4. дутийааниччасуттам̣

46. са̄ваттхинида̄нам̣. ‘‘рӯпам̣, бхиккхаве, аниччам̣. йаданиччам̣ там̣ дуккхам̣; йам̣ дуккхам̣ таданатта̄; йаданатта̄ там̣ ‘нетам̣ мама, несохамасми, на месо атта̄’ти еваметам̣ йатха̄бхӯтам̣ саммаппан̃н̃а̄йа дат̣т̣хаббам̣. ведана̄ аничча̄… сан̃н̃а̄ аничча̄… сан̇кха̄ра̄ аничча̄… вин̃н̃а̄н̣ам̣ аниччам̣. йаданиччам̣ там̣ дуккхам̣; йам̣ дуккхам̣ таданатта̄; йаданатта̄ там̣ ‘нетам̣ мама, несохамасми, на месо атта̄’ти еваметам̣ йатха̄бхӯтам̣ саммаппан̃н̃а̄йа дат̣т̣хаббам̣’’.

‘‘еваметам̣ йатха̄бхӯтам̣ саммаппан̃н̃а̄йа пассато пуббанта̄нудит̣т̣хийо на хонти. пуббанта̄нудит̣т̣хӣнам̣ асати, апаранта̄нудит̣т̣хийо на хонти. апаранта̄нудит̣т̣хӣнам̣ асати, тха̄масо [тха̄маса̄ (сӣ. сйа̄. кам̣.)] пара̄ма̄со на хоти. тха̄масе [тха̄маса̄ (сӣ. сйа̄. кам̣.), тха̄масо (ка.)] пара̄ма̄се асати рӯпасмим̣… ведана̄йа … сан̃н̃а̄йа… сан̇кха̄ресу… вин̃н̃а̄н̣асмим̣ читтам̣ вираджджати вимуччати анупа̄да̄йа а̄савехи. вимуттатта̄ т̣хитам̣. т̣хитатта̄ сантуситам̣. сантуситатта̄ на паритассати. апаритассам̣ паччаттан̃н̃ева паринибба̄йати. ‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’ти паджа̄на̄тӣ’’ти. чатуттхам̣.