати.…пе….

‘‘на со раджджати дхаммесу, дхаммам̣ н̃атва̄ пат̣иссато;

вираттачитто ведети, тан̃ча на̄джджхоса тит̣т̣хати.

‘‘йатха̄сса виджа̄нато дхаммам̣, севато ча̄пи веданам̣;

кхӣйати нопачӣйати, евам̣ со чаратӣ сато;

евам̣ апачинато дуккхам̣, сантике нибба̄намуччатӣ’’ти.

‘‘имасса кхо, ма̄лукйапутта, майа̄ сам̣кхиттена бха̄ситасса евам̣ виттха̄рена аттхо дат̣т̣хаббо’’ти.

атха кхо а̄йасма̄ ма̄лукйапутто бхагавато бха̄ситам̣ абхинандитва̄ анумодитва̄ ут̣т̣ха̄йа̄сана̄ бхагавантам̣ абхива̄детва̄ падаккхин̣ам̣ катва̄ пакка̄ми. атха кхо а̄йасма̄ ма̄лукйапутто еко вӯпакат̣т̣хо аппаматто а̄та̄пӣ пахитатто вихаранто начирассева – йассаттха̄йа кулапутта̄ саммадева ага̄расма̄ анага̄рийам̣ паббаджанти тадануттарам̣ брахмачарийапарийоса̄нам̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа виха̄си. ‘‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’’ти аббхан̃н̃а̄си. ан̃н̃атаро ча пана̄йасма̄ ма̄лукйапутто арахатам̣ ахосӣти. дутийам̣.