7. ачелакассапасуттам̣

17. евам̣ ме сутам̣ – екам̣ самайам̣ бхагава̄ ра̄джагахе вихарати вел̣уване каландаканива̄пе. атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа ра̄джагахам̣ пин̣д̣а̄йа па̄виси. аддаса̄ кхо ачело кассапо бхагавантам̣ дӯратова а̄гаччхантам̣. дисва̄на йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ ат̣т̣ха̄си. екамантам̣ т̣хито кхо ачело кассапо бхагавантам̣ етадавоча – ‘‘пуччхеййа̄ма майам̣ бхавантам̣ готамам̣ кан̃чидева [кин̃чидева (ка.)] десам̣, саче но бхавам̣ готамо ока̄сам̣ кароти пан̃хасса веййа̄каран̣а̄йа̄’’ти.

‘‘ака̄ло кхо та̄ва, кассапа, пан̃хасса; антарагхарам̣ павит̣т̣хамха̄’’ти. дутийампи кхо ачело кассапо бхагавантам̣ етадавоча ‘‘пуччхеййа̄ма майам̣ бхавантам̣ готамам̣ кан̃чидева десам̣, саче но бхавам̣ готамо ока̄сам̣ кароти пан̃хасса веййа̄каран̣а̄йа̄’’ти. ‘‘ака̄ло кхо та̄ва, кассапа, пан̃хасса; антарагхарам̣ павит̣т̣хамха̄’’ти. татийампи кхо ачело кассапо…пе… антарагхарам̣ павит̣т̣хамха̄ти. евам̣ вутте, ачело кассапо бхагавантам̣ етадавоча – ‘‘на кхо пана майам̣ бхавантам̣ готамам̣ бахудева пуччхитука̄ма̄’’ти. ‘‘пуччха, кассапа, йада̄кан̇кхасӣ’’ти.

‘‘ким̣ ну кхо, бхо готама, ‘сайам̣катам̣ дуккха’нти? ‘ма̄ хевам̣, кассапа̄’ти бхагава̄ авоча. ‘ким̣ пана, бхо готама, парам̣катам̣ дуккха’нти? ‘ма̄ хевам̣, кассапа̄’ти бхагава̄ авоча. ‘ким̣ ну кхо, бхо готама, сайам̣катан̃ча парам̣катан̃ча дуккха’нти? ‘ма̄ хевам̣, кассапа̄’ти бхагава̄ авоча. ‘ким̣ пана бхо готама, асайам̣ка̄рам̣ апарам̣ка̄рам̣ адхиччасамуппаннам̣ дуккха’нти? ‘ма̄ хевам̣, кассапа̄’ти бхагава̄ авоча. ‘ким̣ ну кхо, бхо готама, наттхи дуккха’нти? ‘на кхо, кассапа, наттхи дуккхам̣. аттхи кхо, кассапа, дуккха’нти. ‘тена хи бхавам̣ готамо дуккхам̣ на джа̄на̄ти, на пассатӣ’ти. ‘на кхва̄хам̣, кассапа, дуккхам̣ на джа̄на̄ми, на пасса̄ми. джа̄на̄ми кхва̄хам̣, кассапа, дуккхам̣; пасса̄ми кхва̄хам̣, кассапа, дуккха’’’нти.

‘‘ки ну кхо, бхо готама, ‘сайам̣катам̣ дуккха’нти ити пут̣т̣хо сама̄но ‘ма̄ хевам̣, кассапа̄’ти вадеси. ‘ким̣ пана, бхо готама, парам̣катам̣ дуккха’нти ити пут̣т̣хо сама̄но ‘ма̄ хевам̣, кассапа̄’ти вадеси. ‘ким̣ ну кхо, бхо готама, сайам̣катан̃ча парам̣катан̃ча дуккха’нти ити пут̣т̣хо сама̄но ‘ма̄ хевам̣, кассапа̄’ти вадеси. ‘ким̣ пана, бхо готама, асайам̣ка̄рам̣ апарам̣ка̄рам̣ адхиччасамуппаннам̣ дуккха’нти ити пут̣т̣хо сама̄но ‘ма̄ хевам̣, кассапа̄’ти вадеси. ‘ким̣ ну кхо, бхо готама, наттхи дуккха’нти ити пут̣т̣хо сама̄но ‘на кхо, кассапа, наттхи дуккхам̣, аттхи кхо, кассапа, дуккха’нти вадеси. ‘тена хи бхавам̣ готамо дуккхам̣ на джа̄на̄ти на пассатӣ’ти ити пут̣т̣хо сама̄но ‘на кхва̄хам̣, кассапа, дуккхам̣ на джа̄на̄ми на пасса̄ми. джа̄на̄ми кхва̄хам̣, кассапа, дуккхам̣; пасса̄ми кхва̄хам̣, кассапа, дуккха’нти вадеси. а̄чиккхату ча [айам̣ чака̄ро сӣ. поттхаке наттхи] ме, бханте, бхагава̄ дуккхам̣. десету ча [айам̣ чака̄ро сӣ. поттхаке наттхи] ме, бханте, бхагава̄ дуккха’’нти.

‘‘‘со кароти со пат̣исам̣ведайатӣ’ти [пат̣исам̣ведийатӣти (сӣ. пӣ. ка.)] кхо, кассапа, а̄дито сато ‘сайам̣катам̣ дуккха’нти ити вадам̣ сассатам̣ етам̣ парети. ‘ан̃н̃о кароти ан̃н̃о пат̣исам̣ведайатӣ’ти кхо, кассапа, ведана̄бхитуннасса сато ‘парам̣катам̣ дуккха’нти ити вадам̣ уччхедам̣ етам̣ парети. ете те, кассапа, убхо анте анупагамма маджджхена татха̄гато дхаммам̣ десети – ‘авиджджа̄паччайа̄ сан̇кха̄ра̄; сан̇кха̄рапаччайа̄ вин̃н̃а̄н̣ам̣…пе… еваметасса кеваласса дуккхаккхандхасса самудайо хоти. авиджджа̄йа твева асесавира̄ганиродха̄ сан̇кха̄раниродхо; сан̇кха̄раниродха̄ вин̃н̃а̄н̣аниродхо…пе… еваметасса кеваласса дуккхаккхандхасса ниродхо хотӣ’’’ти.

евам̣ вутте, ачело кассапо бхагавантам̣ етадавоча – ‘‘абхиккантам̣, бханте, абхиккантам̣, бханте! сеййатха̄пи, бханте, никкуджджитам̣ ва̄ уккуджджеййа…пе… чаккхуманто рӯпа̄ни даккхантӣти; евамевам̣ бхагавата̄ анекапарийа̄йена дхаммо пака̄сито. еса̄хам̣, бханте, бхагавантам̣ саран̣ам̣ гаччха̄ми дхамман̃ча бхиккхусан̇гхан̃ча. лабхеййа̄хам̣, бханте, бхагавато сантике паббаджджам̣, лабхеййам̣ упасампада’’нти.

‘‘йо кхо, кассапа, ан̃н̃атиттхийапуббо имасмим̣ дхаммавинайе а̄кан̇кхати паббаджджам̣, а̄кан̇кхати упасампадам̣, со чатта̄ро ма̄се паривасати. чатуннам̣ ма̄са̄нам̣ аччайена [аччайена паривут̣т̣хапарива̄сам̣ (сйа̄. кам̣. пӣ. ка.)] (паривуттхапарива̄сам̣) а̄раддхачитта̄ бхиккхӯ [бхиккхӯ а̄кан̇кхама̄на̄ (сйа̄. кам̣. пӣ. ка.)] пабба̄дженти упасампа̄денти бхиккхубха̄ва̄йа. апи ча майа̄ пуггалавематтата̄ видита̄’’ти.

‘‘саче, бханте, ан̃н̃атиттхийапуббо имасмим̣ дхаммавинайе а̄кан̇кхати паббаджджам̣, а̄кан̇кхати упасампадам̣, чатта̄ро ма̄се паривасати. чатуннам̣ ма̄са̄нам̣ аччайена [аччайена паривут̣т̣хапарива̄сам̣ (сйа̄. кам̣. пӣ. ка.)] (паривуттхапарива̄сам̣) а̄раддхачитта̄ бхиккхӯ [бхиккхӯ а̄кан̇кхама̄на̄ (сйа̄. кам̣. пӣ. ка.)] пабба̄дженти упасампа̄денти бхиккхубха̄ва̄йа. ахам̣ чатта̄ри васса̄ни паривасисса̄ми, чатуннам̣ васса̄нам̣ аччайена [аччайена паривут̣т̣хапарива̄сам̣ (сйа̄. кам̣. пӣ. ка.)] (паривуттхапарива̄сам̣) а̄раддхачитта̄ бхиккхӯ пабба̄дженту упасампа̄денту бхиккхубха̄ва̄йа̄’’ти.

алаттха кхо ачело кассапо бхагавато сантике паббаджджам̣, алаттха упасампадам̣. ачирӯпасампанно ча пана̄йасма̄ кассапо еко вӯпакат̣т̣хо аппаматто а̄та̄пӣ пахитатто вихаранто начирассева – йассаттха̄йа кулапутта̄ саммадева ага̄расма̄ анага̄рийам̣ паббаджанти тадануттарам̣ – брахмачарийапарийоса̄нам̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа виха̄си. ‘‘кхӣн̣а̄ джа̄ти вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’’ти аббхан̃н̃а̄си. ан̃н̃атаро ча пана̄йасма̄ кассапо арахатам̣ ахосӣти. саттамам̣.