1. надӣсуттам̣

93. са̄ваттхинида̄нам̣. ‘‘сеййатха̄пи, бхиккхаве, надӣ паббатеййа̄ оха̄ринӣ дӯран̇гама̄ сӣгхасота̄. тасса̄ убхосу тӣресу [убхато тӣре (сӣ.), убхато тӣресу (сйа̄. кам̣.)] ка̄са̄ чепи джа̄та̄ ассу, те нам̣ аджджхоламбеййум̣; куса̄ чепи джа̄та̄ ассу, те нам̣ аджджхоламбеййум̣; паббаджа̄ [баббаджа̄ (сӣ. пӣ.)] чепи джа̄та̄ ассу, те нам̣ аджджхоламбеййум̣; бӣран̣а̄ чепи джа̄та̄ ассу, те нам̣ аджджхоламбеййум̣; руккха̄ чепи джа̄та̄ ассу, те нам̣ аджджхоламбеййум̣. тасса̄ пурисо сотена вуйхама̄но ка̄се чепи ган̣хеййа, те палуджджеййум̣. со татонида̄нам̣ анайабйасанам̣ а̄паджджеййа. кусе чепи ган̣хеййа, паббадже чепи ган̣хеййа, бӣран̣е чепи ган̣хеййа, руккхе чепи ган̣хеййа, те палуджджеййум̣. со татонида̄нам̣ анайабйасанам̣ а̄паджджеййа. евамева кхо, бхиккхаве, ассутава̄ путхуджджано арийа̄нам̣ адасса̄вӣ арийадхаммасса аковидо арийадхамме авинӣто, саппуриса̄нам̣ адасса̄вӣ саппурисадхаммасса аковидо саппурисадхамме авинӣто рӯпам̣ аттато саманупассати, рӯпавантам̣ ва̄ атта̄нам̣; аттани ва̄ рӯпам̣, рӯпасмим̣ ва̄ атта̄нам̣. тасса там̣ рӯпам̣ палуджджати. со татонида̄нам̣ анайабйасанам̣ а̄паджджати. веданам̣… сан̃н̃ам̣… сан̇кха̄ре… вин̃н̃а̄н̣ам̣ аттато саманупассати, вин̃н̃а̄н̣авантам̣ ва̄ атта̄нам̣; аттани ва̄ вин̃н̃а̄н̣ам̣, вин̃н̃а̄н̣асмим̣ ва̄ атта̄нам̣. тасса там̣ вин̃н̃а̄н̣ам̣ палуджджати. со татонида̄нам̣ анайабйасанам̣ а̄паджджати. там̣ ким̣ ман̃н̃атха, бхиккхаве, рӯпам̣ ниччам̣ ва̄ аниччам̣ ва̄’’ти? ‘‘аниччам̣ бханте’’. ‘‘ведана̄… сан̃н̃а̄… сан̇кха̄ра̄… вин̃н̃а̄н̣ам̣ ниччам̣ ва̄ аниччам̣ ва̄’’ти? ‘‘аниччам̣ бханте’’. ‘‘тасма̄тиха…пе… евам̣ пассам̣…пе… на̄парам̣ иттхатта̄йа̄ти паджа̄на̄тӣ’’ти. пат̣хамам̣.