10. моггалла̄насуттам̣

218. екам̣ самайам̣ бхагава̄ ра̄джагахе вихарати исигилипассе ка̄л̣асила̄йам̣ махата̄ бхиккхусан̇гхена саддхим̣ пан̃чаматтехи бхиккхусатехи саббехева арахантехи. тесам̣ судам̣ а̄йасма̄ маха̄моггалла̄но четаса̄ читтам̣ саманнесати [саманвесати (сйа̄. ат̣т̣ха.)] виппамуттам̣ нирупадхим̣. атха кхо а̄йасмато ван̇гӣсасса етадахоси – ‘‘айам̣ кхо бхагава̄ ра̄джагахе вихарати исигилипассе ка̄л̣асила̄йам̣ махата̄ бхиккхусан̇гхена саддхим̣ пан̃чаматтехи бхиккхусатехи саббехева арахантехи. тесам̣ судам̣ а̄йасма̄ маха̄моггалла̄но четаса̄ читтам̣ саманнесати виппамуттам̣ нирупадхим̣. йам̣нӯна̄хам̣ а̄йасмантам̣ маха̄моггалла̄нам̣ бхагавато саммукха̄ са̄руппа̄хи га̄тха̄хи абхиттхавеййа’’нти.

атха кхо а̄йасма̄ ван̇гӣсо ут̣т̣ха̄йа̄сана̄ екам̣сам̣ уттара̄сан̇гам̣ каритва̄ йена бхагава̄ тенан̃джалим̣ пан̣а̄метва̄ бхагавантам̣ етадавоча – ‘‘пат̣ибха̄ти мам̣, бхагава̄, пат̣ибха̄ти мам̣, сугата̄’’ти. ‘‘пат̣ибха̄ту там̣, ван̇гӣса̄’’ти бхагава̄ авоча. атха кхо а̄йасма̄ ван̇гӣсо а̄йасмантам̣ маха̄моггалла̄нам̣ бхагавато саммукха̄ са̄руппа̄хи га̄тха̄хи абхиттхави –

‘‘нагасса пассе а̄сӣнам̣, муним̣ дуккхасса па̄рагум̣;

са̄вака̄ пайирупа̄санти, тевиджджа̄ маччуха̄йино.

‘‘те четаса̄ анупарийети [анупарийесати (сӣ. сйа̄. кам̣.)], моггалла̄но махиддхико;

читтам̣ несам̣ саманнесам̣ [саманвесам̣ (сйа̄. ат̣т̣ха.)], виппамуттам̣ нирӯпадхим̣.

‘‘евам̣ саббан̇гасампаннам̣, муним̣ дуккхасса па̄рагум̣;

анека̄ка̄расампаннам̣, пайирупа̄санти готама’’нти.