10. саджджха̄йасуттам̣

230. екам̣ самайам̣ ан̃н̃атаро бхиккху косалесу вихарати ан̃н̃атарасмим̣ ванасан̣д̣е. тена кхо пана самайена со бхиккху йам̣ судам̣ пуббе ативелам̣ саджджха̄йабахуло вихарати со апарена самайена аппоссукко тун̣хӣбхӯто сан̇каса̄йати. атха кхо йа̄ тасмим̣ ванасан̣д̣е адхиваттха̄ девата̄ тасса бхиккхуно дхаммам̣ асун̣антӣ йена со бхиккху тенупасан̇ками; упасан̇камитва̄ там̣ бхиккхум̣ га̄тха̄йа аджджхабха̄си –

‘‘касма̄ тувам̣ дхаммапада̄ни бхиккху, на̄дхӣйаси бхиккхӯхи сам̣васанто;

сутва̄на дхаммам̣ лабхатиппаса̄дам̣, дит̣т̣хева дхамме лабхатиппасам̣са’’нти.

‘‘аху пуре дхаммападесу чхандо, йа̄ва вира̄гена сама̄гамимха;

йато вира̄гена сама̄гамимха, йам̣ кин̃чи дит̣т̣хам̣ва сутам̣ мутам̣ ва̄;

ан̃н̃а̄йа никкхепанама̄ху санто’’ти.