11. акусалавитаккасуттам̣

231. екам̣ самайам̣ ан̃н̃атаро бхиккху косалесу вихарати ан̃н̃атарасмим̣ ванасан̣д̣е. тена кхо пана самайена со бхиккху дива̄виха̄рагато па̄паке акусале витакке витаккети, сеййатхидам̣ – ка̄мавитаккам̣, бйа̄па̄давитаккам̣, вихим̣са̄витаккам̣. атха кхо йа̄ тасмим̣ ванасан̣д̣е адхиваттха̄ девата̄ тасса бхиккхуно анукампика̄ аттхака̄ма̄ там̣ бхиккхум̣ сам̣веджетука̄ма̄ йена со бхиккху тенупасан̇ками; упасан̇камитва̄ там̣ бхиккхум̣ га̄тха̄хи аджджхабха̄си –

‘‘айонисо манасика̄ра̄, со витаккехи кхаджджаси;

айонисо [айоним̣ (пӣ. ка.)] пат̣иниссаджджа, йонисо анучинтайа.

‘‘саттха̄рам̣ дхаммама̄раббха, сан̇гхам̣ сӣла̄ни аттано;

адхигаччхаси па̄моджджам̣, пӣтисукхамасам̣сайам̣;

тато па̄моджджабахуло, дуккхассантам̣ кариссасӣ’’ти.

атха кхо со бхиккху та̄йа девата̄йа сам̣веджито сам̣вегама̄па̄дӣти.