2. пуппхасуттам̣

94. са̄ваттхинида̄нам̣. ‘‘на̄хам̣, бхиккхаве, локена вивада̄ми, локова майа̄ вивадати. на, бхиккхаве, дхаммава̄дӣ кеначи локасмим̣ вивадати. йам̣, бхиккхаве, наттхисамматам̣ локе пан̣д̣ита̄нам̣, ахампи там̣ ‘наттхӣ’ти вада̄ми. йам̣, бхиккхаве, аттхисамматам̣ локе пан̣д̣ита̄нам̣, ахампи там̣ ‘аттхӣ’ти вада̄ми’’.

‘‘кин̃ча, бхиккхаве, наттхисамматам̣ локе пан̣д̣ита̄нам̣, йамахам̣ ‘наттхӣ’ти вада̄ми? рӯпам̣, бхиккхаве, ниччам̣ дхувам̣ сассатам̣ авипарин̣а̄мадхаммам̣ наттхисамматам̣ локе пан̣д̣ита̄нам̣; ахампи там̣ ‘наттхӣ’ти вада̄ми. ведана̄… сан̃н̃а̄… сан̇кха̄ра̄… вин̃н̃а̄н̣ам̣ ниччам̣ дхувам̣ сассатам̣ авипарин̣а̄мадхаммам̣ наттхисамматам̣ локе пан̣д̣ита̄нам̣; ахампи там̣ ‘наттхӣ’ти вада̄ми. идам̣ кхо, бхиккхаве, наттхисамматам̣ локе пан̣д̣ита̄нам̣; ахампи там̣ ‘наттхӣ’ти вада̄ми’’.

‘‘кин̃ча, бхиккхаве, аттхисамматам̣ локе пан̣д̣ита̄нам̣, йамахам̣ ‘аттхӣ’ти вада̄ми? рӯпам̣, бхиккхаве, аниччам̣ дуккхам̣ випарин̣а̄мадхаммам̣ аттхисамматам̣ локе пан̣д̣ита̄нам̣; ахампи там̣ ‘аттхӣ’ти вада̄ми. ведана̄ аничча̄…пе… вин̃н̃а̄н̣ам̣ аниччам̣ дуккхам̣ випарин̣а̄мадхаммам̣ аттхисамматам̣ локе пан̣д̣ита̄нам̣; ахампи там̣ ‘аттхӣ’ти вада̄ми. идам̣ кхо, бхиккхаве, аттхисамматам̣ локе пан̣д̣ита̄нам̣; ахампи там̣ ‘аттхӣ’ти вада̄ми’’.

‘‘аттхи, бхиккхаве, локе локадхаммо, там̣ татха̄гато абхисамбуджджхати абхисамети; абхисамбуджджхитва̄ абхисаметва̄ там̣ а̄чиккхати десети пан̃н̃апети пат̣т̣хапети виварати вибхаджати утта̄нӣкароти.

‘‘кин̃ча, бхиккхаве, локе локадхаммо, там̣ татха̄гато абхисамбуджджхати абхисамети, абхисамбуджджхитва̄ абхисаметва̄ а̄чиккхати десети пан̃н̃апети пат̣т̣хапети виварати вибхаджати утта̄нӣкароти? рӯпам̣, бхиккхаве, локе локадхаммо там̣ татха̄гато абхисамбуджджхати абхисамети. абхисамбуджджхитва̄ абхисаметва̄ а̄чиккхати десети пан̃н̃апети пат̣т̣хапети виварати вибхаджати утта̄нӣкароти.

‘‘йо, бхиккхаве, татха̄гатена евам̣ а̄чиккхийама̄не десийама̄не пан̃н̃апийама̄не пат̣т̣хапийама̄не виварийама̄не вибхаджийама̄не утта̄нӣкарийама̄не на джа̄на̄ти на пассати тамахам̣, бхиккхаве, ба̄лам̣ путхуджджанам̣ андхам̣ ачаккхукам̣ аджа̄нантам̣ апассантам̣ кинти кароми! ведана̄, бхиккхаве, локе локадхаммо…пе… сан̃н̃а̄, бхиккхаве… сан̇кха̄ра̄, бхиккхаве… вин̃н̃а̄н̣ам̣, бхиккхаве, локе локадхаммо там̣ татха̄гато абхисамбуджджхати абхисамети. абхисамбуджджхитва̄ абхисаметва̄ а̄чиккхати десети пан̃н̃апети пат̣т̣хапети виварати вибхаджати утта̄нӣкароти.

‘‘сеййатха̄пи, бхиккхаве, уппалам̣ ва̄ падумам̣ ва̄ пун̣д̣арӣкам̣ ва̄ удаке джа̄там̣ удаке сам̣вад̣д̣хам̣ удака̄ аччуггамма т̣ха̄ти [тит̣т̣хантам̣ (ка.)] анупалиттам̣ удакена; евамева кхо, бхиккхаве, татха̄гато локе джа̄то локе сам̣вад̣д̣хо локам̣ абхибхуййа вихарати анупалитто локена̄’’ти. дутийам̣.