2. бӣджасуттам̣

54. са̄ваттхинида̄нам̣. ‘‘пан̃чима̄ни, бхиккхаве, бӣджаджа̄та̄ни. катама̄ни пан̃ча? мӯлабӣджам̣, кхандхабӣджам̣, аггабӣджам̣, пхалубӣджам̣, бӣджабӣджан̃н̃ева пан̃чамам̣. има̄ни чассу, бхиккхаве, пан̃ча бӣджаджа̄та̄ни акхан̣д̣а̄ни апӯтика̄ни ава̄та̄тапахата̄ни са̄ра̄да̄ни [са̄ра̄да̄йӣни (каттхачи)] сукхасайита̄ни, патхавӣ [пат̣хавӣ (сӣ. сйа̄. кам̣. пӣ.)] ча на̄сса, а̄по ча на̄сса; апи нума̄ни [апи ну има̄ни (сӣ. пӣ.)], бхиккхаве, пан̃ча бӣджаджа̄та̄ни вуддхим̣ вирӯл̣хим̣ вепуллам̣ а̄паджджеййу’’нти? ‘‘но хетам̣, бханте’’. ‘‘има̄ни чассу, бхиккхаве, пан̃ча бӣджаджа̄та̄ни акхан̣д̣а̄ни…пе… сукхасайита̄ни, патхавӣ ча асса, а̄по ча асса; апи нума̄ни, бхиккхаве, пан̃ча бӣджаджа̄та̄ни вуддхим̣ вирӯл̣хим̣ вепуллам̣ а̄паджджеййу’’нти? ‘‘евам̣, бханте’’. ‘‘сеййатха̄пи, бхиккхаве, патхавӣдха̄ту, евам̣ чатассо вин̃н̃а̄н̣ат̣т̣хитийо дат̣т̣хабба̄. сеййатха̄пи, бхиккхаве, а̄подха̄ту, евам̣ нандира̄го дат̣т̣хаббо. сеййатха̄пи, бхиккхаве, пан̃ча бӣджаджа̄та̄ни, евам̣ вин̃н̃а̄н̣ам̣ са̄ха̄рам̣ дат̣т̣хаббам̣’’.

‘‘рӯпупайам̣, бхиккхаве, вин̃н̃а̄н̣ам̣ тит̣т̣хама̄нам̣ тит̣т̣хеййа, рӯпа̄рамман̣ам̣ рӯпаппатит̣т̣хам̣ нандӯпасечанам̣ вуддхим̣ вирӯл̣хим̣ вепуллам̣ а̄паджджеййа. веданупайам̣ ва̄, бхиккхаве, вин̃н̃а̄н̣ам̣ тит̣т̣хама̄нам̣ тит̣т̣хеййа…пе… сан̃н̃упайам̣ ва̄, бхиккхаве, вин̃н̃а̄н̣ам̣ тит̣т̣хама̄нам̣ тит̣т̣хеййа…пе… сан̇кха̄рупайам̣ ва̄, бхиккхаве, вин̃н̃а̄н̣ам̣ тит̣т̣хама̄нам̣ тит̣т̣хеййа, сан̇кха̄ра̄рамман̣ам̣ сан̇кха̄раппатит̣т̣хам̣ нандӯпасечанам̣ вуддхим̣ вирӯл̣хим̣ вепуллам̣ а̄паджджеййа.

‘‘йо, бхиккхаве, евам̣ вадеййа – ‘ахаман̃н̃атра рӯпа̄ ан̃н̃атра ведана̄йа ан̃н̃атра сан̃н̃а̄йа ан̃н̃атра сан̇кха̄рехи вин̃н̃а̄н̣асса а̄гатим̣ ва̄ гатим̣ ва̄ чутим̣ ва̄ упапаттим̣ ва̄ вуддхим̣ ва̄ вирӯл̣хим̣ ва̄ вепуллам̣ ва̄ пан̃н̃а̄песса̄мӣ’ти, нетам̣ т̣ха̄нам̣ виджджати.

‘‘рӯпадха̄туйа̄ чева, бхиккхаве, бхиккхуно ра̄го пахӣно хоти. ра̄гасса паха̄на̄ воччхиджджата̄рамман̣ам̣ патит̣т̣ха̄ вин̃н̃а̄н̣асса на хоти. ведана̄дха̄туйа̄ че… сан̃н̃а̄дха̄туйа̄ че… сан̇кха̄радха̄туйа̄ че… вин̃н̃а̄н̣адха̄туйа̄ че, бхиккхаве, бхиккхуно ра̄го пахӣно хоти. ра̄гасса паха̄на̄ воччхиджджата̄рамман̣ам̣ патит̣т̣ха̄ вин̃н̃а̄н̣асса на хоти. тадаппатит̣т̣хитам̣ вин̃н̃а̄н̣ам̣ авирӯл̣хам̣ анабхисан̇кхаччавимуттам̣. вимуттатта̄ т̣хитам̣. т̣хитатта̄ сантуситам̣. сантуситатта̄ на паритассати. апаритассам̣ паччаттан̃н̃ева паринибба̄йати. ‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’ти паджа̄на̄тӣ’’ти. дутийам̣.