9. арийаса̄вакасуттам̣

49. са̄ваттхийам̣ вихарати…пе… ‘‘на, бхиккхаве, сутавато арийаса̄вакасса евам̣ хоти – ‘ким̣ ну кхо кисмим̣ сати ким̣ хоти, киссуппа̄да̄ ким̣ уппаджджати? (кисмим̣ сати сан̇кха̄ра̄ хонти, кисмим̣ сати вин̃н̃а̄н̣ам̣ хоти,) [( ) еттхантаре па̄т̣ха̄ кесучи поттхакесу на диссантӣти сӣ. пӣ. поттхакесу дассита̄. татха̄ сати анантарасуттат̣ӣка̄йа самети] кисмим̣ сати на̄марӯпам̣ хоти, кисмим̣ сати сал̣а̄йатанам̣ хоти, кисмим̣ сати пхассо хоти, кисмим̣ сати ведана̄ хоти, кисмим̣ сати тан̣ха̄ хоти, кисмим̣ сати упа̄да̄нам̣ хоти, кисмим̣ сати бхаво хоти, кисмим̣ сати джа̄ти хоти, кисмим̣ сати джара̄маран̣ам̣ хотӣ’’’ти?

‘‘атха кхо, бхиккхаве, сутавато арийаса̄вакасса апараппаччайа̄ н̃а̄н̣амеветтха хоти – ‘имасмим̣ сати идам̣ хоти, имассуппа̄да̄ идам̣ уппаджджати. (авиджджа̄йа сати сан̇кха̄ра̄ хонти; сан̇кха̄ресу сати вин̃н̃а̄н̣ам̣ хоти;) [( ) еттхакесу па̄т̣ха̄ кесучи поттхакесу на диссантӣти сӣ. пӣ. поттхакесу дассита̄. татха̄ сати анантарасуттат̣ӣка̄йа самети] вин̃н̃а̄н̣е сати на̄марӯпам̣ хоти; на̄марӯпе сати сал̣а̄йатанам̣ хоти; сал̣а̄йатане сати пхассо хоти; пхассе сати ведана̄ хоти; ведана̄йа сати тан̣ха̄ хоти; тан̣ха̄йа сати упа̄да̄нам̣ хоти; упа̄да̄не сати бхаво хоти; бхаве сати джа̄ти хоти; джа̄тийа̄ сати джара̄маран̣ам̣ хотӣ’ти. со евам̣ паджа̄на̄ти – ‘евамайам̣ локо самудайатӣ’’’ти.

‘‘на, бхиккхаве, сутавато арийаса̄вакасса евам̣ хоти – ‘ким̣ ну кхо кисмим̣ асати ким̣ на хоти, кисса ниродха̄ ким̣ нируджджхати? (кисмим̣ асати сан̇кха̄ра̄ на хонти, кисмим̣ асати вин̃н̃а̄н̣ам̣ на хоти,) [( ) еттхантаре па̄т̣ха̄пи таттха татхева дассита̄] кисмим̣ асати на̄марӯпам̣ на хоти, кисмим̣ асати сал̣а̄йатанам̣ на хоти, кисмим̣ асати пхассо на хоти, кисмим̣ асати ведана̄ на хоти, кисмим̣ асати тан̣ха̄ на хоти, кисмим̣ асати упа̄да̄нам̣ на хоти, кисмим̣ асати бхаво на хоти, кисмим̣ асати джа̄ти на хоти, кисмим̣ асати джара̄маран̣ам̣ на хотӣ’’’ти?

‘‘атха кхо, бхиккхаве, сутавато арийаса̄вакасса апараппаччайа̄ н̃а̄н̣амеветтха хоти – ‘имасмим̣ асати идам̣ на хоти, имасса ниродха̄ идам̣ нируджджхати. (авиджджа̄йа асати сан̇кха̄ра̄ на хонти; сан̇кха̄ресу асати вин̃н̃а̄н̣ам̣ на хоти;) [( ) еттхантаре па̄т̣ха̄пи таттха татхева дассита̄] вин̃н̃а̄н̣е асати на̄марӯпам̣ на хоти; на̄марӯпе асати сал̣а̄йатанам̣ на хоти…пе… бхаво на хоти… джа̄ти на хоти… джа̄тийа̄ асати джара̄маран̣ам̣ на хотӣ’ти. со евам̣ паджа̄на̄ти – ‘евамайам̣ локо нируджджхатӣ’’’ти.

‘‘йато кхо, бхиккхаве, арийаса̄вако евам̣ локасса самудайан̃ча аттхан̇гаман̃ча йатха̄бхӯтам̣ паджа̄на̄ти, айам̣ вуччати, бхиккхаве, арийаса̄вако дит̣т̣хисампанно итипи…пе… аматадва̄рам̣ а̄хачча тит̣т̣хати итипӣ’’ти. навамам̣.