7. сон̣асуттам̣

49. евам̣ ме сутам̣ – екам̣ самайам̣ бхагава̄ ра̄джагахе вихарати вел̣уване каландаканива̄пе. атха кхо сон̣о гахапатипутто йена бхагава̄ тенупасан̇ками …пе… екамантам̣ нисиннам̣ кхо сон̣ам̣ гахапатипуттам̣ бхагава̄ етадавоча –

‘‘йе хи кечи, сон̣а, саман̣а̄ ва̄ бра̄хман̣а̄ ва̄ аниччена рӯпена дуккхена випарин̣а̄мадхаммена ‘сеййохамасмӣ’ти ва̄ саманупассанти; ‘садисохамасмӣ’ти ва̄ саманупассанти; ‘хӣнохамасмӣ’ти ва̄ саманупассанти; киман̃н̃атра йатха̄бхӯтасса адассана̄? аничча̄йа ведана̄йа дуккха̄йа випарин̣а̄мадхамма̄йа ‘сеййохамасмӣ’ти ва̄ саманупассанти; ‘садисохамасмӣ’ти ва̄ саманупассанти; ‘хӣнохамасмӣ’ти ва̄ саманупассанти; киман̃н̃атра йатха̄бхӯтасса адассана̄? аничча̄йа сан̃н̃а̄йа… аниччехи сан̇кха̄рехи дуккхехи випарин̣а̄мадхаммехи ‘сеййохамасмӣ’ти ва̄ саманупассанти; ‘садисохамасмӣ’ти ва̄ саманупассанти; ‘хӣнохамасмӣ’ти ва̄ саманупассанти; киман̃н̃атра йатха̄бхӯтасса адассана̄? аниччена вин̃н̃а̄н̣ена дуккхена випарин̣а̄мадхаммена ‘сеййохамасмӣ’ти ва̄ саманупассанти; ‘садисохамасмӣ’ти ва̄ саманупассанти; ‘хӣнохамасмӣ’ти ва̄ саманупассанти; киман̃н̃атра йатха̄бхӯтасса адассана̄?

‘‘йе ча кхо кечи, сон̣а, саман̣а̄ ва̄ бра̄хман̣а̄ ва̄ аниччена рӯпена дуккхена випарин̣а̄мадхаммена ‘сеййохамасмӣ’типи на саманупассанти; ‘садисохамасмӣ’типи на саманупассанти; ‘хӣнохамасмӣ’типи на саманупассанти; киман̃н̃атра йатха̄бхӯтасса дассана̄? аничча̄йа ведана̄йа… аничча̄йа сан̃н̃а̄йа… аниччехи сан̇кха̄рехи… аниччена вин̃н̃а̄н̣ена дуккхена випарин̣а̄мадхаммена ‘сеййохамасмӣ’типи на саманупассанти; ‘садисохамасмӣ’типи на саманупассанти; ‘хӣнохамасмӣ’типи на саманупассанти; киман̃н̃атра йатха̄бхӯтасса дассана̄?

‘‘там̣ ким̣ ман̃н̃аси, сон̣а, рӯпам̣ ниччам̣ ва̄ аниччам̣ ва̄’’ти? ‘‘аниччам̣, бханте’’. ‘‘йам̣ пана̄ниччам̣ дуккхам̣ ва̄ там̣ сукхам̣ ва̄’’ти? ‘‘дуккхам̣, бханте’’. ‘‘йам̣ пана̄ниччам̣ дуккхам̣ випарин̣а̄мадхаммам̣ каллам̣ ну там̣ саманупасситум̣ – ‘етам̣ мама, есохамасми, есо ме атта̄’’’ти? ‘‘но хетам̣, бханте’’. ‘‘ведана̄ ничча̄ ва̄ аничча̄ ва̄’’ти? ‘‘аничча̄, бханте’’… ‘‘сан̃н̃а̄… сан̇кха̄ра̄… вин̃н̃а̄н̣ам̣ ниччам̣ ва̄ аниччам̣ ва̄’’ти? ‘‘аниччам̣, бханте’’. ‘‘йам̣ пана̄ниччам̣ дуккхам̣ ва̄ там̣ сукхам̣ ва̄’’ти? ‘‘дуккхам̣, бханте’’. ‘‘йам̣ пана̄ниччам̣ дуккхам̣ випарин̣а̄мадхаммам̣ каллам̣ ну там̣ саманупасситум̣ – ‘етам̣ мама, есохамасми, есо ме атта̄’’’ти? ‘‘но хетам̣, бханте’’.

‘‘тасма̄тиха, сон̣а, йам̣ кин̃чи рӯпам̣ атӣта̄на̄гатапаччуппаннам̣ аджджхаттам̣ ва̄ бахиддха̄ ва̄ ол̣а̄рикам̣ ва̄ сукхумам̣ ва̄ хӣнам̣ ва̄ пан̣ӣтам̣ ва̄ йам̣ дӯре сантике ва̄, саббам̣ рӯпам̣ ‘нетам̣ мама, несохамасми, на месо атта̄’ти еваметам̣ йатха̄бхӯтам̣ саммаппан̃н̃а̄йа дат̣т̣хаббам̣.

‘‘йа̄ ка̄чи ведана̄… йа̄ ка̄чи сан̃н̃а̄… йе кечи сан̇кха̄ра̄… йам̣ кин̃чи вин̃н̃а̄н̣ам̣ атӣта̄на̄гатапаччуппаннам̣ аджджхаттам̣ ва̄ бахиддха̄ ва̄ ол̣а̄рикам̣ ва̄ сукхумам̣ ва̄ хӣнам̣ ва̄ пан̣ӣтам̣ ва̄ йам̣ дӯре сантике ва̄, саббам̣ вин̃н̃а̄н̣ам̣ ‘нетам̣ мама, несохамасми, на месо атта̄’ти еваметам̣ йатха̄бхӯтам̣ саммаппан̃н̃а̄йа дат̣т̣хаббам̣.

‘‘евам̣ пассам̣, сон̣а, сутава̄ арийаса̄вако рӯпасмимпи ниббиндати, ведана̄йапи ниббиндати, сан̃н̃а̄йапи ниббиндати, сан̇кха̄ресупи ниббиндати, вин̃н̃а̄н̣асмимпи ниббиндати. ниббиндам̣ вираджджати; вира̄га̄ вимуччати. вимуттасмим̣ вимуттамити н̃а̄н̣ам̣ хоти. ‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’ти паджа̄на̄тӣ’’ти. саттамам̣.