7. гаддулабаддхасуттам̣

99. са̄ваттхинида̄нам̣. ‘‘анаматаггойам̣, бхиккхаве, сам̣са̄ро. пубба̄ кот̣и на пан̃н̃а̄йати авиджджа̄нӣваран̣а̄нам̣ сатта̄нам̣ тан̣ха̄сам̣йоджана̄нам̣ сандха̄ватам̣ сам̣саратам̣. хоти со, бхиккхаве, самайо йам̣ маха̄самуддо уссуссати висуссати на бхавати; на твева̄хам̣, бхиккхаве, авиджджа̄нӣваран̣а̄нам̣ сатта̄нам̣ тан̣ха̄сам̣йоджана̄нам̣ сандха̄ватам̣ сам̣саратам̣ дуккхасса антакирийам̣ вада̄ми. хоти со, бхиккхаве, самайо йам̣ синеру паббатара̄джа̄ д̣айхати винассати на бхавати; на твева̄хам̣, бхиккхаве, авиджджа̄нӣваран̣а̄нам̣ сатта̄нам̣ тан̣ха̄сам̣йоджана̄нам̣ сандха̄ватам̣ сам̣саратам̣ дуккхасса антакирийам̣ вада̄ми. хоти со, бхиккхаве, самайо йам̣ маха̄патхавӣ д̣айхати винассати на бхавати; на твева̄хам̣, бхиккхаве, авиджджа̄нӣваран̣а̄нам̣ сатта̄нам̣ тан̣ха̄сам̣йоджана̄нам̣ сандха̄ватам̣ сам̣саратам̣ дуккхасса антакирийам̣ вада̄ми’’.

‘‘сеййатха̄пи, бхиккхаве, са̄ гаддулабаддхо [гаддӯлабандхо (сйа̄. кам̣.)] дал̣хе кхӣле ва̄ тхамбхе ва̄ упанибаддхо тамева кхӣлам̣ ва̄ тхамбхам̣ ва̄ анупаридха̄вати анупариваттати; евамева кхо, бхиккхаве, ассутава̄ путхуджджано арийа̄нам̣ адасса̄вӣ…пе… саппурисадхамме авинӣто рӯпам̣ аттато саманупассати…пе… веданам̣ аттато саманупассати… сан̃н̃ам̣ аттато саманупассати… сан̇кха̄ре аттато саманупассати… вин̃н̃а̄н̣ам̣ аттато саманупассати, вин̃н̃а̄н̣авантам̣ ва̄ атта̄нам̣; аттани ва̄ вин̃н̃а̄н̣ам̣, вин̃н̃а̄н̣асмим̣ ва̄ атта̄нам̣. со рӯпан̃н̃ева анупаридха̄вати анупариваттати, веданан̃н̃ева…пе… сан̃н̃ан̃н̃ева… сан̇кха̄рейева… вин̃н̃а̄н̣ан̃н̃ева анупаридха̄вати анупариваттати. со рӯпам̣ анупаридха̄вам̣ анупариваттам̣, веданам̣…пе… сан̃н̃ам̣… сан̇кха̄ре… вин̃н̃а̄н̣ам̣ анупаридха̄вам̣ анупариваттам̣, на паримуччати рӯпамха̄, на паримуччати ведана̄йа, на паримуччати сан̃н̃а̄йа, на паримуччати сан̇кха̄рехи, на паримуччати вин̃н̃а̄н̣амха̄, на паримуччати джа̄тийа̄ джара̄маран̣ена сокехи паридевехи дуккхехи доманассехи упа̄йа̄сехи. ‘на паримуччати дуккхасма̄’ти вада̄ми’’.

‘‘сутава̄ ча кхо, бхиккхаве, арийаса̄вако арийа̄нам̣ дасса̄вӣ…пе… саппурисадхамме сувинӣто, на рӯпам̣ аттато саманупассати…пе… на веданам̣… на сан̃н̃ам̣… на сан̇кха̄ре… на вин̃н̃а̄н̣ам̣ аттато саманупассати, на вин̃н̃а̄н̣авантам̣ ва̄ атта̄нам̣; на аттани ва̄ вин̃н̃а̄н̣ам̣, на вин̃н̃а̄н̣асмим̣ ва̄ атта̄нам̣. со рӯпам̣ на̄нупаридха̄вати на̄нупариваттати, веданам̣… сан̃н̃ам̣… сан̇кха̄ре… вин̃н̃а̄н̣ам̣ на̄нупаридха̄вати на̄нупариваттати. со рӯпам̣ ананупаридха̄вам̣ ананупариваттам̣, веданам̣… сан̃н̃ам̣… сан̇кха̄ре… вин̃н̃а̄н̣ам̣ ананупаридха̄вам̣ ананупариваттам̣; паримуччати рӯпамха̄, паримуччати ведана̄йа, паримуччати сан̃н̃а̄йа, паримуччати сан̇кха̄рехи, паримуччати вин̃н̃а̄н̣амха̄, паримуччати джа̄тийа̄ джара̄маран̣ена сокехи паридевехи дуккхехи доманассехи упа̄йа̄сехи. ‘паримуччати дуккхасма̄’ти вада̄мӣ’’ти. саттамам̣.