3. аниччасуттам̣

45. са̄ваттхинида̄нам̣. ‘‘рӯпам̣, бхиккхаве, аниччам̣. йаданиччам̣ там̣ дуккхам̣; йам̣ дуккхам̣ таданатта̄; йаданатта̄ там̣ ‘нетам̣ мама, несохамасми, на месо атта̄’ти еваметам̣ йатха̄бхӯтам̣ саммаппан̃н̃а̄йа дат̣т̣хаббам̣. еваметам̣ йатха̄бхӯтам̣ саммаппан̃н̃а̄йа пассато читтам̣ вираджджати вимуччати анупа̄да̄йа а̄савехи. ведана̄ аничча̄… сан̃н̃а̄… сан̇кха̄ра̄… вин̃н̃а̄н̣ам̣ аниччам̣. йаданиччам̣ там̣ дуккхам̣; йам̣ дуккхам̣ таданатта̄; йаданатта̄ там̣ ‘нетам̣ мама, несохамасми, на месо атта̄’ти еваметам̣ йатха̄бхӯтам̣ саммаппан̃н̃а̄йа дат̣т̣хаббам̣. еваметам̣ йатха̄бхӯтам̣ саммаппан̃н̃а̄йа пассато читтам̣ вираджджати вимуччати анупа̄да̄йа а̄савехи. рӯпадха̄туйа̄ че, бхиккхаве, бхиккхуно читтам̣ вираттам̣ вимуттам̣ хоти анупа̄да̄йа а̄савехи, ведана̄дха̄туйа̄…пе… сан̃н̃а̄дха̄туйа̄… сан̇кха̄радха̄туйа̄… вин̃н̃а̄н̣адха̄туйа̄ че, бхиккхаве, бхиккхуно читтам̣ вираттам̣ вимуттам̣ хоти анупа̄да̄йа а̄савехи. вимуттатта̄ т̣хитам̣. т̣хитатта̄ сантуситам̣ [сантусситам̣ (ка. сӣ. пӣ. ка.)]. сантуситатта̄ на паритассати. апаритассам̣ паччаттан̃н̃ева паринибба̄йати. ‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’ти паджа̄на̄тӣ’’ти. татийам̣.