10. а̄нандасуттам̣

21. са̄ваттхийам̣ … а̄ра̄ме. атха кхо а̄йасма̄ а̄нандо йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ а̄нандо бхагавантам̣ етадавоча – ‘‘‘ниродхо ниродхо’ти, бханте, вуччати. катамеса̄нам̣ кхо, бханте, дхамма̄нам̣ ниродхо [ниродха̄ (сӣ. пӣ.)] ‘ниродхо’ти вуччатӣ’’ти? ‘‘рӯпам̣ кхо, а̄нанда, аниччам̣ сан̇кхатам̣ пат̣иччасамуппаннам̣ кхайадхаммам̣ вайадхаммам̣ вира̄гадхаммам̣ ниродхадхаммам̣. тасса ниродхо [ниродха̄ (сӣ. пӣ.)] ‘ниродхо’ти вуччати. ведана̄ аничча̄ сан̇кхата̄ пат̣иччасамуппанна̄ кхайадхамма̄ вайадхамма̄ вира̄гадхамма̄ ниродхадхамма̄. тасса̄ ниродхо ‘ниродхо’ти вуччати. сан̃н̃а̄… сан̇кха̄ра̄ аничча̄ сан̇кхата̄ пат̣иччасамуппанна̄ кхайадхамма̄ вайадхамма̄ вира̄гадхамма̄ ниродхадхамма̄. тесам̣ ниродхо ‘ниродхо’ти вуччати. вин̃н̃а̄н̣ам̣ аниччам̣ сан̇кхатам̣ пат̣иччасамуппаннам̣ кхайадхаммам̣ вайадхаммам̣ вира̄гадхаммам̣ ниродхадхаммам̣. тасса ниродхо ‘ниродхо’ти вуччати. имесам̣ кхо, а̄нанда, дхамма̄нам̣ ниродхо ‘ниродхо’ти вуччатӣ’’ти. дасамам̣.

аниччавагго дутийо.

тассудда̄нам̣ –

аниччам̣ дуккхам̣ анатта̄, йаданичча̄паре тайо;

хетуна̄пи тайо вутта̄, а̄нандена ча те даса̄ти.