8. тимбарукасуттам̣

18. са̄ваттхийам̣ вихарати. атха кхо тимбаруко парибба̄джако йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо тимбаруко парибба̄джако бхагавантам̣ етадавоча –

‘‘‘ким̣ ну кхо, бхо готама, сайам̣катам̣ сукхадуккха’нти? ‘ма̄ хевам̣, тимбарука̄’ти бхагава̄ авоча. ‘ким̣ пана, бхо готама, парам̣катам̣ сукхадуккха’нти? ‘ма̄ хевам̣, тимбарука̄’ти бхагава̄ авоча. ‘ким̣ ну кхо, бхо готама, сайам̣катан̃ча парам̣катан̃ча сукхадуккха’нти? ‘ма̄ хевам̣, тимбарука̄’ти бхагава̄ авоча. ‘ким̣ пана, бхо готама, асайам̣ка̄рам̣ апарам̣ка̄рам̣ адхиччасамуппаннам̣ сукхадуккха’нти? ‘ма̄ хевам̣, тимбарука̄’ти бхагава̄ авоча. ‘ким̣ ну кхо, бхо готама, наттхи сукхадуккха’нти? ‘на кхо, тимбарука, наттхи сукхадуккхам̣; аттхи кхо, тимбарука, сукхадуккха’нти. ‘тена хи бхавам̣ готамо сукхадуккхам̣ на джа̄на̄ти, на пассатӣ’ти? ‘на кхва̄хам̣, тимбарука, сукхадуккхам̣ на джа̄на̄ми, на пасса̄ми. джа̄на̄ми кхва̄хам̣, тимбарука, сукхадуккхам̣; пасса̄ми кхва̄хам̣, тимбарука, сукхадуккха’’’нти.

‘‘‘ким̣ ну кхо, бхо готама, сайам̣катам̣ сукхадуккха’нти ити пут̣т̣хо сама̄но ‘ма̄ хевам̣, тимбарука̄’ти вадеси. ‘ким̣ пана, бхо готама, парам̣катам̣ сукхадуккха’нти ити пут̣т̣хо сама̄но ‘ма̄ хевам̣, тимбарука̄’ти вадеси. ‘ким̣ ну кхо, бхо готама, сайам̣катан̃ча парам̣катан̃ча сукхадуккха’нти ити пут̣т̣хо сама̄но ‘ма̄ хевам̣, тимбарука̄’ти вадеси. ‘ким̣ пана, бхо готама, асайам̣ка̄рам̣ апарам̣ка̄рам̣ адхиччасамуппаннам̣ сукхадуккха’нти ити пут̣т̣хо сама̄но ‘ма̄ хевам̣, тимбарука̄’ти вадеси. ‘ким̣ ну кхо, бхо готама, наттхи сукхадуккха’нти ити пут̣т̣хо сама̄но ‘на кхо, тимбарука, наттхи сукхадуккхам̣; аттхи кхо, тимбарука, сукхадуккха’нти вадеси. ‘тена хи бхавам̣ готамо сукхадуккхам̣ на джа̄на̄ти, на пассатӣ’ти ити пут̣т̣хо сама̄но ‘на кхва̄хам̣, тимбарука, сукхадуккхам̣ на джа̄на̄ми, на пасса̄ми. джа̄на̄ми кхва̄хам̣, тимбарука, сукхадуккхам̣; пасса̄ми кхва̄хам̣, тимбарука, сукхадуккха’нти вадеси. а̄чиккхату ча ме бхавам̣ готамо сукхадуккхам̣. десету ча ме бхавам̣ готамо сукхадуккха’’нти.

‘‘‘са̄ ведана̄, со ведайатӣ’ти кхо, тимбарука, а̄дито сато ‘сайам̣катам̣ сукхадуккха’нти евампа̄хам̣ на вада̄ми. ‘ан̃н̃а̄ ведана̄, ан̃н̃о ведайатӣ’ти кхо, тимбарука, ведана̄бхитуннасса сато ‘парам̣катам̣ сукхадуккха’нти евампа̄хам̣ на вада̄ми. ете те, тимбарука, убхо анте анупагамма маджджхена татха̄гато дхаммам̣ десети – ‘авиджджа̄паччайа̄ сан̇кха̄ра̄; сан̇кха̄рапаччайа̄ вин̃н̃а̄н̣ам̣…пе… еваметасса кеваласса дуккхаккхандхасса самудайо хоти. авиджджа̄йа твева асесавира̄ганиродха̄ сан̇кха̄раниродхо; сан̇кха̄раниродха̄ вин̃н̃а̄н̣аниродхо…пе… еваметасса кеваласса дуккхаккхандхасса ниродхо хотӣ’’’ти.

евам̣ вутте, тимбаруко парибба̄джако бхагавантам̣ етадавоча – ‘‘абхиккантам̣, бхо готама…пе… еса̄хам̣ бхавантам̣ готамам̣ саран̣ам̣ гаччха̄ми дхамман̃ча бхиккхусан̇гхан̃ча. упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’нти. ат̣т̣хамам̣.