1. самудайадхаммасуттам̣

126. са̄ваттхинида̄нам̣. атха кхо ан̃н̃атаро бхиккху йена бхагава̄ тенупасан̇ками; упасан̇камитва̄…пе… екамантам̣ нисинно кхо со бхиккху бхагавантам̣ етадавоча – ‘‘‘авиджджа̄ авиджджа̄’ти, бханте, вуччати. катама̄ ну кхо, бханте, авиджджа̄, китта̄вата̄ ча авиджджа̄гато хотӣ’’ти?

‘‘идха, бхиккху, ассутава̄ путхуджджано самудайадхаммам̣ рӯпам̣ ‘самудайадхаммам̣ рӯпа’нти йатха̄бхӯтам̣ наппаджа̄на̄ти; вайадхаммам̣ рӯпам̣ ‘вайадхаммам̣ рӯпа’нти йатха̄бхӯтам̣ наппаджа̄на̄ти; самудайавайадхаммам̣ рӯпам̣ ‘самудайавайадхаммам̣ рӯпа’нти йатха̄бхӯтам̣ наппаджа̄на̄ти. самудайадхаммам̣ веданам̣ ‘самудайадхамма̄ ведана̄’ти йатха̄бхӯтам̣ наппаджа̄на̄ти; вайадхаммам̣ веданам̣ ‘вайадхамма̄ ведана̄’ти йатха̄бхӯтам̣ наппаджа̄на̄ти; самудайавайадхаммам̣ веданам̣ ‘самудайавайадхамма̄ ведана̄’ти йатха̄бхӯтам̣ наппаджа̄на̄ти. самудайадхаммам̣ сан̃н̃ам̣…пе… самудайадхамме сан̇кха̄ре ‘самудайадхамма̄ сан̇кха̄ра̄’ти йатха̄бхӯтам̣ наппаджа̄на̄ти; вайадхамме сан̇кха̄ре ‘вайадхамма̄ сан̇кха̄ра̄’ти йатха̄бхӯтам̣ наппаджа̄на̄ти; самудайавайадхамме сан̇кха̄ре ‘самудайавайадхамма̄ сан̇кха̄ра̄’ти йатха̄бхӯтам̣ наппаджа̄на̄ти. самудайадхаммам̣ вин̃н̃а̄н̣ам̣ ‘самудайадхаммам̣ вин̃н̃а̄н̣а’нти йатха̄бхӯтам̣ наппаджа̄на̄ти; вайадхаммам̣ вин̃н̃а̄н̣ам̣ ‘вайадхаммам̣ вин̃н̃а̄н̣а’нти йатха̄бхӯтам̣ наппаджа̄на̄ти; самудайавайадхаммам̣ вин̃н̃а̄н̣ам̣ ‘самудайавайадхаммам̣ вин̃н̃а̄н̣а’нти йатха̄бхӯтам̣ наппаджа̄на̄ти. айам̣ вуччати, бхиккху, авиджджа̄; етта̄вата̄ ча авиджджа̄гато хотӣ’’ти.

евам̣ вутте, со бхиккху бхагавантам̣ етадавоча – ‘‘‘виджджа̄ виджджа̄’ти, бханте, вуччати. катама̄ ну кхо, бханте, виджджа̄, китта̄вата̄ ча виджджа̄гато хотӣ’’ти?

‘‘идха, бхиккху, сутава̄ арийаса̄вако самудайадхаммам̣ рӯпам̣ ‘самудайадхаммам̣ рӯпа’нти йатха̄бхӯтам̣ паджа̄на̄ти; вайадхаммам̣ рӯпам̣ ‘вайадхаммам̣ рӯпа’нти йатха̄бхӯтам̣ паджа̄на̄ти; самудайавайадхаммам̣ рӯпам̣ ‘самудайавайадхаммам̣ рӯпа’нти йатха̄бхӯтам̣ паджа̄на̄ти. самудайадхаммам̣ веданам̣ ‘самудайадхамма̄ ведана̄’ти йатха̄бхӯтам̣ паджа̄на̄ти; вайадхаммам̣ веданам̣ ‘вайадхамма̄ ведана̄’ти йатха̄бхӯтам̣ паджа̄на̄ти; самудайавайадхаммам̣ веданам̣ ‘самудайавайадхамма̄ ведана̄’ти йатха̄бхӯтам̣ паджа̄на̄ти. самудайадхаммам̣ сан̃н̃ам̣… самудайадхамме сан̇кха̄ре ‘самудайадхамма̄ сан̇кха̄ра̄’ти йатха̄бхӯтам̣ паджа̄на̄ти; вайадхамме сан̇кха̄ре ‘вайадхамма̄ сан̇кха̄ра̄’ти йатха̄бхӯтам̣ паджа̄на̄ти; самудайавайадхамме сан̇кха̄ре ‘самудайавайадхамма̄ сан̇кха̄ра̄’ти йатха̄бхӯтам̣ паджа̄на̄ти. самудайадхаммам̣ вин̃н̃а̄н̣ам̣ ‘самудайадхаммам̣ вин̃н̃а̄н̣а’нти йатха̄бхӯтам̣ паджа̄на̄ти; вайадхаммам̣ вин̃н̃а̄н̣ам̣ ‘вайадхаммам̣ вин̃н̃а̄н̣а’нти йатха̄бхӯтам̣ паджа̄на̄ти; самудайавайадхаммам̣ вин̃н̃а̄н̣ам̣ ‘самудайавайадхаммам̣ вин̃н̃а̄н̣а’нти йатха̄бхӯтам̣ паджа̄на̄ти. айам̣ вуччати, бхиккху, виджджа̄; етта̄вата̄ ча виджджа̄гато хотӣ’’ти. пат̣хамам̣.