2. дутийасамудайадхаммасуттам̣

127. екам̣ самайам̣ а̄йасма̄ ча са̄рипутто а̄йасма̄ ча маха̄кот̣т̣хико ба̄ра̄н̣асийам̣ вихаранти исипатане мигада̄йе. атха кхо а̄йасма̄ маха̄кот̣т̣хико са̄йанхасамайам̣ пат̣исалла̄на̄ вут̣т̣хито…пе… екамантам̣ нисинно кхо а̄йасма̄ маха̄кот̣т̣хико а̄йасмантам̣ са̄рипуттам̣ етадавоча – ‘‘‘авиджджа̄, авиджджа̄’ти, а̄вусо са̄рипутта, вуччати. катама̄ ну кхо, а̄вусо, авиджджа̄, китта̄вата̄ ча авиджджа̄гато хотӣ’’ти?

‘‘идха̄вусо ассутава̄ путхуджджано самудайадхаммам̣ рӯпам̣ ‘самудайадхаммам̣ рӯпа’нти йатха̄бхӯтам̣ наппаджа̄на̄ти; вайадхаммам̣ рӯпам̣…пе… ‘самудайавайадхаммам̣ рӯпа’нти йатха̄бхӯтам̣ наппаджа̄на̄ти. самудайадхаммам̣ веданам̣…пе… вайадхаммам̣ веданам̣…пе… ‘самудайавайадхамма̄ ведана̄’ти йатха̄бхӯтам̣ наппаджа̄на̄ти. самудайадхаммам̣ сан̃н̃ам̣…пе… самудайадхамме сан̇кха̄ре…пе… вайадхамме сан̇кха̄ре…пе… самудайавайадхамме сан̇кха̄ре ‘самудайавайадхамма̄ сан̇кха̄ра̄’ти йатха̄бхӯтам̣ наппаджа̄на̄ти. самудайадхаммам̣ вин̃н̃а̄н̣ам̣…пе… самудайавайадхаммам̣ вин̃н̃а̄н̣ам̣ ‘самудайавайадхаммам̣ вин̃н̃а̄н̣а’нти йатха̄бхӯтам̣ наппаджа̄на̄ти. айам̣ вуччати, а̄вусо, авиджджа̄; етта̄вата̄ ча авиджджа̄гато хотӣ’’ти. дутийам̣.