8. дутийасон̣асуттам̣

50. евам̣ ме сутам̣ – екам̣ самайам̣ бхагава̄ ра̄джагахе вихарати вел̣уване каландаканива̄пе. атха кхо сон̣о гахапатипутто йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо сон̣ам̣ гахапатипуттам̣ бхагава̄ етадавоча –

‘‘йе хи кечи, сон̣а, саман̣а̄ ва̄ бра̄хман̣а̄ ва̄ рӯпам̣ наппаджа̄нанти, рӯпасамудайам̣ наппаджа̄нанти, рӯпаниродхам̣ наппаджа̄нанти, рӯпаниродхага̄миним̣ пат̣ипадам̣ наппаджа̄нанти; веданам̣ наппаджа̄нанти, ведана̄самудайам̣ наппаджа̄нанти, ведана̄ниродхам̣ наппаджа̄нанти, ведана̄ниродхага̄миним̣ пат̣ипадам̣ наппаджа̄нанти; сан̃н̃ам̣ наппаджа̄нанти…пе… сан̇кха̄ре наппаджа̄нанти, сан̇кха̄расамудайам̣ наппаджа̄нанти, сан̇кха̄раниродхам̣ наппаджа̄нанти, сан̇кха̄раниродхага̄миним̣ пат̣ипадам̣ наппаджа̄нанти; вин̃н̃а̄н̣ам̣ наппаджа̄нанти, вин̃н̃а̄н̣асамудайам̣ наппаджа̄нанти, вин̃н̃а̄н̣аниродхам̣ наппаджа̄нанти, вин̃н̃а̄н̣аниродхага̄миним̣ пат̣ипадам̣ наппаджа̄нанти. на ме те, сон̣а, саман̣а̄ ва̄ бра̄хман̣а̄ ва̄ саман̣есу ва̄ саман̣асаммата̄ бра̄хман̣есу ва̄ бра̄хман̣асаммата̄, на ча пана те а̄йасманто са̄ман̃н̃аттхам̣ ва̄ брахман̃н̃аттхам̣ ва̄ дит̣т̣хева дхамме сайам̣ абхин̃н̃а̄ саччхикатва̄ упасампаджджа вихаранти.

‘‘йе ча кхо кечи, сон̣а, саман̣а̄ ва̄ бра̄хман̣а̄ ва̄ рӯпам̣ паджа̄нанти, рӯпасамудайам̣ паджа̄нанти, рӯпаниродхам̣ паджа̄нанти, рӯпаниродхага̄миним̣ пат̣ипадам̣ паджа̄нанти; веданам̣ паджа̄нанти…пе… сан̃н̃ам̣ паджа̄нанти… сан̇кха̄ре паджа̄нанти… вин̃н̃а̄н̣ам̣ паджа̄нанти, вин̃н̃а̄н̣асамудайам̣ паджа̄нанти, вин̃н̃а̄н̣аниродхам̣ паджа̄нанти, вин̃н̃а̄н̣аниродхага̄миним̣ пат̣ипадам̣ паджа̄нанти. те ча кхо ме, сон̣а, саман̣а̄ ва̄ бра̄хман̣а̄ ва̄ саман̣есу чева саман̣асаммата̄ бра̄хман̣есу ча бра̄хман̣асаммата̄, те ча пана̄йасманто са̄ман̃н̃аттхан̃ча брахман̃н̃аттхан̃ча дит̣т̣хева дхамме сайам̣ абхин̃н̃а̄ саччхикатва̄ упасампаджджа вихарантӣ’’ти. ат̣т̣хамам̣.