8. дутийагаддулабаддхасуттам̣

100. са̄ваттхинида̄нам̣. ‘‘анаматаггойам̣, бхиккхаве, сам̣са̄ро. пубба̄ кот̣и на пан̃н̃а̄йати авиджджа̄нӣваран̣а̄нам̣ сатта̄нам̣ тан̣ха̄сам̣йоджана̄нам̣ сандха̄ватам̣ сам̣саратам̣. сеййатха̄пи, бхиккхаве, са̄ гаддулабаддхо дал̣хе кхӣле ва̄ тхамбхе ва̄ упанибаддхо. со гаччхати чепи тамева кхӣлам̣ ва̄ тхамбхам̣ ва̄ упагаччхати; тит̣т̣хати чепи тамева кхӣлам̣ ва̄ тхамбхам̣ ва̄ упатит̣т̣хати; нисӣдати чепи тамева кхӣлам̣ ва̄ тхамбхам̣ ва̄ упанисӣдати; нипаджджати чепи тамева кхӣлам̣ ва̄ тхамбхам̣ ва̄ упанипаджджати. евамева кхо, бхиккхаве, ассутава̄ путхуджджано рӯпам̣ ‘етам̣ мама, есохамасми, есо ме атта̄’ти саманупассати. веданам̣… сан̃н̃ам̣… сан̇кха̄ре… вин̃н̃а̄н̣ам̣ ‘етам̣ мама, есохамасми, есо ме атта̄’ти саманупассати. со гаччхати чепи име пан̃чупа̄да̄наккхандхе упагаччхати; тит̣т̣хати чепи име пан̃чупа̄да̄наккхандхе упатит̣т̣хати; нисӣдати чепи име пан̃чупа̄да̄наккхандхе упанисӣдати; нипаджджати чепи име пан̃чупа̄да̄наккхандхе упанипаджджати. тасма̄тиха, бхиккхаве, абхиккхан̣ам̣ сакам̣ читтам̣ паччавеккхитаббам̣ – ‘дӣгхараттамидам̣ читтам̣ сам̣килит̣т̣хам̣ ра̄гена досена мохена̄’ти. читтасам̣килеса̄, бхиккхаве, сатта̄ сам̣килиссанти; читтавода̄на̄ сатта̄ висуджджханти.

‘‘дит̣т̣хам̣ во, бхиккхаве, чаран̣ам̣ на̄ма читта’’нти? ‘‘евам̣, бханте’’. ‘‘тампи кхо, бхиккхаве, чаран̣ам̣ на̄ма читтам̣ читтенева читтитам̣. тенапи кхо, бхиккхаве, чаран̣ена читтена читтан̃н̃ева читтатарам̣. тасма̄тиха, бхиккхаве, абхиккхан̣ам̣ сакам̣ читтам̣ паччавеккхитаббам̣ – ‘дӣгхараттамидам̣ читтам̣ сам̣килит̣т̣хам̣ ра̄гена досена мохена̄’ти. читтасам̣килеса̄, бхиккхаве, сатта̄ сам̣килиссанти; читтавода̄на̄ сатта̄ висуджджханти.

‘‘на̄хам̣, бхиккхаве, ан̃н̃ам̣ еканика̄йампи саманупасса̄ми евам̣ читтам̣. йатхайидам̣, бхиккхаве, тираччха̄нагата̄ па̄н̣а̄, тепи кхо, бхиккхаве, тираччха̄нагата̄ па̄н̣а̄ читтенева читтита̄, техипи кхо, бхиккхаве, тираччха̄нагатехи па̄н̣ехи читтан̃н̃ева читтатарам̣. тасма̄тиха, бхиккхаве, абхиккхан̣ам̣ сакам̣ читтам̣ паччавеккхитаббам̣ – ‘дӣгхараттамидам̣ читтам̣ сам̣килит̣т̣хам̣ ра̄гена досена мохена̄’ти. читтасам̣килеса̄, бхиккхаве, сатта̄ сам̣килиссанти; читтавода̄на̄ сатта̄ висуджджханти.

‘‘сеййатха̄пи, бхиккхаве, раджако ва̄ читтака̄рако ва̄ раджана̄йа ва̄ ла̄кха̄йа ва̄ халиддийа̄ ва̄ нӣлийа̄ ва̄ ман̃джит̣т̣ха̄йа [ман̃джет̣т̣ха̄йа (сӣ. сйа̄. кам̣.), ман̃джет̣т̣хийа̄ (пӣ.)] ва̄ супаримат̣т̣хе пхалаке ва̄ бхиттийа̄ ва̄ дуссапат̣т̣е ва̄ иттхирӯпам̣ ва̄ пурисарӯпам̣ ва̄ абхинимминеййа саббан̇гапаччан̇гим̣; евамева кхо, бхиккхаве, ассутава̄ путхуджджано рӯпан̃н̃ева абхиниббаттенто абхиниббаттети, веданан̃н̃ева…пе… сан̃н̃ан̃н̃ева… сан̇кха̄ре йева… вин̃н̃а̄н̣ан̃н̃ева абхиниббаттенто абхиниббаттети. там̣ ким̣ ман̃н̃атха, бхиккхаве, рӯпам̣ ниччам̣ ва̄ аниччам̣ ва̄’’ти? ‘‘аниччам̣, бханте’’. ‘‘ведана̄… сан̃н̃а̄… сан̇кха̄ра̄… вин̃н̃а̄н̣ам̣…пе… ‘‘тасма̄тиха, бхиккхаве, евам̣ пассам̣…пе… на̄парам̣ иттхатта̄йа̄ти паджа̄на̄тӣ’’ти. ат̣т̣хамам̣.