8. лока̄йатикасуттам̣

48. са̄ваттхийам̣ вихарати. атха кхо лока̄йатико бра̄хман̣о йена бхагава̄…пе… екамантам̣ нисинно кхо лока̄йатико бра̄хман̣о бхагавантам̣ етадавоча –

‘‘ким̣ ну кхо, бхо готама, саббаматтхӣ’’ти? ‘‘‘саббаматтхӣ’ти кхо, бра̄хман̣а, джет̣т̣хаметам̣ лока̄йатам̣’’.

‘‘ким̣ пана, бхо готама, саббам̣ наттхӣ’’ти? ‘‘‘саббам̣ наттхӣ’ти кхо, бра̄хман̣а, дутийаметам̣ лока̄йатам̣’’.

‘‘ким̣ ну кхо, бхо готама, саббамекатта’’нти? ‘‘‘саббамекатта’нти кхо, бра̄хман̣а, татийаметам̣ лока̄йатам̣’’.

‘‘ким̣ пана, бхо готама, саббам̣ путхутта’’нти? ‘‘‘саббам̣ путхутта’нти кхо, бра̄хман̣а, чатуттхаметам̣ лока̄йатам̣’’.

‘‘ете те, бра̄хман̣а, убхо анте анупагамма маджджхена татха̄гато дхаммам̣ десети – ‘авиджджа̄паччайа̄ сан̇кха̄ра̄; сан̇кха̄рапаччайа̄ вин̃н̃а̄н̣ам̣…пе… еваметасса кеваласса дуккхаккхандхасса самудайо хоти. авиджджа̄йа твева асесавира̄ганиродха̄ сан̇кха̄раниродхо; сан̇кха̄раниродха̄ вин̃н̃а̄н̣аниродхо…пе… еваметасса кеваласса дуккхаккхандхасса ниродхо хотӣ’’’ти.

евам̣ вутте, лока̄йатико бра̄хман̣о бхагавантам̣ етадавоча – ‘‘абхиккантам̣, бхо готама…пе… аджджатагге па̄н̣упетам̣ саран̣ам̣ гата’’нти. ат̣т̣хамам̣.